ޖަރުމަނުގައި ހަމަލާދިނީ އިސްލާމް ދީން ދޫކޮށް އެ ގައުމުން ސިޔާސީ ހިމާޔަތް ހޯދައިގެން އުޅޭ ސައޫދީ މީހެއް

ޖަރުމަނުގައި އޮންނަ މަޝްހޫރު ކްރިސްމަސް މާކެޓެއްގައި މީހުން ފުރި ބާރުވެފައި ވަނިކޮށް ކާރެއްގައި އެތަނުގެ ތެރެއަށް ވަދެ މީހުންގެ ގައިގައި ޖައްސައި ހަމަލާދިން މީހާ އަކީ މީގެ ވިއްސަކަށް އަހަރު ކުރިން އިސްލާމް ދީން ދޫކޮށް ޖަރުމަށް ދިއުމުން އެ ގައުމުން ސިޔާސީ ހިމާޔަތް ދީފައި ހުރި މީހެއްކަން ހާމަވެއްޖެ އެވެ.

މިހާތަނަށް ފަސް މީހަކު މަރުވެ 200 އަށް ވުރެ ގިނަ މީހުން އޭނާގެ ހަމަލާގެ ސަބަބުން ވަނީ ޒަހަމްވެފަ އެވެ.

ކަޅުކުލައިގެ ބީއެމްޑަބްލިޔުއެއްގައި ގޮސް މީހުންގެ ތެރެއަށް ވަދެގަތް މީހާގެ ތާލިބަކީ އުމުރުން 50 އަހަރުގެ ޑޮކްޓަރެކެވެ. އޭނާ އަކީ ސައިކޭޓްރީ އަދި ސައިކޮތެރަޕީ އަށް ހާއްސަ މީހެކެވެ.

ތާލިބްގެ އެކްސް އެކައުންޓުގައި އިސްލާމް ދީނާ ދެކޮޅު ޕޯސްޓުތައް ގިނަ އެވެ. އަދި އިސްލާމް ދީން ގޯސްކޮށް ދައްކާފައިވާ ވާހަކަތާއި މުރުތައްދުވާ މީހުންނަށް މަރުހަބާ ކިޔާފައި ހުންނަ ޕޯސްޓުތައް ވެސް ވަރަށް ގިނަ އެވެ.

ސައޫދީން ޓެރަރިޒަމްގެ ތުހުމަތާއި ޔޫރަޕަށް ސައޫދީ އަންހެނުން ވަގަށް ފޮނުވާ ކަމުގެ ތުހުމަތުގައި ހައްޔަރުކުރަން ވެސް ބޭނުންވެފައިވާ ތާލިބު ޖަރުމަނުން ހިމާޔަތް ހޯދައިގެން ހުރުމުން އެ ގައުމުން ވަނީ ސައޫދީއާ އޭނާ ހަވާލުކުރަން މީގެ ކުރިން އިންކާރުކޮށްފައި ކަމަށް ރިޕޯޓްތައް ބުނެ އެވެ.

ތާލިބް ދައްކާފައިވާ ވާހަކަތަކަށް ބަލާއިރު އޭނާ ހުރީ "ޔޫރަޕްގައި އިސްލާމް ދީން ފެތުރުން ހުއްޓުވަން ޖަރުމަނުން އެކަށީގެންވާ މަސައްކަތް ނުކުރާތީ" އެކަމާ ވަރަށް ބޮޑަށް ނުރުހިފަ އެވެ. އަދި ޖަރުމަނުގެ ކަނާތުފިޔައިގެ ހަރުކަށި އަދި އެ ގައުމަށް މީހުން ހިޖުރަކުރުމާ ދެކޮޅު އޯލްޓަނޭޓިވް ފޯ ޖާމަނީ (އޭއެފްޑީ) ޕާޓީ އަށް ވެސް ވަރަށް ބޮޑަށް ތާއީދުކުރެ އެވެ.

މީގެ ކުރިން ބީބީސީ ފަދަ ބޮޑެތި ބައެއް މީޑިއާތަކުން ތާލިބުގެ އިންޓަވިއުތައް ވެސް ގެނެސްދީފައިވެ އެވެ. އޭނާ އަކީ އިސްލާމް ދީން ދޫކޮށްލާ މީހުންނަށް ފަސޭހައިން ހިމާޔަތް ލިބޭނެ މަގު ތަނަވަސްކޮށްދޭ މީހެއްގެ ގޮތުގައި އަމިއްލަށް ޕްރޮމޯޓްވެ އިންޓަވިއުތަކުގައި ވާހަކަ ދައްކާފައިވެ އެވެ.

ޖަރުމަނުގެ ކައުންޓަ ޓެރަރިޒަމް އެކްސްޕާޓުންގެ ބައެއް މީހުން ބުނެފައިވަނީ މިފަދަ ޕްރޮފައިލެއްގެ މީހަކު މިކަހަލަ ހަމަލާއެއް ދީގެން މީގެ ކުރިން ތަހުގީގުކުރަން ޖެހިފައި ނުވާ ކަމަށެވެ. އެހެންވެ ހަމަލާ ދިން ސަބަބަކީ ކޮބައިކަން ބުނަން އަދި ވަރަށް ދަތި ކަމަށް ވެސް އެ މީހުން ބުނެ އެވެ.