ރިސޯޓުތަކުން އަހަރަކު 750 މިލިއަން ޑޮލަރު ރާއްޖޭގެ ބޭންކުތަކަށް މާރުކުރަން ޖެހޭ!

ޓޫރިޒަމް ދާއިރާ އަށް ބޭރު ފައިސާ އިން ލިބޭ އާމްދަނީން އަހަރަކު ޖުމްލަ 750 މިލިއަން ޑޮލަރާ ހަމައަށް ރާއްޖޭގެ ބޭންކުތަކުން މާރުކުރަން ޖެހޭ ގޮތަށް މަރުކަޒީ ބޭންކު، އެމްއެމްއޭގެ ބޭރު ފައިސާއާ ބެހޭ ގަވައިދަށް އަމަލުކުރަން ފަށައިފި އެވެ.

މިއީ ރާއްޖޭގެ ބޭންކުތަކުން ޑޮލަރު މާރުކުރަން ޖެހޭ ގޮތަށް މިހާތަނަށް ކަނޑައެޅި ފުރަތަމަ ފަހަރެވެ.

ބޭރު ފައިސާއާ ބެހޭ ގަވައިދު އިސްލާހުކޮށް މިއަދު ގެޒެޓު ކުރުމާ އެކު، މިއަދުން ފެށިގެން އަމަލު ކުރަން ވަނީ ފަށައިފަ އެވެ. މި ބަދަލާ އެކު، އެމްއެމްއޭ އިން މާޗް 1، 1987 ވަނަ އަހަރުން ފެށިގެން އަމަލުކުރަމުން އައި މަނިޓަރީ ގަވާއިދު އުވުނީ އެވެ.

މަރުކަޒީ ބޭންކް އެމްއެމްއޭ އިން އާންމުކުރި އާ ގަވާއިދުގައިވާ ގޮތުން، ޓޫރިޒަމް ދާއިރާގެ ހުރިހާ ފެސިލިޓީތަކަކުން ވެސް ކަނޑައަޅާފައިވާ ވަކި އަދަދެއް ބޭންކްތައް މެދުވެރިކޮށް މާރުކުރަން ޖެހޭނެ އެވެ.

ކެޓަގަރީ "އޭ" ގައި ހިމެނެނީ ރިސޯޓުތަކާއި ހޮޓާތަކާއި ޓޫރިސްޓް އުޅަނދުތަކެވެ. ކެޓަގަރީ "އޭ" ގައި ހިމެނޭ ފަރާތްތަކުން ކޮންމެ ޓޫރިސްޓަކަށް، ބޮލަކަށް 500 ޑޮލަރުގެ ރޭޓުން، އެ މަހެއްގައި އައިސްފައިވާ ޖުމްލަ ޓޫރިސްޓުންނަށް ޖެހޭ އަދަދު ބޭންކަކަށް ޖަމާކުރަން ދެން މަޖުބޫރުވާނެ އެވެ.

ކެޓަގަރީ "ބީ" ގައި ހިމެނެނީ ގެސްޓް ހައުސްތަކެވެ. އެ ތަންތަނުން ކޮންމެ ޓޫރިސްޓެއްގެ ބޮލަކަށް 25 ޑޮލަރުގެ ރޭޓުން ކޮންމެ މަހަކު އަންނަ ޖުމްލަ ޓޫރިސްޓުންނަށް ޖެހޭ އަދަދު ބޭންކަކަށް ޖަމާކުރަން ޖެހޭނެ އެވެ.

މިދިޔަ އަހަރު ރާއްޖެ އަށް 1.8 މިލިއަން ޓޫރިސްޓުން އައި އިރު އޭގެ ތެރެއިން 1.5 މިލިއަން ޓޫރިސްޓުން އައީ ރިސޯޓުތަކަށެވެ. އެހެންވެ، އެ އަދަދުން ބަލާ ނަމަ ރިސޯޓުތަކުން ޑޮލަރު މާރުކޮށްގެން ބޭންކްތަކަށް އަހަރަކު 750 މިލިއަން ޑޮލަރު ލިބޭނެ އެވެ. ގެސްޓް ހައުސްތަކުން 7.5 މިލިއަން ޑޮލަރު ބޭންކްތަކަށް މާރުކުރަން ޖެހޭނެ އެވެ.

އެމްއެމްއޭގެ އާ ގަވާއިދުގައިވާ ގޮތުން އެކަން ކުރަން ޖެހޭނީ ކޮންމެ މަހެއް ނިމި 87 ދުވަހުގެ ކުރިން ބޭންކަށް އެ ފައިސާ ޖަމާކުރަން ޖެހޭނެ އެވެ.

ޓޫރިޒަމް ދާއިރާއިން ބޭންކުތަކަށް 2019 ވަނަ އަހަރު މާރުކުރީ 153 މިލިއަން ޑޮލަރެވެ. އެކަމަކު މިދިޔަ އަހަރު މާރުކުރި ވަރު ވަނީ 68 މިލިއަން ޑޮލަރަށް ދަށަށް ގޮސްފަ އެވެ. އެހެންވެ، އެއީ ޖުމްލަ ޓޫރިޒަމް އާމްދަނީގެ އެންމެ ތިން ޕަސެންޓެވެ.

އަލަށް ގެނައި ބަދަލާ އެކު، ޓޫރިޒަމްގެ ޖުމްލަ އާމްދަނީގެ 15 ވަރަކަށް ޕަސެންޓު ބޭންކްތަކުގައި މާރު ކުރެވޭނެ ގޮތް ފަހިވާނެ އެވެ.

އެމްއެމްއޭ އިން ބުނީ އެ ގަވާއިދުތަކުގެ ސަބަބުން ރާއްޖޭގެ ބޭންކިން ނިޒާމަށް ވަންނަމުންދާ ބޭރު ފައިސާގެ ނިސްބަތް އިތުރުވެ އަދި ބޭންކިން ނިޒާމުން ވިޔަފާރިތަކަށާއި އާންމުންގެ ބޭނުންތަކަށް ފޯރުކޮށްދޭ ބޭރު ފައިސާގެ ނިސްބަތް އިތުރުވާނެ ކަމަށެވެ.

"އެކްސްޗޭންޖް ރޭޓް ސިޔާސަތު ތަންފީޒު ކުރުމަށް ޓަކައި އެމްއެމްއޭ އިން ފޮރިން އެކްސްޗޭންޖް މާކެޓަށް ވިއްކަމުންދާ ބޭރު ފައިސާގެ އަދަދު އިތުރުކުރުމަށް ވެސް މަގުފަހިވެގެން ދާނެ އެވެ. ވަކިން ހާއްސަކޮށް މި ގަވާއިދުތަކުގެ ސަބަބުން، ރައްޔިތުންނަށް ފައިދާތަކާއި ފަސޭހަތަކެއް ލިބިގެންދާނެ އެވެ،" އެމްއެމްއޭގެ ބަޔާނުގައި ވެ އެވެ.

ވަކި ހާލަތްތަކެއްގައި އެ އަށް ވުރެ މަދުން މާރުކުރުމުގެ ހުއްދަ އަށް އެދެވިދާނެ

- ބޭރު ފައިސާ އިން ޓެކްސް ދެއްކުން.

- މާލީ އިދާރާއަކަށް ބޭރު ފައިސާ އިން ދަރަނި ދެއްކުން.

- ކޯޓު ހުކުމަކުން ކަނޑައަޅާފައިވާ ބޭރު ފައިސާގެ އިލްތިޒާމެއް.

- އޮތޯރިޓީން ހުއްދަދޭ އެހެން ވެސް ބޭރު ފައިސާގެ އިލްތިޒާމެއް.

އެމްއެމްއޭ އިން ބުނީ، ބޭންކުތަކަށް މާރުކުރާ ފައިސާގެ ތެރެއިން ކޮންމެ ހަފުތާއަކު ލިބޭ ބޭރު ފައިސާގެ 60 ޕަސެންޓު އެ ހަފުތާއެއްގެ ބުދަ ދުވަހުގެ ކުރިން އެ އޮތޯރިޓީ އަށް ވިއްކަން ޖެހޭނެ ކަމަށެވެ. މިއީ އެމްއެމްއޭ އިން މިފަދަ ގޮތަކަށް ބޭންކްތަކުން ޑޮލަރު ގަންނަން ކަނޑައެޅި ފުރަތަމަ ފަހަރެވެ.

ބޭންކްތަކުން ކޮންމެ މަހެއްގެ ތެރޭގައި ލިބޭ ބޭރު ފައިސާގެ ތަފްސީލުތައް ވެސް އެމްއެމްއޭ އަށް ހުށަހަޅަން ޖެހޭނެ އެވެ.

ކޮންމެ މަހެއްގެ ތެރޭގައި ބޭންކަކަށް މާރުކޮށްފައިވާ ބޭރު ފައިސާގެ ތަފްސީލު އެ މަހެއް ނިމޭތާ 10 ވަނަ ދުވަސް ތެރޭ ޓޫރިޒަމް ފެސިލިޓީތަކުން އެމްއެމްއޭއަށް ހުށަހަޅަން ޖެހޭނެ އެވެ.