ރިސޯޓުތަކުން ޑޮލަރު މާރުކުރުމުން އަންނަ އަހަރު ރިޒާވް ރަނގަޅުވާނެ: ފިނޭންސް

ބޭރު ފައިސާއާ ބެހޭ ގަވައިދަށް ގެނައި ބަދަލާ އެކު، އަންނަ އަހަރު ދައުލަތުގެ ރިޒާވް 705 މިލިއަން ޑޮލަރަށް އިތުރުވާނެ ކަމަށް ބަޖެޓުގައި ލަފާކޮށްފި އެވެ.

ބަޖެޓު ފޮތުގައިވާ ގޮތުން އަންނަ އަހަރުގެ ރިޒާވް މަތިވާނެ ކަމަށް ލަފާކޮށްފައިވަނީ އެމްއެމްއޭ އިން ބޭރު ފައިސާއާ ބެހޭ ގަވައިދަށް ގެނައި ބަދަލާ ގުޅިގެން އެމްއެމްއޭއަށް ލިބޭ ބޭރު ފައިސާ އިތުރުވާނެތީ އެވެ. އެއާ އެކު އޭގެ ހެޔޮ ބަދަލު ރިޒާވުން ފެންނާނެ ކަމަށް ފިނޭންސް މިނިސްޓްރީން ބުންޏެވެ.

އެމްއެމްއޭ އިން މިދިޔަ އޮކްޓޫބަރު އާންމުކޮށް، އަމަލުކުރަން ފެށި ބޭރު ފައިސާއާ ބެހޭ ގަވައިދުގައިވާ ގޮތުން ރިސޯޓުތަކުން އަންނަ ކޮންމެ ޓޫރިސްޓަކަށް 500 ޑޮލަރުގެ ރޭޓުން، ރާއްޖޭގެ ބޭންކަކަށް ޖަމާކުރަން ލާޒިމްވާނެ އެވެ. އަދި ގެސްޓް ހައުސްތަކުން ކޮންމެ ޓޫރިސްޓަކަށް 25 ޑޮލަރުގެ ރޭޓުން ކޮންމެ މަހަކު އެ އަދަދު ބޭންކަކަށް ޖަމާކޮށް މާރުކުރަން ޖެހެ އެވެ.

މިއަހަރު ނިމޭއިރު ރިޒާވް ހުންނާނެ ކަމަށް ބެލެވެނީ 654 މިލިއަން ޑޮލަރުގަ އެވެ. ބޭރު ފައިސާގެ ރިޒާވް އިތުރުކުރުމަށް އިންޑިއާގެ ރިޒާވް ބޭންކް އޮފް އިންޑިއާ (އާރްބީއައި) މެދުވެރިކޮށް އެމްއެމްއޭ އިން 400 މިލިއަން ޑޮލަރުގެ ކަރެންސީ ސްވޮޕް ފެސިލިޓީ ނެގީ މިދިޔަ މަހުގެ ފަހުކޮޅު އެވެ. އެއާ އެކު މިދިޔަ މަސް ނިމުނު އިރު ރަސްމީ ރިޒާވް ހުރީ 615 މިލިއަން ޑޮލަރުގަ އެވެ.

އާންމުކޮށް ސްވޮޕް ފެސިލިޓީން ލިބޭ ފައިސާ ބޭރުގެ ބޭންކްތަކުގައި އިންވެސްޓް ކުރި ނަމަވެސް، އެމްއެމްއޭ އިން ބުނި ގޮތުގައި، މި ފަހަރު ސްވޮޕްގެ ތެރެއިން ލިބުނު 120 މިލިއަން ޑޮލަރު އިންވެސްޓް ކުރީ ރާއްޖޭގެ ބޭންކްތަކުގަ އެވެ.

މިދިޔަ އަހަރު ނިމުނު އިރު ރަސްމީ ރިޒާވްގައި ހުރީ 590 މިލިއަން ޑޮލަރެވެ.

ރަސްމީ ރިޒާވް އިތުރުވިޔަސް، ބޭނުންކުރެވޭ ރިޒާވް ވަނީ އޭގެ ކުރީ މަހަށް ވުރެ 17 މިލިއަން ޑޮލަރު ދަށްވެފަ އެވެ. މިދިޔަ މަހު ބޭނުންކުރެވޭ ރިޒާވްގައި ހުރީ 32 މިލިއަން ޑޮލަރެވެ. މިއީ މި ދިޔަ ތިން އަހަރުގެ ތެރޭގައި ޔޫޒަބަލް ރިޒާވް އެންމެ ބޮޑަށް ދަށަށް ދިޔަ މަހެވެ. މިދިޔަ އޮގަސްޓް މަހު ޔޫޒަބަލް ރިޒާވް ވަނީ 45 މިލިއަން ޑޮލަރަށް ދަށަށް ގޮސްފަ އެވެ. ޔޫޒަބަލް ރިޒާވް އެހާ ބޮޑަށް ދަށަށް ދަނީ، ޑޮލަރުން ކުރަން ޖެހޭ ހަރަދުތައް އިންތިހާއަށް އިތުރުވުމުގެ ސަބަބުންނެވެ.