އަހަރު ނިމުމުގެ ކުރިން 2 މިލިއަން ޓޫރިސްޓުންގެ އަމާޒު ހާސިލްވާނެ

މި އަހަރަށް ކަނޑައެޅި އަމާޒާ އެއްގޮތަށް، އަހަރު ނިމުމުގެ ކުރިން ދެ މިލިއަނަށް ވުރެ ގިނަ ޓޫރިސްޓުން ރާއްޖެއަށް ޒިޔާރަތް ކުރާނެ ކަމަށް ތަފާސްހިސާބުތަކުން ދައްކައިފި އެވެ.

ޓޫރިޒަމް މިނިސްޓްރީން އާންމު ކޮށްފައިވާ މި މަހުގެ ފުރަތަމަ 11 ދުވަހުގެ ތަފާސްހިސާބުތައް ދައްކާ ގޮތުން، އެހާތަނަށް ޖުމްލަ 1.899،884 ޓޫރިސްޓުން ރާއްޖެއަށް ވަނީ އައިސްފަ އެވެ.

މި މަހު ފެށުނު ޓޫރިޒަމްގެ ޕީކް ސީޒަންގައި ޓޫރިސްޓުން ރާއްޖެ އަންނަ މިންވަރު ކުޑަކޮށް މަދުވެފައި ވިޔަސް، މި މަހުގެ ފުރަތަމަ 11 ދުވަހުން ފެށިގެން ރާއްޖެއަށް ދަނީ އެވްރެޖްކޮށް 5،659 ޓޫރިސްޓުން ކޮންމެ ދުވަހަކު އަންނަމުންނެވެ.

ދެ މިލިއަން ޓޫރިސްޓުން ހަމަވާން އިތުރަށް 100،116 ޓޫރިސްޓުން ބޭނުންވާއިރު، މި އަހަރު ނިމުމުގެ ކުރިން، ދެ މިލިއަން ޓޫރިސްޓުންގެ އަމާޒު ފަސޭހަކޮށް ހާސިލްވާނެ އެވެ.

މިހާރު ދުވާލަކު ރާއްޖެ އަންނަ މިންވަރަށް ޓޫރިސްޓުން އަންނަމުންދާ ނަމަ، މި މަހުގެ ނިޔަލަށް ޖުމްލަ 2،013،064 ޓޫރިސްޓުން އަންނާނެ އެވެ.

މިދިޔަ އަހަރު ރާއްޖެއަށް ޒިޔާރަތް ކޮށްފައިވަނީ 1،747،370 ޓޫރިސްޓުންނެވެ.

މިހާތަނަށް އެއް ގައުމަކުން ރާއްޖެއަށް އެންމެ ގިނައިން ޓޫރިސްޓުން އައިސްފައިވަނީ ޗައިނާ އިންނެވެ. މިދިޔަ އަހަރު ތިން ވަނައިގައި އޮތް ޗައިނާ އިން، މި އަހަރުގެ މިހާތަނަށް 256،197 ޓޫރިސްޓުން ރާއްޖޭގައި ޗުއްޓީ ހޭދަކޮށްފައިވެ އެވެ.

މިދިޔަ އަހަރު އެއް ވަނައިގައި އޮތް އިންޑިއާ މި އަހަރު ވަނީ އެ ލިސްޓުގެ ހަ ވަނަ އަށް ވެއްޓިފަ އެވެ. އެ ލިސްޓުގެ ދެވަނައިގައި ރަޝިއާ އޮތްއިރު ތިން ވަނައިގައި އިނގިރޭސިވިލާތް އަދި ހަތަރު ވަނައިގައި އޮތީ ޖަރުމަނެވެ.