ހުރިހާ ފެސިލިޓީއަކަށް ސްޕްލިޓް ސްޓޭގެ ހުއްދަ ދީފި

ރިސޯޓުތަކަށް އަންނަ ޓޫރިސްޓުންނަށް މިހާރު ގެސްޓުހައުސްތަކަށް ވެސް ދެވޭނެ

23 އޮކްޓޯބަރ 2020

ރާއްޖެ އަށް އަންނަ ޓޫރިސްޓުންނަށް ރިސޯޓުތަކާއި ސަފާރީ އަދި ގެސްޓުހައުސްތަކުގައި ސްޕްލިޓް ސްޓޭގެ ހުއްދަ ޓޫރިޒަމް މިނިސްޓްރީން ދީފި އެވެ.

އިދުހާމް ނައީމް

ސްޕްލިޓް ސްޓޭއަކީ އެއް ފެސިލިޓިގައި ޗުއްޓީ ހޭދަކުރުމުގެ ބަދަލުގައި ދެ ފެސިލިޓީއެއް ނުވަތަ އެއަށްވުރެ ގިނަ ފެސިލިޓީތަކުގައި ޗުއްޓި ހޭދަކުރުމެވެ. އެހެންކަމުން މި ހުއްދައާ އެކު މިހާރު ރިސޯޓުތަކަށް އަންނަ ޓޫރިސްޓުންނަށް ސަފާރީތަކާއި ގެސްޓުހައުސްތަކުގައި ވެސް ޗުއްޓީ ހޭދަ ކުރެވޭނެ އެވެ.

ކޮވިޑް-19ގެ ސަބަބުން ރާއްޖޭގެ ބޯޑަރު ބަންދުކުރުމަށް ފަހު އަލުން ހުޅުވާލުމުން އެންމެ ފުރަތަމަ ސްޕްލިޓް ސްޓޭގެ ހުއްދަ ދީފައިވަނީ ރިސޯޓުތަކަށް އެކަންޏެވެ.

Split Stay allowed at ALL types of tourist accommodation facilities in #Maldives:

Tourists can now split their stay between resort, hotels, guest houses and live aboard boats, with prior approval as per split-stay procedure/ guideline by Ministry of Tourism.#VisitMaldivesNow
— Ministry of Tourism (@MoTmv) October 23, 2020

ސްޕްލިޓް ސްޓޭގެ ހުއްދަ ދީ ޓޫރިޒަމް މިނިސްޓްރީން މިއަދު ކުރި ޓްވީޓް--

ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވިގޮތުގައި މިހާތަނަށް ރާއްޖޭގެ 50 ޕަސެންޓަށް ވުރެ ގިނަ އެނދު ވަނީ ޓޫރިސްޓުންނަށް ހުޅުވާލައިފަ އެވެ. މީގެ ތެރޭގައި ރިސޯޓުތަކާއި ގެސްޓުހައުސްތަކާއި ސަފާރީތައް ވެސް ހިމެނެ އެވެ.

މޯލްޑިވްސް އިމިގްރޭޝަންގެ ތަފާސްހިސާބުތައް ދައްކާ ގޮތުން ރާއްުޖެ އަންނަ ޓޫރިސްޓުންގެ އަދަދު މަހުން މަހަށް އިތުރުވެ އެވެ. އެގޮތުން ފާއިތުވި ތިން މަސް ދުވަހުގެ ތެރޭގައިި 27،217 ޓޫރިސްޓުން ވަނީ ރާއްޖެއަށް ޒިޔާރަތް ކޮށްފަ އެވެ.

ޓޫރިޒަމް މިނިސްޓްރީން ލަފާކުރާ ގޮތުގައި މި އަހަރު ރާއްޖެ އަންނާނީ ގާތްގަނޑަކަށް 500،000 ޓޫރިސްޓުންނެވެ.

Comments