ހާދިސާތަކުގައި ހާލުގައި ޖެހޭ މީހުންނަށް އިންޝުއަރަންސް ސްކީމެއް ތައާރަފުކޮށްފި

އަލިފާން ރޯވުމާއި ގުދުރަތީ އެކި ހާދިސާތަކުގެ ސަބަބުން ހާލުގައި ޖެހޭ މީހުންނަށް އެހީވުމަށް އަޔާދީ ތަކަފުލް އިން އިންޝުއަރަންސް ސްކީމެއް މިއަދު ތައާރަފްކޮށްފި އެވެ.

ޑިޒާސްޓާ މެނޭޖްމެންޓާއި އެލައިޑް އިންޝުއަރަންސްގެ އިސްލާމިކް ގޮފި، އަޔާދީ ތަކަފުލް ގުޅިގެން ތައާރަފް ކުރި މި ސްކީމްގެ ދަށުން، ގުދުރަތީ ހާދިސާއެއް ދިމާވެގެން ނުވަތަ އަލިފާން ރޯވެ ހާލުގައި ޖެހިއްޖެ ނަމަ، ތިން މަސް ވަންދެން ދިރިއުޅޭނެ ހިޔާވައްސެއް ހަމަޖައްސައިދޭނެ އެވެ.

ޗަމްޕާ ސެންޓްރަލް ހޮޓެލްގައި މިއަދު ބޭއްވި ރަސްމިއްޔާތެއްގައި މި ސްކީމުގެ އެއްބަސްވުމުގައި އަޔާދީ ތަކަފުލްއިން ސޮއިކުރެއްވީ އެލައިޑް އިންޝުއަރެންސްގެ ޑެޕިއުޓީ މެނޭޖިން ޑިރެކްޓަރު މުހައްމަދު ޝަފާޒެވެ. ޑިޒާސްޓާ މެނޭޖްމެންޓުން ސޮއި ކުރެއްވީ ޑިފެންސް މިނިސްޓްރީގެ ޑެޕިއުޓީ މިނިސްޓަރު ފާތުމަތު ތަސްނީމެވެ.

މި ރަސްމިއްޔާތުގައި ޑިފެންސް މިނިސްޓަރު އާދަމް ޝަރީފް އުމަރު ވެސް ބައިވެރިވެވަޑައިގަތެވެ.

އަޔާދީ ތަކަފުލްއިން ބުނީ މިހާރަކަށް އައިސް ގުދުރަތީ ކާރިސާތަކާއި އަލިފާނުގެ ހާދިސާތައް ގިނައިން ހިނގާއިރު، ލިބޭ ގެއްލުން މި ސްކީމްގެ ސަބަބުން ކުޑަ ކުރެވޭނެ ކަމަށެވެ. އަދި މިއީ ގޭގެ މުދަލާއި ވިޔަފާރި އަށް ލިބޭ ގެއްލުން ކަވަރު ކުރާ ސްކީމެކެވެ.

މި ސްކީމް ތިން ކެޓަގަރީއަކަށް ބަހާލާފައިވާއިރު، އޭގެ ތެރޭގައި ހިމެނެނީ ގޭގެ ވެރިފަރާތާއި ގޭގައި ކުއްޔަށް އުޅޭ މީހުންނާއި ކުދި އަދި މެދު ވިޔަފާރިތަކެވެ. މި އިން ކޮންމެ ކެޓަގަރީއެއްގައި ވެސް އަގު ކަނޑައަޅާނީ އެ އިމާރާތަކާއި އެތަނުގައި ހުރި މުދަލަށް ބެލުމަށް ފަހުގަ އެވެ.

ސްކީމުގެ ދަށުން ކޮންމެ އަހަރަކު ވެސް ދައްކަން ޖެހޭނީ އިމާރާތާއި އެތަނުގައި ހުރި މުދަލުގެ އަގުގެ 0.18 ޕަސެންޓެވެ. މިސާލަކަށް އެއީ އެއް މިލިޔަން ރުފިޔާގެ އިމާރާތެއް ނަމަ އެތަނުން ދައްކަން ޖެހޭނީ އަހަރަކު 1،800 ރުފިޔާ އެވެ.

މިއަދުގެ ރަސްމިއްޔާތުގައި ވާހަކަ ދައްކަވަމުން ޑިފެންސް މިނިސްޓަރު އާދަމް ޝަރީފް ވިދާޅުވީ ގޯތިގެދޮރާއި އިމާރާތްތައް، އިންޝުއަ ކޮށްފައި ބެހެއްޓުމަކީ މުހިއްމު ކަމެއް ކަމަށެވެ.

"މިގޮތަށް އިންޝުއަ ކުރުމުން އަހަރަކު ދައްކަން މިޖެހެނީ މަދު ފައިސާ ކޮޅެއް. އެކަމަކު މިއީ ކުއްލި އަކަށް ދިމާވާ ހާދިސާއަކުން ލިބޭ ގެއްލުމުން އަރައިގަނެވޭނެ ކަމެއް،" އާދަމް ވިދާޅުވި އެވެ.

މިނިސްޓަރު ވިދާޅުވި ގޮތުގައި ރާއްޖޭގައި މި ފަދަ ހާދިސާތައް ގިނައިން ހިނގާއިރު، ވަސީލަތްތައް މަދު ނަމަވެސް ޑިޒާސްޓާ މެނޭޖްމެންޓުން ފޯރުކޮށްދެނީ ނަމޫނާ ހިދުމަތެކެވެ.