އޮލިމްޕިކްސްގެ މެރެތަން ކެންޔާގެ ކިޕްޗޯޖް ކާމިޔާބުކޮށްފި

ރިއޯ ޑި ޖެނީރޯ (އޮގަސްޓް 22) - އޮލިމްޕިކް ގޭމްސްގެ ފިރިހެނުންގެ މެރެތަން ކެންޔާގެ އެލިއުޑް ކިޕްޗޯޖް ކާމިޔާބުކޮށްފި އެވެ.

މި އަހަރުގެ ލަންޑަން މެރެތަން ކާމިޔާބުކުރި އުމުރުން 31 އަހަރުގެ ކިޕްޗޯޖް ވަނީ ރޭހުގެ ފަހު ބައި އެއްކޮށް ޑޮމިނޭޓްކޮށްފަ އެވެ. އޭނާ 42 ކިލޯމީޓަރުގެ ރޭސް ފުރިހަމަކުރީ 2 ގަޑި 8 މިނެޓު 44 ސިކުންތުންނެވެ.

އޮލިމްޕިކްސްގެ އެންމެ ޝަރަފްވެރި އެއް އިވެންޓުން ރިހި މެޑަލް ހޯދީ އިތިއޯޕިއާގެ ފެއިސާ ލިލޭސާ އެވެ. އޭނާ ރޭސް ނިންމީ 2 ގަޑި 9 މިނެޓު 54 ސިކުންތުންނެވެ. އަދި ލޯ މެޑަލް ހޯދި އެމެރިކާގެ ގަލެން ރުޕް ރޭސް ނިންމީ 2 ގަޑި 10 މިނެޓު 5 ސިކުންތުންނެވެ.

މިއީ ކިޕްޗޯޖް ދުނިޔޭގެ ބޮޑު ގޭމްސްއެއްގެ މެރެތަންގައި ވާދަކުރި ފުރަތަމަ ފަހަރެވެ. އޭނާ ވަނީ 2008 ވަނަ އަހަރުގެ ބެއިޖިން އޮލިމްޕިކްސްގެ 5000 މީޓަރު ދުވުމުން ރިހި މެޑަލް އަދި 2004 ވަނަ އަހަރުގެ އެތެންސް އޮލިމްޕިކްސްގެ އެ އިވެންޓުން ލޯ މެޑަލް ހޯދައިފަ އެވެ. މީގެ އިތުރުން 2003 ވަނަ އަހަރުގެ ވޯލްޑް ޗެމްޕިއަންޝިޕުގެ 5000 މީޓަރު ދުވުމުން ރަން މެޑަލް އަދި 2010 ވަނަ އަހަރުގެ ކޮމަންވެލްތު ގޭމްސްގެ އެ އިވެންޓުން ރިހި މެޑަލް ހޯދި އެވެ.

"މިއީ އަހަރެންގެ ހަޔާތުގެ އެންމެ ބޮޑު ކާމިޔާބީ. މިއީ އަހަރެންގެ ފުރަތަމަ ރަން މެޑަލް. ވަރަށް ހަމަޖެހިލައިގެން ރޭސް ނިންމުނީ،" ވާރޭގެ ތެރޭގައި ރޭސް ފުރިހަމަކުރި ކިޕްޗޯޖް ބުންޏެވެ.