ޖަޕާނުގައި ހުންނަ ރާއްޖޭގެ ޑެޕިއުޓީ އެމްބެސެޑަރަކަށް އަމީތު އައްޔަން ކުރައްވައިފި

ޖަޕާނުގައި ހުންނަވާ ރާއްޖޭގެ އެމްބެސެޑަރުގެ ނައިބު ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ ކުރީގެ މެމްބަރު މުހައްމަދު އަމީތު އައްޔަން ކުރައްވަައިފި އެވެ.

ހެލްތް މިނިސްޓަރު އަބްދުﷲ އަމީންގެ ކޮއްކޮ އަދި އުވިދިޔަ 18 ވަނަ މަޖިލީހުގެ މެމްބަރުން ކަން ކުރެއްވި އަމީތު އެ މަގާމު ޑެޕިއުޓީ އެމްބެސެޑަރު ކަމަށް ރައީސް އިބްރާހިމް މުހައްމަދު ސޯލިހް އައްޔަން ކުރެއްވީ ދާދި ފަހުންނެވެ. އެކަމާ ބެހޭގޮތުން ރައީސް އޮފީހުގެ ބަހެއް ލިބޭ ގޮތެއް ނުވި އެވެ.

ޑެޕިއުޓީ އެމްބެސެޑަރުންނަކީ މިނިސްޓަރުންގެ ނައިބުގެ ފެންވަރުގެ މަގާމެކެވެ. ޖަޕާނަށް ރާއްޖެއިން ކަނޑައަޅުއްވާފައި ހުުންނަވާ އެމްބެސެޑަރަކީ އިބްރާހިމް އުވައިސް އެވެ.

މަޖިލީހުގައި ޕީޕީއެމްގެ މެމްބަރެއްގެ ގޮތުގައި ހުންނެވުމަށް ފަހު 2017 ވަނަ އަހަރު އޭރުގެ އިދިކޮޅު ކޯލިޝަނާ ގުޅިވަޑައިގަތް 12 މެމްބަރުންގެ ތެރޭގައި އަމީތު ވެސް ހިމެނިވަޑައިގަތެވެ. އެހެންވެ، އެ 12 މެމްބަރުންގެ ގޮނޑި ގެއްލުނު ކަމަށް އިލެކްޝަންސް ކޮމިޝަނުން ކަނޑައެޅުމުން އަހަރަކަށް ވުރެ ގިނަ ދުވަސް ވަންދެން މަޖިލީހަށް ވަނުމުގެ ފުރުސަތު އެ ބޭފުޅުންނަށް ގެއްލުނެވެ. އެ ބޭފުޅުންގެ މެމްބަރު ކަމުގެ ގޮނޑި ނުގެއްލޭ ކަމަށް ސުޕްރީމް ކޯޓުން ނިންމީ އޮކްޓޫބަރު، 2018 ގަ އެވެ.