ޔުމްނުގެ އެންމެ ނާޒުކު ސާޖަރީ ކާމިޔާބު: އާއިލާ

އިމާރާތެއްގެ ނުވަ ވަނަ ފްލޯ އިން ވެއްޓި މި މަހުގެ 18 ވަނަ ދުވަހު ބޮޑެތި އަނިޔާތަކެއްވި އުމުރުން 21 އަހަރުގެ ހައްވާ ޔުމްނު ރަޝީދުގެ އެންމެ ނާޒުކް އަދި އެންމެ އުނދަގޫ ސާޖަރީ މިއަދު ކޮށްފައިވާ ކަމަށާއި އެ ސާޖަރީ ކާމިޔާބު ކަމަށް ޑޮކްޓަރުންނާ ހަވާލާދީ އޭނާގެ އާއިލާ އިން ބުނެފި އެވެ.

ގ. ރަނައުރާގޭއާގޭ ޔުމްނު އަށް އިތުރު ފަރުވާ ދިނުމަށް މެލޭޝިއާ އަށް ފުރުވައިލީ މިދިޔަ ހޮނިހިރު ދުވަހުގެ ރޭގަ އެވެ.

އޭގެ ފަހުން ޔުމްނުގެ އެންމެ ނާޒުކު ސާޖަރީ މިއަދު ކޮށްފައިވާއިރު އެ ސާޖަރީއަށް ފަސް ގަޑިއިރަށް ވުރެ އިތުރަށް ހޭދަވި ކަމަށް އާއިލާ އިން ބުންޏެވެ. މި އޮޕަރޭޝަން ކުރަން ޖެހުނީ ޔުމްނުގެ ކަރާ ދިމާލުން މައިބަދައިގެ ކަށިގަނޑުގައި ރެނދެެއް ލާފައި ވާތީ އެވެ.

އާއިލާ އިން ބުނިގޮތުގައި، މިއީ އުމްނުގެ އެންމެ ނާޒުކު އަދި އެންމެ ނުރައްކާތެރި ސާޖަރީ އެވެ. އެކަމަކު، އެ ސާޖަރީގެ ކަންކަން ފުރިހަމަކުރީ ވަރަށް އޮމާންކަމާ އެކު ކަމަށް އާއިލާ އިން ބުންޏެވެ.

ޔުމްނު އަށް ލިބިފައިވާ އަނިޔާތަކާ ގުޅިގެން އިތުރު ސާޖަރީތައް އަދި ކުރަން ޖެހޭއިރު، އެ ސާޖަރީތައް މައްސަލައެއް ނެތި ކުރިއަށް ގެންދެވިއްޖެ ނަމަ އޭނާ އަށް އިށީނދެ އިނދެވޭނެ ކަމަށް އާއިލާ އިން ބުންޏެވެ.

ޔުމްނުގެ އާއިލާ އިން އެދުނީ އެންމެންގެ ހެޔޮ ދުއާ އާއި ލޯތްބަށެވެ.

މި މަހުގެ 18 ވަނަ ދުވަހުގެ ރޭ ހ. ފެންޓޯނިއާގެއިން ހ. މިޓާޒްގޭގެ ފުރާޅު މައްޗަށް ޔުމްނު ވެއްޓިފައި އޮއްވައި ފެނުނީ އެ ދުވަހު ހެނދުނު އެވެ. އެ ހާދިސާގައި ލިބުނު އަނިޔާތަކާ ގުޅިގެން ޔުމްނުއަށް ފަރުވާ ދެމުން އައީ އައިޖީއެމްއެޗުގެ އައިސީޔޫގަ އެވެ.

ދަތުރު ކުރުމުގެ ހުއްދަ ލިބުމުން ޔުމްނުގެ އާއިލާ އިން އޭނާ މެލޭޝިއާ އަށް ގެންދިޔައީ އެ އާއިލާގެ ބައެއް މީހުން ވެސް އެ ގައުމުގައި ދިރިއުޅެމުން އަންނާތީ އެވެ. ޔުމްނުގެ ފަރުވާއަށް ހިނގާނެ ހުރިހާ ހަރަދެއް ހަމަޖައްސައިދޭނެ ކަމަށް ސަރުކާރުން ކުރިން ބުނެފައިވާއިރު، އޭނާ މެލޭޝިއާ އަށް ގެންދަން ބޭނުންވާ 25،000 ޑޮލަރު (385،500ރ.) އެންސްޕާ މެދުވެރިކޮށް ސަރުކާރުން ހަމަޖައްސައިދިނެވެ. އޭގެ ތެރޭގައި ހިމެނެނީ 12 ސީޓުގެ ފައިސާ އެވެ.

ޓިކްޓޮކްގައި މިދިޔަ ހޮނިހިރު ދުވަހު ކުރިއަށް ގެންދިޔަ ލައިވް އިވެންޓެއްގައި އެކަނިވެސް ހަތް ލައްކަ އަށް ވުރެ ގިނަ ރުފިޔާ ޔުމްނުގެ ފަރުވާ އަށް ވަނީ ހޯދައިފަ އެވެ

ހާދިސާ ހިނގުމުގެ ކުރިން ޔުމްނުއާ އެކު އެންމެ ފަހުން އުޅުނު ގ. އެރިޔަދޫ، ރައުދު އަހްމަދު ޒިލާލް ހައްޔަރުކޮށް، އޭނާގެ ބަންދަށް ވަނީ ފަސް ދުވަސް ޖަހައިފަ އެވެ. ބަންދުގެ މުއްދަތު މިއަދު ހަމަވާނެ އެވެ.

ފުރާޅުމައްޗަށް ޔުމްނު ވެއްޓުނު މައްސަލައިގެ ތަހުގީގުގައި މިހާރު ވަނީ އޭނާއާ އެކު އެރޭ އުޅުނު ކަމަށް ބެލެވޭ މީހުން ދެނެގަނެ، އެ އެންމެންގެ ބަޔާން ނަގައި އެ މީހުންގެ ފުރުން މަނާކޮށްފަ އެވެ. އަދި އެ އެންމެންގެ ފޯނު ވެސް ވަނީ ހާދިސާ ހިނގިތާ ހަތަރުވަރަކަށް ދުވަސް ފަހުން ހިފަހައްޓައިފަ އެވެ.