މޯލްޑިވްސް މެރިން އެކްސްޕޯ މި މަހުގެ 23 ގައި

ކަނޑު ދަތުރުފަތުރުގެ ދާއިރާ އިން ރާއްޖޭގައި ބާއްވާ އެންމެ ބޮޑު ފެއާ "މޯލްޑިވްސް މެރިން އެކްސްޕޯ" މި މަހުގެ 23 ގައި ބާއްވަން ނިންމައިފި އެވެ.

ނޭޝަނަލް ބޯޓިން އެސޯސިއޭޝަނުން ކޮންމެ އަހަރަކު ކުރިއަށް ގެންދާ މި އެކްސްޕޯ އަކީ ބޯޓުތަކާއި ކަނޑު އުޅަނދުފަހަރު ބައިނަލްއަގްވާމީ ޕްލެޓްފޯމެއްގައި ދައްކައިލުމަށް ލިބޭ ފުރުސަތެކެވެ. އެގޮތުން، އުޅަނދުފަހަރު ބަންނަ މީހުންނާއި ސަޕްލަޔަރުންނާއި ހިދުމަތް ފޯރުކޮށްދޭ މީހުންގެ އިތުރުން ބޮޑެތި ކުންފުނިތަކުންނާއި ވިޔަފާރިވެރިންނާ ގުޅުން ބަދަހި ކުރުމަށް ފުރުސަތު ލިބޭނެ އެވެ.

މި އެކްސްޕޯގެ ޒަރީއާ އިން، ކަނޑު ދަތުރުފަތުރުގެ ދާއިރާ އަށް އަލަށް ވަންނަން ބޭނުންވާ ފަރާތްތަކަށް އެ ފުރުސަތު ވެސް ލިބޭނެ އެވެ.

މި މަހުގެ 23-25 ގެ ނިޔަލަށް ބާއްވާ މި އެކްސްޕޯ ދަރުބާރުގޭގެ އިތުރުން މަސްވެރިންގެ ޕާކުގައި ވެސް ކުރިއަށް ގެންދާނެ އެވެ. މަސްވެރިންގެ ޕާކުގައި ކުރިއަށް ގެންދާ ހަރަކާތުގައި އެކި ކުންފުނިތަކުގެ ކަނޑު އުޅަދުތައް ދައްކައިލާނެ އެވެ.

މި އަހަރުގެ އެކްސްޕޯގައި 30 ފަރާތަކުން ބައިވެރިވެފައިވާއިރު 52 ސްޓޯލް ހުންނާނެ ކަމަށް ބޯޓިން އެސޯސިއޭޝަނުން ބުންޏެވެ. މިއީ ޓްރާންސްޕޯޓް މިނިސްޓްރީ އާއި ޓޫރިޒަމް މިނިސްޓްރީ އާއި އިކޮނޮމިކް މިނިސްޓްރީގެ އިތުރުން ސައިންސް އެންޑް ޓެކްނޮލޮޖީ މިނިސްޓްރީ އާއި މާލެ ސިޓީ ކައުންސިލްގެ އެއްބާރުލުމާ އެކު ބާއްވާ އެކްސްޕޯ އެކެވެ.

މެރިން އެކްސްޕޯގެ މެއިން ސްޕޮންސަރަކީ ގަލްފް ކްރާފްޓް އެވެ. ކޯ-ސްޕޮންސަރަކީ އަލްޝާލީ މެރިން އެވެ. ޑިޖިޓަލް ޕާޓްނަރަކީ ދިރާގެވެ. ސައުންޑް އެންޑް ލައިޓިން ޕާޓްނާ އަކަށް އިވެންޓް މޯލްޑިވްސް، މެގެޒިން ޕާޓްނަރަކަށް ފްލޯޓިން އޭޝިއާ، ޕްރޮޑަކްޝަން ޕާޓްނަކަށް ޑިޒައިން ގެލަރީ، ފޮޓޯގްރަފީ ޕާޓްނަރަކަށް އެލީޒް، އޮޑިޓް ޕާޓްނަރަކަށް ކްރޯ މޯލްޑިވްސް، ސެކިއުރިޓީ ޕާޓްނަރަކަށް އެބްސޮލޫޓް ސެކިއުރިޓީ އެންޑް އެޑްވާންސް ޕްރޮޓެކްޝަން، ފްލޯރިން ޕާޓްނަރަކަށް ހެބިޓެޓް، ސްޕެޝަލިޓީ ކޮފީ ޕާޓްނަރަކަށް ދަ ސިވިލް ކޮފީ ސޮސައިޓީ، ޕްރިންޓިން ޕާޓްނަރަކަށް ޕްރިންޓް ލެބް، ކްރިއޭޓިވް ޕާޓްނަރަކަށް ލޫޕް ކްރާފްޓް، ރިއަލް އެސްޓޭޓް ޕާޓްނަރަކަށް އެކުއާ ވިޓާ ރެޒިޑެންސީސް، ޓެކްނޮލޮޖީ ޕާޓްނަރަކަށް ވާޗުއަލް ޓެކްނޮލޮޖީސް، ފާނިޝިން ޕާޓްނަރަކަށް ސަންފްރޮންޓް، އެޕޭރަލްސް ޕާޓްނަރަކަށް ޓޮޑީ އިންކް އަދި މީޑިއާ ޕާޓްނަރަކަށް ހަމަޖައްސާފައި ވަނީ "މިހާރު" އެވެ.