ޓޫރިސްޓުން އަންނަ އަދަދު އިތުރުވިޔަސް، ޗުއްޓީ ހޭދަކުރާ މުއްދަތު ކުރުވަނީ

މި އަހަރުގެ މިހާތަނަށް ރާއްޖެއަށް ޓޫރިސްޓުން އަންނަ މިންވަރު އިތުރުވެފައިވިޔަސް، ޗުއްޓީ ހޭދަކުރާ މުއްދަތު ކުރުވަމުން އަންނަ ކަމަށް މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ތަފާސްހިސާބުތަކުން ދައްކައިިފި އެވެ.

އެމްއެމްއޭއިން އާންމުކޮށްފައިވާ މިދިޔަ ޖުލައި މަހުގެ އިގުތިސާދީ ތަފާސްހިސާބުތަކުގެ ރިޕޯޓުން ދައްކާ ގޮތުގައި، ޖުލައި މަހު ރާއްޖެއަށް 186،738 ޓޫރިސްޓުން އަ އެވެ. އެއީ މިދިޔަ އަހަރުގެ ޖުލައި މަހު ރާއްޖޭގައި ޗުއްޓީ ހޭދަކުރި ޓޫރިސްޓުންގެ ނިސްބަތުން 11 ޕަސެންޓުގެ ކުރިއެރުމެކެވެ.

އަދި މިދިޔަ އަހަރުގެ ފުރަތަމަ ހަތް މަހުގެ ޖުމްލަ އަދަދާ އަޅާބަލާއިރު، މި އަހަރު ލިބިފައިވާ ނުވަ ޕަސެންޓުގެ އިތުރުވުމެއް ކަމަށް ވެސް އެ ރިޕޯޓުގައި ބުނެފައި ވެ އެވެ.

އެއީ، މި އަހަރުގެ ފުރަތަމަ ހަތް މަހު ރެކޯޑުކޮށްފައިވާ 1,294,868 ޖުމްލަ ޓޫރިސްޓުންގެ އަދަދު، މިދިޔަ އަހަރުގެ އެ މުއްދަތުގައި އައި 1,183,057 ޓޫރިސްޓުންނާ އަޅާކިޔުމުންނެވެ.

ރާއްޖޭގައި އޮޕަރޭޓް ކުރާ ޓޫރިސްޓު އެނދުގެ އަދަދު، ނުވަތަ ބެޑް ކެޕޭސިޓީ ވެސް ވަނީ މިދިޔަ އަހަރާ އަޅާބަލާއިރު، މި އަހަރުގެ އެ މުއްދަތުގައި އިތުރުވެފަ އެވެ.

މިގޮތުން، މިދިޔަ ޖުލައި މަހާ ހަމައަށް ޓޫރިސްޓުގެ އެނދުގެ އަދަދު 3،114 އިން އިތުރުވެފައިވާ ކަމަށް އެ ރިޕޯޓުން ދައްކަ އެވެ.

ޓޫރިސްޓުންގެ އަދަދު މި އަހަރު އިތުރުވެފައިވިޔަސް، މިދިޔަ އަހަރުގެ ފުރަތަމަ ހަތް މަހާ އަޅާބަލާއިރު، ރާއްޖޭގައި ޗުއްޓީ ހޭދަކުރާ މުއްދަތު ވަނީ ކުރުވެފަ އެވެ.

މިދިޔަ އަހަރުގެ ފުރަތަމަ ހަތް މަހުގެ ތެރޭގައި އެވްރެޖުކޮށް ރާއްޖޭގައި ޓޫރިސްޓުން ތިބޭ މުއްދަތު 7.6 ދުވަސް، މި އަހަރުގެ އެ މުއްދަތުގައި ވަނީ 6.9 އަށް ވެއްޓިފަ އެވެ.

އެއީ މި އަހަރުގެ މިހާތަނަށް އެވްރެޖް ސްޓޭ ޖުލައިގައި އެންމެ މަތިވި 7.5 ދުވަސް އެ ނިސްބަތް ހިމެނުމުންނެވެ.