ހުޅުލެ-ހުޅުމާލެ ލިންކް ރޯޑު ހިއްކުމުގެ މަސައްކަތް މި ހަފުތާގައި ނިމޭނެ: އެޗްޑީސީ

މާލޭ/ހުޅުލޭ ބްރިޖާ އެކު ހުޅުމާލެ ގުޅުވައިދޭ ލިންކް ރޯޑަށް ބޭނުންވާ ބިން ހިއްކުމުގެ މަސައްކަތް މި ހަފުތާގައި ނިމޭނެ ކަމަށް އެޗްޑީސީން މިއަދު ބުނެފި އެވެ.

ޗައިނާގެ ހުނާން އިންޖިނިއަރިންއާ ހަވާލުކޮށްގެން ކުރިޔަށްގެންދާ މަޝްރޫއުގެ ދަށުން ހުޅުލޭ ތެރެއިން ހުޅުމާލެ އަށް ދަތުރުކުރަން އަލަށް ހަދާ މަގު ފުޅާކުރަން ގާތްގަނޑަކަށް ހަ ހެކްޓަރުގެ ބިން ހިއްކަން ޖެހެ އެވެ.

އެޗްޑީސީގެ މެނޭޖިން ޑިރެކްޓަރު މުހައްމަދު ސައިމަން ވިދާޅުވީ އެ މަގަށް ބޭނުންވާ ބިން ހިއްކުމުގެ މަސައްކަތް މި ހަފުތާ ތެރޭގައި ނިންމައި، ތޮށިލުމުގެ މަސައްކަތް ވެސް ވަރަށް އަވަހަށް ފަށާނެ ކަމަށެވެ.

"މި މަގު ހަދާއިރު މިހާރު ބޭނުންކުރާ މަގު ކޮނުމަށް ފަހު ސީ ޕްލޭން ޖެއްސުމަށް ވޯޓާ ރަންވޭ ފުޅާކުރެވޭނެ. އޭރުން ހުޅުމާލެ މައްޗަށް ނާރާ ފަރުމަތިން ގޮސް ސީޕްލޭން ޖެއްސޭނެ،" އޭނާ ވިދާޅުވި އެވެ.

ސައިމަން ވިދާޅުވީ އެ ކުންފުނިން މަސައްކަތްކުރަނީ މާލެ އާއި ހުޅުލެ ގުޅުވައިދޭ ބްރިޖްގެ މަސައްކަތް ނިމެންވާ އިރަށް އެ މަގުގެ މަސައްކަތް ވެސް ނިންމާލުމަށް ކަމަށެވެ.

އެޗްޑީސީން ބުނި ގޮތުގައި ބައިނަލްއަގުވާމީ ފެންވަރަށް ތަރައްގީކުރާ ހަތަރު ކިލޯ މީޓަރުގެ މަގުގައި ވެހިކަލް ދަތުރުކުރަން ހަތަރު ލޭން އޮންނާނެ ކަމަށެވެ.

ބްރިޖާ ގުޅުވައިގެން ހުޅުލެއިން ފެށިގެން ހަދާ ލިންކް ރޯޑް ޑިޒައިންކޮށް ތަރައްގީކުރަން ހުނާން އިންޖިނިއަރިންއާ ހަވާލުކުރީ 24 މިލިއަން ޑޮލަރު (370 މިލިއަން ރުފިޔާ) އަށެވެ.

މާލޭގެ ލޮނުޒިޔާރަތްކޮޅުން ފެށޭ ބްރިޖް ހުޅުލެއާ ގުޅުވާލަނީ އެއާޕޯޓުގެ ރަންވޭގެ ދެކުނު ކޮޅާ ދިމާލުންނެވެ. ހުޅުލެ އާއި ހުޅުމާލެއާ ދެމެދު ދަތުރުކުރަން މިހާރު ބޭނުންކުރާ މަގު ވެސް އޮންނަނީ ރަންވޭގެ ދެކުނު ކޮޅުން ގޮސް، ހުޅުލޭގެ އިރުމަތީ ފަރާތުގަ އެވެ.