ޓެރަރިޒަމާ ގުޅުން ހުރި އޮޕަރޭޝަނެއްގައި މެލޭޝިއާ އިން 400 މީހުން ހައްޔަރުކޮށްފި

ކުއާލަ ލަމްޕޫރު (އޮގަސްޓް 8) - ޓެރަރިޒަމާ ދެކޮޅަށް މެލޭޝިއާގައި ހިންގި އޮޕަރޭޝަނެއްގައި 400 އަށް ވުރެ ގިނަ މީހުން ހައްޔަރުކޮށްފައިވާ ކަމަށް އޮފިޝަލުން ބުނެފި އެވެ.

ވެރިރަށް ކުއާލަ ލަމްޕޫރުގައި ހިންގި އޮޕަރޭޝަނުން އަތުލައިގަތް ގިނަ މީހުންނަކީ ބަންގްލަދޭޝް، އިންޑިއާ އަދި ޕާކިސްތާނަށް ނިސްބަތްވާ މީހުންނެވެ. އަތުލައިގަތް މީހުންގެ އަތުން ވަނީ ފޭކް ޕާސްޕޯޓާއި އިމިގްރޭޝަނުގެ ވަގު ލިޔުންތައް އުފައްދަން ބޭނުންކުރާ މެޝިންތައް ފެނިފަ އެވެ.

ޓެރަރިސްޓުން ކަމަށް ބެލެވޭ މީހުން ހޯދުމަށް މެލޭޝިއާ ފުލުހުން އޮޕަރޭޝަނެއް ހިންގި އިރު މި މަހު 19-30 އަށް ކުއާލަ ލަމްޕޫރުގައި ބާއްވާ ސައުތު އީސްޓް އޭޝިއަން ގޭމްސް އަށް ވެރިރަށުގައި ވަނީ ސަލާމަތީ ފިޔަވަޅުތައް ވަރަށް ބޮޑަށް ވަރުގަދަކޮށްފަ އެވެ. ފުލުހުން އިއްޔެ ހިންގި އޮޕަރޭޝަނުގައި ވަނީ ބައެއް އިމާރާތްތަކުގެ ދޮރު ވައްޓާލައިގެން ވަދެ ބިޑި އަޅުވައިގެން މީހުން ނެރެ ބަސްތަކަށް އަރުވައިގެން ގެންގޮސްފަ އެވެ. ޕޮލިސް ސްޓޭޝަނަށް އެ މީހުން ގެންދިޔައީ ސުވާލުކޮށް ސްކްރީން ކުރުމަށެވެ.

ފުލުހުން ބުނީ ސައްހަ ޓްރޭވަލް ޑޮކިއުމެންޓެއް ނެތް އަދި އެފަދަ ލިޔުމެއް ގެއްލިފައިވާ ކަމަށް ބުނާ މީހުން ވެސް ހައްޔަރު ކުރާނެ ކަމަށެވެ. އަދި ސީރިއާ އާއި އިރާގުގައިވާ ޓެރަރިސްޓް ޖަމާއަތްތަކާ ގުޅުން އޮންނަ ކަމަށް ޝައްކު ކުރެވޭ މީހުން ވެސް ހައްޔަރު ކުރާނެ ކަމަށް ބުނެފައިވެ އެވެ.

ފުލުހުންގެ ކައުންޓަ-ޓެރަރިޒަމް އޮފިޝަލެއް ކަމަށްވާ އައްޔޫބު ޚާން މައިދިން ޕިޗޭ ވިދާޅުވީ ޓެރަރިސްޓުންނާ ގުޅުން އޮންނަ ކަމަށް ބެލެވޭ ބިދޭސީ ކޮންމެ މީހަކު ހައްޔަރު ކުރާނެ ކަމަށެވެ. ފުލުހުން އިއްޔެ ތިބީ ރޭޑިއޯއެކްޓިކް މެޓީރިއަލް ހޯދޭނެ ގޮތަށް ތައްޔާރުވެފަ އެވެ. ނަމަވެސް އިއްޔެގެ އޮޕަރޭޝަނުގައި އެފަދަ އެއްޗެއް އަތުލައިގެންފައެއް ނުވެ އެވެ.