ޓެކްސްތައް ބޮޑުކޮށްގެން 2.7 ބިލިއަންގެ އާމްދަނީއެއް، 40 ޕަސެންޓް ސީދާ ޓޫރިޒަމް ދާއިރާއިން

ރައްޔިތުންގެ މަޖިލީހަށް މިއަދު ހުށަހެޅި ޓެކްސްގެ އިސްލާހުތަކާ އެކު، ދައުލަތުގެ އާމްދަނީ އަށް 2.7 ބިލިއަން ރުފިޔާ އިތުރު ކުރެވޭނެ ކަމަށް ފިނޭންސް މިނިސްޓްރީން ބުނެފި އެވެ.

އެ މިނިސްޓްރީން ވަނީ އެއާޕޯޓް ޑިވެލޮޕްމެންޓް ފީ އާއި ޑިޕާޗާ ޓެކްސް އިން 1.5 ބިލިއަން ރުފިޔާ އިތުރުކުރަން ނިންމައިފަ އެވެ. އަލަށް ގެނައި އިސްލާހުގައި ވަނީ އިކޮނޮމީ ކްލާހުގައި ދަތުރުކުރާ ދިވެހިން ފިޔަވައި އެހެން ހުރިހާ ކެޓަގަރީއަކުން ޓެކްސް ބޮޑުކުރަން ހުށަހަޅައިފަ އެވެ. ބިޒްނަސް ކްލާހުގެ ޓިކެޓު ވަނީ 100 ޕަސެންޓަށް ބޮޑުކޮށް، ނަގާ ފީ 120 ޑޮލަރަށް ބޮޑުކޮށްފަ އެވެ. ފަސްޓް ކްލާހުން ދަތުރުކުރާ ދިވެހިންނާއި ބިދޭސީންގެ އަތުން 240 ޑޮލަރު ނަގާއިރު ޕްރައިވެޓް ޖެޓުތަކުން އަންނަ މީހުންގެ އަތުން ނަގާ ފީ 480 ޑޮލަރަށް ބޮޑުކުރަން ވަނީ ހިމަނައިފަ އެވެ.

ގްރީން ޓެކްސް 100 ޕަސެންޓަށް ބޮޑުކޮށްގެން، އަހަރެއްގެ ތެރޭގައި 964 މިލިއަން ރުފިޔާ ލިބޭނެ ކަމަށް ފިނޭންސް މިނިސްޓްރީން އަންދާޒާ ކުރެ އެވެ. ޓީޖީއެސްޓީގެ އެއް ޕަސެންޓް ބޮޑުކޮށްގެން އަހަރުގެ ޖުމްލަ އާމްދަނީ އަށް 202 މިލިއަން ރުފިޔާ އިތުރުވާނެ ކަމަށް ވެސް ފިނޭންސް މިނިސްޓްރީން ލަފާކުރެ އެވެ. އެހެންވެ، ޓެކްސް ބޮޑުކޮށްގެން ހޯދާ 40 ޕަސެންޓަކީ ސީދާ ޓޫރިޒަމް ސެކްޓާއިން އިތުރަށް ހޯދާ އާމްދަނީ އެވެ.

މި ބަދަލުތައް ރައްޔިތުންގެ މަޖިލީހާށް ފޮނުވާފައިވާ އިރު، އެ އަށް އިތުރު ބަދަލެއް ނުގެނެސް މަޖިލީހުން ފާސްކޮށްފި ނަމަ ދައުލަތުގެ ޖުމްލަ އާމްދަނީ އަށް އުފެއްދުންތެރިކަމުގެ ނިސްބަތުން ދެ ޕަސެންޓުގެ ކުރިއެރުމެއް ހޯދޭނެ ކަމަށް ފިނޭންސް މިނިސްޓްރީން ލަފާކުރެ އެވެ.

އަމަލު ކުރަން ކަނޑައަޅާފައިވާ ތާރީހުތައް

- އެއާޕޯޓު ޑިވެލޮޕްމެންޓް ފީ އާއި ޑިޕާޗާ ޓެކްސް: 1 ޑިސެމްބަރު 2024

- ގްރީން ޓެކްސް: 1 ޖެނުއަރީ 2025

- ޓީޖީއެސްޓީ: 1 ޖޫން 2025

ސަރުކާރުން ބުނީ، ޓެކްސްތަކަށް ބަދަލުތައް ގެނައުމުގައި އާންމުންނަށް ވީހާ ވެސް ކުޑަކޮށް އަސަރު ކުރާނެ ކަންކަމަށް އިސްކަންދީފައިވާ ކަމަށެވެ. އާމްދަނީ އިތުރު ކުރުމަށް އަޅާ ފިޔަވަޅުތަކުގެ އިތުރުން ހަރަދު ކުޑަ ކުރުމަށް ވެސް ސަރުކާރުން ވަނީ ގިނަ ފިޔަވަޅުތަކެއް ތާވަލުކޮށްފަ އެވެ. އެކަންކަމަށް އަމަލު ކުރާނެ ތާރީހުތައް އެނގޭ ގޮތަށް ޓައިމްލައިނެއް ވަރަށް އަވަހަށް އިއުލާނު ކުރާނެ ކަމަށް ފިނޭންސް މިނިސްޓްރީން ބުނެފައިވެ އެވެ.

ފިނޭންސް މިނިސްޓްރީގެ މިހާރުގެ ޕްލޭންތަކުގައިވާ ގޮތުން ހަރަދު ކުޑަކުރުމަށް އަޅާ އެންމެ ބޮޑެތި ފިޔަވަޅުތައް އަޅަން ފަށާނީ އަންނަ އަހަރުން ފެށިގެންނެވެ. އެގޮތުން ކުރިން، އެންމެ ބޭނުން ޖެހިފައިވާ މީހުންނަށް ސަބްސިޑީ ދޭން ކަނޑައެޅުން މިއަހަރަށް ކަނޑައެޅި ނަމަވެސް، އެއަށް އަމަލު ކުރަން ދެން ފަށާނީ އަންނަ އަހަރު އެވެ.