ސައުދީގެ އެހީގައި މެލޭޝިއާގައި ހުޅުވި އެންޓި-ޓެރަރިޒަމް ސެންޓަރު ބަންދުކޮށްފި

ކުއާލަ ލަމްޕޫރު (އޮގަސްޓް 8) - ސައުދީ އަރަބިއާގެ އެހީގައި މެލޭޝިއާގައި ހުޅުވި އެންޓި-ޓެރަރިޒަމް ސެންޓަރު ވަގުތުން ބަންދު ކުރަން އާ ސަރުކާރުން އަންގައިފި އެވެ.

ކުއާލަ ލަމްޕޫރުގައި ހުޅުވި ކިންގް ސަލްމާން ސެންޓަ ފޯ އިންޓަނޭޝަނަލް ޕީސް ބަންދުކުރީ އެތަން ހުޅުވިތާ އަހަރެއްހާ ދުވަސް ފަހުންނެވެ. އެ ސެންޓަރު ބަންދުކުރި ވަކި ސަބަބެއް ހާމަކޮށްފައެއް ނުވެ އެވެ. މެލޭޝިއާގެ ޑިފެންސް މިނިސްޓަރު މުހައްމަދު ސަބޫ ވިދާޅުވީ އެ ސެންޓަރުން ކުރަމުން ދިޔަ މަސައްކަތް މެލޭޝިއަން އިންސްޓްޓިއުޓް އޮފް ޑިފެންސް އެންޑް ސެކިއުރިޓީ އަށް ބަދަލުކޮށްފައިވާ ކަމަަށެވެ.

ސެންޓަރު ހުޅުވި އިރު މެލޭޝިއާގެ ކުރީގެ ޑިފެންސް މިނިސްޓަރު ހިޝާމުއްދީން ހުސައިން ވިދާޅުވެފައި ވަނީ އެއީ ހަރުކަށި ފިކުރާއި އިސްލާމިކް ސްޓޭޓް (އައިއެސް) ފަދަ ހަނގުރާމަވެރި ޖަމާއަތްތަކުގެ ހަރަކާތްތައް ހުއްޓުވަން މުހިންމު ސެންޓަރަކަށް ވާނެ ކަމަށެވެ.

މިދިޔަ އަހަރުގެ މާޗް މަހު އެ ތަން ހުޅުވައިދެއްވީ ސައުދީ ރަސްގެފާން ސަލްމާން ބިން އަބްދުލް އަޒީޒެވެ. ކުއާލަ ލަމްޕޫރުގައި ވަގުތީ އޮފީހެއް ހުރި ނަމަވެސް ފަހުން ވަނީ ޕުތުރާޖާގައި ދާއިމީ އޮފީހެއް ހަދަން ނިންމައިފަ އެވެ.

މެލޭޝިއާ އިން މިހާރު ވަނީ ސައުދީގައި ތިބި މެލޭޝިއާ ސިފައިން އަނބުރާ ގެންނަން ވެސް ނިންމައިފަ އެވެ. މެލޭޝިއާ ސިފައިން ސައުދީ އަށް ފޮނުވީ ކުރީގެ ބޮޑު ވަޒީރު ނަޖީބު ރައްޒާގުގެ ވެރިކަމުގައި 2015 ވަނަ އަހަރު އެވެ.

ނަޖީބުގެ ވެރިކަމުގައި ސައުދީން ވަނީ މެލޭޝިއާގައި ބާރުގަދަކޮށްފަ އެވެ. މެލޭޝިއާގައި ގިނަ އަދަދެއްގެ ސްކޫލްތަކާއި މިސްކިތްތައް ހަދައިދީ މެލޭޝިއާގެ ގިނަ އަދަދެއްގެ ކުދިންނަށް ސައުދީން ސްކޮލަޝިޕް ވަނީ ދީފަ އެވެ.