ޝުކޫރުގެ މައްސަލާގައި އިތުރު ކަންތައްތަކެއް ސާފުކުރަން އޭސީސީއަށް އަނބުރާ ފޮނުވާލައިފި

ސްޓެލްކޯ އަށް ޑޮލަރު ގަތުމަށް އަމިއްލަ ކުންފުންޏަކަށް ފައިސާ ދިން މައްސަލާގައި ސްޓެލްކޯގެ ކުރީގެ މެނޭޖިން ޑިރެކްޓަރު އަބްދުއްޝުކޫރާއި އިތުރު މީހަކަށް ދައުވާ ކޮށްދޭން އެދި ޕްރޮސެކިއުޓަ ޖެނެރަލްގެ އޮފީހަށް ފޮނުވި މައްސަލާގައި އިތުރު ކަންތައްތަކެއް ސާފުކުރަން، އެ މައްސަލަ އެންޓި ކޮރަޕްޝަން ކޮމިޝަން (އޭސީސީ) އަށް އަނބުރާ ފޮނުވާލައިފި އެވެ.

ބޭރު ފައިސާ ގަނެވިއްކުމުގެ ހުއްދަ ނެތް ކުންފުންޏެއްގެ އަތުން ސްޓެލްކޯ އަށް ދެ ލައްކަ ޑޮލަރު ގަތުމަށް ތިން މިލިއަނަށް ވުރެ ގިނަ ރުފިޔާ އެ ކުންފުންޏަށް ދިން މައްސަލާގައި ޝުކޫރުގެ އިތުރުން ސްޓެލްކޯގެ ފައިނޭންސް ޑިޕާޓްމެންޓްގެ ހެޑްގެ މައްޗަށް ދައުވާ ކުރަން އޭސީސީން ޕީޖީ އޮފީހަށް ފޮނުވީ މިދިޔަ އަހަރުގެ ޖުލައި މަހު އެވެ.

އޭސީސީގެ ނައިބު ރައީސް މުއައްވިޒް ރަޝީދު މިއަދު ވިދާޅުވީ، ތަހުގީގު ފުރިހަމަ ކުރުމަށްޓަކައި ޕީޖީ އޮފީހުން އެދުނު ކަންކަން އެ ކޮމިޝަނުން ބަލަމުން އަންނަ ކަމަށެވެ.

"މުޅި އެ ކޭސް އަނބުރާ ]އޭސީސީ އަށް] ފޮނުވާލާފައެއް ނެތް. އަދި އެ މައްސަލާގައި ދައުވާ ނުކުރުމަށް ވެސް ޕީޖީ އޮފީހުން ނިންމި ކަމެއް އަންގާފައެއް ނެތް. ހަމައެކަނި ބައެއް ކަންކަން ސާފުކޮށްދިނުމަށް އެދިފައި އޮތީ،" މުއައްވިޒް ވިދާޅުވި އެވެ.

ޝުކޫރުގެ މައްސަލާގައި އިތުރު ކަންތައްތަކެއް ސާފުކުރަން އަނބުރާ ފޮނުވާލިއިރު، ފެނަކަ ކޯޕަރޭޝަނަށް އެއް މިލިއަން ޑޮލަރު ގަތުމަށް 17 މިލިއަން ރުފިޔާ ދޫކުރި މައްސަލާގައި އެ ކޯޕަރޭޝަންގެ ކުރީގެ މެނޭޖިން ޑިރެކްޓަރު އަހުމަދު ނިމާލްގެ މައްޗަށް ދައުވާ ކޮށްދޭން އެދި އޭސީސީން ފޮނުވި މައްސަލާގައި ދައުވާ ނުކުރަން ޕީޖީން ވަނީ ނިންމައިފަ އެވެ. ފެނަކަ އާއި ސްޓެލްކޯއިން ވެސް ޑޮލަރު ގަތުމަށް ފައިސާ ދިނީ ޝަރޫ ލޯންޗް ކުންފުންޏަށެވެ.

ސްޓެލްކޯއަށް ފެނަކަ އިން ޑޮލަރު ގަތުމަށް ޝަރޫއަށް ދިން ފައިސާ އަނބުރާ އެ ދެ ކުންފުންޏަށް ދައްކަން ޝަރޫގެ މައްޗަށް ސިވިލް ކޯޓުން ކުރިން ވަނީ ހުކުމްކޮށްފަ އެވެ.