ބްރިޖާ ހެދި ހުޅުމާލެއަށް ބާރު ބޮޑެއް ނުވާނެ: އެޗްޑީސީ

މާލެ އާއި ހުޅުލެއާ ދެމެދު އަޅާފައިވާ ބްރިޖުން ދަތުރުކޮށްފައި ހުޅުމާލެ އަށް ދާ ވެހިކަލްތަކުން އެ އަވަށް ތޮއްޖެހުމުގެ ފުރުސަތެއް ނެތް ކަމަށް އެޗްޑީސީން އިއްޔެ ބުނެފި އެވެ.

ބްރިޖުގައި މިހާރު ކުރަމުން އަންނަނީ ތާރުއަޅައި، ލައިޓް ހަރުކުރުމުގެ މަސައްކަތެވެ. ބްރިޖުގައި ވެހިކަލްތަކަށް ޖުމްލަ ހަތަރު ލޭން އޮންނާނެ އެވެ. އެއީ ހުޅުލޭ ކޮޅަށް ޚާއްސަ ދެ ލޭނާއި މާލޭ ކޮޅަށް ދެ ލޭނެވެ. އޭގެ އިތުރުން، ދެ ފަރާތުން ބައިސްކަލް ދުއްވޭވަރުގެ ލޭނެއް ވަނީ ހަދައިފަ އެވެ. ބްރިޖުން ދަތުރުކުރާ ވެހިކަލްތަކުން ފީއެއް ނުވަތަ ޓޯލްއެއް ބެހެއްޓުމަށް އޮޓަމެޓިކް ޓޯލް ސިސްޓަމެއް ގާއިމުކުރާނެ އެވެ.

މީގެއިތުރުން، މާލެ-ހުޅުލެ ބްރިޖުގެ ދަތުރުތަކަށް ތާރު އަޅައިގެން ހަދާ މަގުތަކުގެ މަސައްކަތް، ބްރިޖް ހުޅުވެން ވާއިރަށް ނިންމަން ސަރުކާރުން އަންނަނީ މަސައްކަތް ކުރަމުންނެވެ. ބްރިޖުގެ އެންމެ ފަހު މަރުހަލާގެ މަސައްކަތްތައް ކުރިއަށް ދާއިރު، އަމާޒަކީ މި މަހުގެ ފަހުކޮޅު ނުވަތަ އަންނަ މަހުގެ ކުރީކޮޅު ބްރިޖް ހުޅުވުމެވެ.

ހުޅުމާލޭގައި ހިނގަމުން އަންނަ ތަރައްގީގެ މަޝްރޫއުތަކާއި ކުރިއަށް ހުރި މަޝްރޫއުތަކުގެ މައުލޫމާތު ހިއްސާ ކުރުމަށް ފެހިވެނި ކޮމިއުނިޓީ ސެންޓަރުގައި ބޭއްވި ސެޝަންގައި އެޗްޑީސީގެ އާބަން ޑިޒައިނާ އަހުމަދު ޝާހިދު ވިދާޅުވީ ބްރިޖު އާންމުންނަށް ހުޅުވުމާއެކު، މާލެ އިން ދާ ހުރިހާ ވެހިކަލަކަށް ހުޅުމާލެ އެރޭނެ ކަމަށެވެ.

ހުޅުމާލެ ތަރައްގީ ކުރުމުގެ ބޭނުމަކީ މާލެ އަށް ދިމާވެފައި އޮތް ތޮއްޖެހުމުގެ މައްސަލަ ހައްލުކޮށް ދިނުން ކަމަށް ޝާހިދު ވިދާޅުވި އެވެ. އޭނާ ވިދާޅުވި ގޮތުގައި، ހުޅުމާލޭގެ ބޮޑެތި ހުރިހާ މަގުތަކެއް ތަރައްގީ ކުރަމުން ދަނީ ވެހިކަލްތައް ތޮއްނުޖެހޭ ގޮތަށް ވަރަށް މަގުތައް ފުޅާކޮށްގެންނެވެ.

"މާނައަކީ ކިތަންމެ ބައިވަރު ވެހިކަލެއް އެރި ނަމަވެސް، ހުއްޓުމެއް ނެތި (ވެހިކަލްތަކަށް) ދެވޭނެ. ކިތަންމެ ބައިވަރު ވެހިކަލެއް އަޔަސް، ތޮއްޖެހުމެއް ނާންނާނެ،" ޝާހިދު ވިދާޅުވި އެވެ.

އެޗްޑީސީން ބުނި ގޮތުގައި މާލެއަށް ޓްރެފިކް މައްސަލަ ދިމާވަނީ، އެއް ވެހިކަލް މަގުގައި މަޑު ކުރީމަ، ދެން ފަހަތުން އަންނަ ވެހިކަލްތައް ހުއްޓޭތީ އެވެ. އެކަމަކު، ހުޅުމާލޭގައި ޑިޒައިންކޮށްފައި ހުރީ އެއް ވެހިކަލެއް އެއް ފަރާތަކަށް ޖެހުނީމަ، ދެން ހުރި ވެހިކަލްތަކަށް ދެވޭ ގޮތަށް ކަމަށް އެ ކުންފުނިން ބުންޏެވެ.

ނަމަވެސް، އެޗްޑީސީން ބުނީ ހުޅުމާލޭގައި ޕާކް ކުރުމުގައި ދަތިތަކެއް ދިމާވުމަކީ އެކަށީގެންވާ ކަމެއް ކަމަށެވެ. އެކަމަށް ހައްލު ގެނައުމުގެ ގޮތުން ވާޓިކަލް ޕާކިން ސިސްޓަމްތަކެއް ގާއިމުކުރަން މަސައްކަތް ކުރަމުން އަންނަ ކަމަށާއި އެ މަސައްކަތް ވަރަށް އަވަހަށް ނިމޭނެ ކަމަށް އެ ކުންފުނިން ބުންޏެވެ.

ޝާހިދު ވިދާޅުވި ގޮތުގައި ހުޅުމާލޭގެ މާސްޓަ ޕްލޭން ހަދާފައި ވަނީ ސިންގަޕޫރުގެ ކޮންސަލްޓޭޝަން ޓީމަކާއި އާބަން ޑިވެލޮޕްމަންޓް ޓީމެއް ގުޅިގެންނެވެ. ބްރިޖާއެކު، ދަތުރުފަތުރުގެ ނިޒާމަށް ބޮޑެތި ބަދަލުތަކެއް އަންނާނެ ކަމަށާއި އާންމު ދަތުރުފަތުރުގެ ނިޒާމު އިތުރަށް ފުޅާ ވާނެ ކަމަށް އޭނާ ވިދާޅުވި އެވެ.

"އޭރުން ކޮންމެ ކޮންމެ މީހަކު ނުޖެހޭނެ ސައިކަލެއް، ކާރެއް ގަންނާކަށް. އެހެން ސިޓީތަކަށްވުރެ، ރައްކާތެރިވާނެ،" ހުޅުމާލެ ތަރައްގީ ކުރުމުގެ މަސައްކަތް ކުރަނީ ދުނިޔޭގެ ފެންވަރުގެ ސިޓީތައް ތަރައްގީ ކުރާ ފެންވަރަށް ކަން ފާހަގަ ކުރައްވައި ޝާހިދު ވިދާޅުވި އެވެ.

ތަރައްގީގެ ބޮޑެތި މަޝްރޫއުތަކެއް ހިނގަމުން އަންނަ ހުޅުމާލޭގައި ޔޮޓް މެރީނާ އާއި ކްރޫޒް ޓާމިނަލަކާއި ވޯޓާ ތީމް ޕާކަކާއި ޓެކްނޮލަޖީ ޕާކަކީ އަންނަ ހުރި ބޮޑެތި މަޝްރޫއުތަކެވެ. ހުޅުމާލޭގައި ކުރިއަށް ގެންދާ މަޝްރޫއުތަކުން ބޮޑެތި ފުރުސަތުތަކެއް އެކި ސިނާއަތްތަކަށް ލިބޭނެ ކަމަށް އެޗްޑީސީން ބުނެ އެވެ. އެގޮތުން، މި މަޝްރޫއުތަކުން އެކަނި ވެސް، 90،000 އަށްވުރެ ގިނަ ވަޒީފާ އުފެދޭނެ ކަމަށް އެޗްޑީސީން ލަފާކުރެ އެވެ.