މަޝްރޫއުތަކުން ތިމާވެއްޓަށް ލިބޭ ގެއްލުންތަކަށް ސަމާލުކަން ދޭންޖެހޭ: ޑިފެންސް މިނިސްޓަރު

ތަރައްގީގެ މަޝްރޫއުތައް ހިންގާއިރު ތިމާވެއްޓަށް ލިބިދާނެ ގެއްލުންތަކަށް ސަމާލުކަންދޭންޖެހޭ ކަމަށް ޑިފެންސް މިނިސްޓަރު އާދަމް ޝަރީފު މިއަދު ވިދާޅުވެއްޖެ އެވެ.

އެކި ކާރިސާތަކާ ގުޅޭ ކަންކަން ބެލެހެއްޓުމުގެ ގައުމީ ބައްދަލުވުން ފެށުމުގެ ރަސްމިއްޔާތުގައި ވާހަކަ ދައްކަވަމުން ޑިފެންސް މިނިސްޓަރު އާދަމް ވިދާޅުވީ މި ސަަރުކާރުން ހަލުވި ސްޕީޑުގައި ތަރައްގީގެ ގިނަ މަޝްރޫއުތަކެއް ކުރިއަށް ގެންދާއިރު، ދެމެހެއްޓެނިވި ތަރައްގީ އާއި ގުދުރަތީ ކާދިސާތަކާ ގުޅޭ މިންވަރު ދެނެގަތުމަށް ޚާއްސަ ސަމާލުކަމެއް ދޭންޖެހޭ ކަމަށެވެ.

ބަނޑޮސް ރިސޯޓުގައި ބޭއްވި މި ރަސްމިއްޔާތުގައި އާދަމް ވިދާޅުވި ގޮތުގައި ތަރައްގީގެ މަޝްރޫއުތައް ކުރިއަށް ގެންދާއިރު ތިމާވެއްޓާއި އަދި ކާރިސާގެ ކޮންމެ ކަމަކުން ލިބިދާނެ ގެއްލުމަކަށް ވިސްނަންޖެހެ އެވެ.

"ތަރައްގީގެ މަޝްރޫއުތައް ކުރިއަށްގެންދާއިރު ރާއްޖޭގެ ނާޒުކު ތިމާވެއްޓާއި އަދި ކާރިސާގެ ކޮންމެ ކަމަކުން ލިބިދާނެ ގެއްލުންތަކަށް ދުރާލައި ވިސްނައި، ގެއްލުން ކުޑަ ކުރެވޭނެ ގޮތަކަށް މަސައްކަތް ރާވައި ހިންގުމަކީ އަޅުގަނޑުމެން ކޮންމެ މުއައްސަސާއަކުން ވެސް ވަރަށް ބޮޑަށް އިސްކަންދީ ސަމާލުކަންދޭންޖެހޭ ކަންތައްތައް،" މިނިސްޓަރު ވިދާޅުވި އެވެ.

ތަރައްގީގެ މަޝްރޫއުތަކުން ތިމާވެއްޓަށް ލިބޭ ގެއްލުންތަކަށް ސަމާލުކަން ދޭންޖެހޭ ކަމަށް އޭނާ ވިދާޅުވިއިރު، ހދ. ކުޅުދުއްފުށީގެ ކުޅި ހިއްކައިގެން އެ ރަށުގައި އެއާޕޯޓެއް އަޅަން ސަރުކާރުން ވަނީ ނިންމައިފަ އެވެ. އަދި އެކަމުގެ އަމަލީ މަސައްކަތްތައް ވެސް ފަށަން ތައްޔާރުވެފައިވާއިރު އަމިއްލަ ޖަމިއްޔާތަކާއި ތިމާވެއްޓަށް ލޯބިކުރާ ފަރާތްތަކުން ދަނީ އެކަމުގެ ކަންބޮޑުވުންތައް ފާޅުކުރަމުންނެވެ.

ކުޅުދުއްފުށީގެ ކުޅި ހިއްކައިގެން އެއާޕޯޓު އަޅައިފި ނަމަ، ވާރޭ ވެހިގެން އެ ރަށުގައި ފެންވޮޑުވުމުގެ ނުރައްކާ އެބަ އޮތް ކަމަށް، އެންވަޔަރްމަންޓް ޕްރޮޓެކްޝަން އެޖެންސީ (އީޕީއޭ) އިން ހެދި އީއައިއޭ ރިފޯޓުގައި ބުނެފައި ވެ އެވެ. އަދި ތިމާވެއްޓަށް ބޮޑެތި ނޭދެވޭ އަސަރުކުރާނެ ކަމަށް ބެލެވޭ ކަމަށް ވެސް ފާހަގަކޮށްފައި ވެ އެވެ.