ރައީސްގެ ދެކަނބަލުން ޖަޕާނަށް ވަޑައިގެންފި

ޖަޕާން ސަރުކާރުގެ ޚާއްސަ ދައުވަތަކަށް ޖަޕާނަށް ކުރައްވާ ދަތުރުފުޅެއްގައި، ރައީސް އިބްރާހިމް މުހައްމަދު ސޯލިހުގެ ދެކަނބަލުން މިއަދު އެ ގައުމަށް ވަޑައިގެންފި އެވެ.

މި ދަތުރުފުޅުގައި، އެ ގައުމުގެ އެމްޕެރާ އަކިހީޓޯ މަގާމުން އަމިއްލަފުޅަށް ދުރުވެ ވަޑައިގަތުމަށް ފަހު، ކްރައުން ޕްރިންސް ނަރުހީޓޯ މަގާމަށް އިސްކުރައްވާ ރަސްމިއްޔާތުގައި ރައީސްގެ ދެކަނބަލުން ބައިވެރިވަޑައިގަންނަވާނެ އެވެ. މި ރަސްމިއްޔާތުގައި އެކި ގައުމުތަކުގެ އިސްވެރިން ބައިވެރިވަޑައިގަންނަވާނެ އެވެ.

ޖަޕާނުގެ ބޮޑު ވަޒީރު ޝިންޒޯ އަބޭއާ ވެސް ރައީސްގެ ދެކަނބަލުން މި ދަތުރުފުޅުގައި ބައްދަލުކުރައްވައި، ދެ ގައުމުގެ ރަސްމީ ވާހަކަތައް ބާއްވާނެ ކަމަށް ރައީސް އޮފީހުން ބުންޏެވެ. އަދި އެ ގައުމު ސަރުކާރުގެ ގިނަ އިސްވެރިންނާއި އަމިއްލަ ދާއިރާތަކުގައި މަސައްކަތްކުރާ މީހުންނާ ވެސް ބައްދަލުކުރައްވަން ހަމަޖެހިފައިވާ ކަމަށް ރައީސް އޮފީހުން ބުންޏެވެ.

ރައީސް އިބްރާހިމް މުހައްމަދު ސޯލިހު ބައިވެރިވަޑައިގަންނަވާ ވާހަކަފުޅުތަކުގައި ދެ ގައުމު ދެމެދުގައި އޮންނަ ގުޅުން ބަދަހިކުރެވޭނެ ގޮތްގޮތް މަޝްވަރާކުރައްވާނެ އެވެ. އަދި ރާއްޖޭގެ ތަރައްގީ އަށް ބޭނުންވާ އެކި ދާއިރާތަކަށް މީހުން ބިނާ ކުރުމަށާއި އުމްރާނީ މަސައްކަތް ކުރުމަށްޓަކައި ޖަޕާނުގެ ފަރާތުން އެހީ ހޯދުމަށްޓަކައި ވެސް އެ މަނިކުފާނު މަސައްކަތްޕުޅު ކުރައްވާނެ ކަމަށް ރައީސް އޮފީހުން ބުންޏެވެ.

މީގެ އިތުރުން، ގައުމުތަކުގެ އެންމެ އިސްވެރިން ގުޅުން ބަދަހިކުރުމަށް ޖަޕާނުގައި ބާއްވާ ހާއްސަ ހަރަކާތެއްގައި ވެސް ރައީސްގެ ދެކަނބަލުން ބައިވެރިވެވަޑައިގަންނަވާނެ އެވެ.

ޖަޕާނުގެ ތާރީޚީ އަދި ސަގާފީ ބިނާތަކަށް ރައީސްގެ ދެކަނބަލުން މި ދަތުރުފުޅުގައި ޒިޔާރަތްކުރައްވާނެ އެވެ. އޭގެ ތެރޭގައި ކިޔޯޓޯ ސިޓީ އާއި ހިރޮޝީމާގެ އިތުރުން އޮސާކާ އަށް ވަޑައިގަންނަވާނެ ކަމަށް ރައީސް އޮފީހުން ބުންޏެވެ.