ޓޫރިޒަމުން ވަންނަ ހުރިހާ ބޭރު ފައިސާއެއް ރާއްޖޭގެ ބޭންކުތަކަށް ޖަމާކުރަން ލާޒިމްކޮށްފި

ޓޫރިޒަމް ދާއިރާ އިން ރާއްޖެ އަށް ވަންނަ ހުރިހާ ބޭރު ފައިސާއެއް ބޭންކުތަކަށް ޖަމާކުރަން ލާޒިމްކޮށް، އާ އެމްއެމްއޭ އިން ބޭރު ފައިސާއާ ބެހޭ ގަވާއިދެއް މިއަދު ގެޒެޓުކޮށްފި އެވެ.

މަރުކަޒީ ބޭންކުން އާންމުކުރި ގަވާއިދުގައިވާ ގޮތުން، ޓޫރިޒަމް ދާއިރާގައި ހަރަކާތްތެރިވާ، މީރާގައި ރަޖިސްޓަރީ ކޮށްފައިވާ ހުރިހާ ފަރާތްތަކުން، ކުރިއަށް އޮތް 30 ދުވަހުގެ ތެރޭގައި އަލުން ރަޖިސްޓަރީ ކުރުމަށް ހުށަހަޅަން ވާނެ އެވެ. އަލަށް މީރާގައި ރަޖިސްޓަރީވާ ފަރާތްތަކުން ރަޖިސްޓްރީ ކުރާތާ 30 ދުވަހުގެ ތެރޭގައި ރަޖިސްޓަރީ ކުރުމަށް އެމްއެމްއޭ އަށް ހުށަހަޅަން ޖެހޭނެ ކަމަށް ގަވައިދުގައި ބުނެފައިވެ އެވެ.

ޓޫރިޒަމް ދާއިރާގެ މުދަލާއި ހިދުމަތް ފޯރުކޮށްދޭ ފަރާތްތަކުން ފޯރުކޮށްދޭ މުދަލާއި ހިދުމަތުގެ ތަފްސީލު ޖެހިގެން އަންނަ މަހުގެ 28 ވަނަ ދުވަހުގެ ކުރިން އެ އެމްއެމްއޭ އަށް ހުށަހަޅަން ޖެހެ އެވެ. އަދި ކޮންމެ މަހަކު ޓޫރިޒަމް ދާއިރާ އަށް ލިބޭ ބޭރު ފައިސާގެ ޖުމްލަ އަދަދު އެ މަހަށް ފަހު 87 ދުވަސް ކުރިން ބޭންކެއްގައި ހުށަހަޅާފައިވާ ބޭރު ފައިސާގެ އެކައުންޓަކަށް ޖަމާކުރަން ޖެހޭ ކަމަށް ގަވާއިދުގައި ވެ އެވެ.

ބޭންކަށް ބޭރު ފައިސާ ޓްރާންސްފާ ކުރުމަށް ފަހު އެކަން އެމްއެމްއޭ އަށް ހުށަހަޅަން ޖެހޭ ކަމަށް ބުނެފައިވެ އެވެ.

އެ ގަވައިދުގައިވާ ގޮތުން ރާއްޖޭގައި ކުރާ ހުރިހާ މުއާމަލާތްތަކެއް ކުރަންވާނީ ރުފިޔާއިންނެވެ. ނަމަވެސް 12 ދާއިރާއެއް ވަނީ އިސްތިސްނާ ކޮށްފަ އެވެ

އިސްތިސްނާ ކޮށްފައިވާ ކަންކަން

- ސަރުކާރަށް ނުވަތަ ދައުލަތަށް ހޭދަކުރާ ފައިސާ.

- ރެމިޓެންސް ހިދުމަތްދޭ ފަރާތްތަކާ އެކު ހިންގާ މުއާމަލާތްތައް.

- ޓޫރިޒަމް ދާއިރާއަށް ވިއްކާ އިންޝުއަރެންސް ޕޮލިސީތަކާ ގުޅޭ މުއާމަލާތްތައް.

- ބޭރުގެ މުއާމަލާތްތައް.

- ޓޫރިސްޓުންނަށް ވިއްކާ މުދަލާއި ހިދުމަތުގެ އަގު.

- އެކްސްޕޯޓު ކުރެވޭ މުދަލާއި ހިދުމަތުގެ އަގު.

- ބޭރު ފައިސާއިން އާމްދަނީ ލިބޭ ވިޔަފާރިއަކުން ގަންނަ މުދަލެއް/ހިދުމަތަކަށް.

- ބޭރު ފައިސާއިން އާމްދަނީ ލިބޭ ވިޔަފަރިއަކުން ޑިވިޑެންޑް ދިނުމައި ހިއްސާދާރުންނާ ދެމެދު ހިންގާ މުއާމަލާތްތައް.

- ބޭރު ފައިސާއިން އާމްދަނީ ލިބޭ ވިޔަފާރިއެއްގެ ހިއްސާ ގަނެވިއްކުން.

- ބޭރު ފައިސާއިން އާމްދަނީ ލިބޭ ވިޔަފާރިއަކުން ބޭނުން ނަމަ މުސާރަ އާއި އިނާޔަތް ބޭރު ފައިސާއިން ދިނުން.

- ޑިއުޓީ ފްރީ ފިހާރަތަކުން ޓޫރިސްޓުންނަށް ވިއްކާ މުދަލާއި ހިދުމަތުގެ އަގު.

އާ ގަވައިދުގައިވާ ގޮތުން ރުފިޔާއިން މުއާމަލާތް ކުރުން އިސްތިސްނާވާ ހާލަތްތައް ފިޔަވާ އެހެން ހާލަތެއްގައި އެފަދަ މުއާމަލާތެއް ބޭރު ފައިސާއިން ކޮށްފި ނަމަ އެ ފަރާތެއް 10،000ރ. އާއި އެއް މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެ އެވެ. އެ ގަވައިދުގެ ފަސް ވަނަ މާއްދާ އިން ފެށިގެން 9 ވަނަ މާއްދާގެ ނިޔަލަށް ހުރި މާއްދާތަކާ ހިލާފުވެއްޖެ ނަމަ 5،000ރ. އިން ފެށިގެން އެއް މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށް ގަވައިދުގައި ބުނެފައިވެ އެވެ.