ޖަރުމަނުގައި ހަމަލާދިން މީހާ ހަވާލުކުރަން ސައޫދީން އެތައް ފަހަރަކު އެދުނު

ޖަރުމަނުގައި މީހުންތަކެއްގެ ތެރެއަށް ކާރެއްގައި ވަދެގަނެގެން ހަމަލާދިން ސައޫދީ އަރަބިއްޔާގެ މީހާ އަކީ ނުރައްކާތެރި މީހެއް ކަމަށާއި އޭނާ އަނބުރާ ގައުމަށް ފޮނުވައިދޭން ސައޫދީން އެތައް ފަހަރަކު ޖަރުމަނު ސަރުކާރުގައި އެދުނު ކަމަށް އެކަމުގެ މައުލޫމާތު އެނގޭ މީހަކު އޭއެފްޕީ އަށް ކިޔައިދީފި އެވެ.

ފަސް މީހަކު މަރުވެ އެތައް ބަޔަކު ޒަހަމްވި ހަމަލާ ދިން މީހާއާ ބެހޭ މައުލޫމާތު އެނގޭ، ސައޫދީ ސަރުކާރާ ގުޅުން އޮންނަ މީހަކު ކިޔައިދިން ގޮތުގައި ޖަރުމަނުން ހިމާޔަތް ހޯދައިގެން އުޅުނު ތާލިބް ޖަވާދު އަލް އަބްދުލްމުހްސިން، 50، އަކީ ނުރައްކަލަކަށް ވެދާނެ ކަމަށް ސައޫދީން ކުރިން ވެސް އޮތީ ޖަރުމަނަށް އަންގައިފަ އެވެ.

އެކަމަކު އޭނާ ނުރައްކާވަނީ ކިހިނެއް ކަމެއް، އޭއެފްޕީއާ ވާހަކަ ދެއްކި މީހާ ނުބުނެ އެވެ.

ނަފްސާނީ ބަލިތަކަށް ހާއްސަ ޑޮކްޓަރެއް ކަމަށްވާ ޖަވާދު އަކީ އިސްލާމް ދީން ދޫކޮށްލުމަށް ފަހު 2006 ވަނަ އަހަރު ޖަރުމަނަށް ގޮސް އެ ގައުމުގެ ސިޔާސީ ހިމާޔަތް ހޯދި މީހެކެވެ. އޭނާ އަށް ޖަރުމަނުން ރެފިއުޖީ ސްޓެޓަސް ދިނީ އެ ގައުމަށް ދިޔަތާ 10 އަހަރު ފަހުންނެވެ.

އިސްލާމް ދީނާ ދެކޮޅަށް ސޯޝަލް މީޑިއާގައި އެތައް ވާހަކައެއް ދައްކަމުން ދިޔަ މި މިހާ އަކީ ސައޫދީގައި މުރުތައްދުވާ މީހުން އަދި ހާއްސަކޮށް އަންހެނުން އެ ގައުމުން ސިއްރިއްޔާތުގައި ނެރެ، ޔޫރަޕްގެ ގައުމުތަކަށް ގެންދަން އެހީވާ މީހެކެވެ. އޭނާގެ މި މަސައްކަތް މޮޅު ކަމެއްގެ ގޮތުގައި ދައްކަައި ބީބީސީ އާއި ނުފޫޒު ގަދަ އެކި މީޑިއާތަކުން އިންޓަވިއުތައް ވެސް މީގެ ކުރިން ގެނެސްދީފައިވެ އެވެ.