އިނގިރޭސި ވިލާތަކީ ރާއްޖޭގެ ލަގްޒަރީ ޓޫރިޒަމްގެ މުހިއްމު ބައިވެރިއެއް: ރައީސް

އިނގިރޭސި ވިލާތަކީ ރާއްޖޭގެ ލަގްޒަރީ ޓޫރިޒަމްގެ މުހިއްމު ބައިވެރިއެއް ކަމަށް ރައީސް ޑރ މުހައްމަދު މުއިއްޒު މިއަދު ވިދާޅުވެއްޖެ އެވެ.

އެ މަނިކުފާނު މިހާރު އިނގިރޭސި ވިލާތަށް ކުރައްވަމުން ގެންދަވާ ދަތުރުފުޅާ ދިމާކޮށް ރާއްޖެ އިން ބޭއްވި ބިޒްނަސް ފޯރަމްގައި ވިދާޅުވީ، އެ ގައުމަކީ މިހާރު ވެސް ރާއްޖޭގެ ތަރައްގީގައި މުހިއްމު ބައިވެރިއެއް ކަމަށެވެ. އެގޮތުން އިނގިރޭސި ވިލާތުން ރާއްޖޭގެ ޓޫރިޒަމްގައި މުހިއްމު ދައުރެއް އަދާކުރާ ކަމަށް އެ މަނިކުފާނު ވިދާޅުވި އެވެ.

އިނގިރޭސިވިލާތަކީ ރާއްޖެ އަށް މިހާރު ތިން ވަނަ އަށް އެންމެ ގިނަ ޓޫރިސްޓުން އަންނަ ގައުމެވެ. މި އަހަރުގެ މިހާތަނަށް އެ ގައުމުން ރާއްޖެ އަށް ވަނީ 114،000 ޓޫރިސްޓުން އައިސްފަ އެވެ. މިދިޔަ އަހަރު ނިމުނު އިރު ވެސް އިނގިރޭސި ވިލާތް އޮތީ ތިން ވަނައިގަ އެވެ. އެ އަހަރު ވެސް ވަނީ 180،000 ޓޫރިސްޓުން ރާއްޖެ އައިސްފައި ވެ އެވެ.

ރައީސް މުއިއްޒު ވިދާޅުވީ، ޓޫރިޒަމް ދާއިރާގެ އިތުރުން މަސްވެރިކަމުގެ ދާއިރާ އިން އިނގިރޭސި ވިލާތަކީ ރާއްޖެއިން އެންމެ ގިނައިން މަސް ދަޅުމަސް އެކްސްޕޯޓު ކުރާ އެއްގައުމު ކަމަށެވެ. އެ މަނިކުފާނު ފާހަގަކުރެއްވި ގޮތުގައި، ކޮންމެ އަހަރަކު ވެސް 20 މިލިއަން ޑޮލަރުގެ ދަޅު މަސް ނުވަތަ ޕްރޮސެސް ކޮށްފައިވާ މަހުގެ ބާވަތްތައް ރާއްޖެ އިން އިނގިރޭސި ވިލާތަށް އެކްސްޕޯޓު ކުރެ އެވެ.

އެ މަނިކުފާނު ވިދާޅުވިގޮތުގައި، ރާއްޖެއަކީ ދެމެހެއްޓެނިވި ވަރުގަދަ އިގްތިސާދެއް އޮތް ގައުމަކަށް ހެދުމަށްޓަކައި އިންވެސްޓް ކުރުމުގެ ފުރުސަތު ފުޅާދާއިރާއެއްގައި ވަނީ ހުޅުވާލައިފަ އެވެ. އެކަމަށް ހާއްސަކޮށް އާ ގާނޫނެއް އެކުލަވައިލާ ތަސްދީ ގުކޮށްފައިވާ ކަމަށް ރައީސް ވިދާޅުވި އެވެ.

ކުރިއަށް އޮތް ޖީލަށް ރާއްޖޭގެ އިގްތިސާދު ފުޅާކުރުމުގެ ގޮތުން އާ ސިނާއަތްތަކާއި އުމްރާނީ ތަރައްގީގެ އިތުރުން އިންސާނީ ވަސީލަތްތައް ތަރައްގީކޮށް، ޑިޖިޓަލް ދާއިރާ ހަރުދަނާ ކުރުމަށް މުހިއްމު މަސައްކަތްތަކެއް ފައްޓަވާފައިވާ ކަމަށް އެ މަނިކުފާނު ވިދާޅުވި އެވެ.

ރައީސް މުއިއްޒު ވިދާޅުވީ، ރާއްޖެ ވަނީ އެކި ދާއިރާތަކުން އިންވެސްޓަރުންނަށް ހުޅުވާލާފައި ކަމަށެވެ. އެގޮތުން ޑިޖިޓަލް ދާއިރާ އާއި އިޔާދަކުރަނިވި ހަކަތައިގެ ދާއިރާ އާއި މަސްވެރިކަމުގެ ދާއިރާ އާއި ޓޫރިޒަމް ދާއިރާ އިން ހުރި އިންވެސްޓްމެންޓްގެ ފުރުސަތުތައް ފާހަގަކުރެއްވި އެވެ.

"އަޅުގަނޑުމެން ފުޅާކުރަން ބޭނުންވާ އެއް ދާއިރާއަކީ ކްރިއޭޓިވް އިންޑަސްޓްރީ. ޑިޖިޓަލް ކޮންޓެންޓާއި ގޭމިން، ސަގާފަތާ ގުޅޭ ދާއިރާ އާއި އާޓްސް ތަރައްގީ ކުރުމަށް ހާއްސަ އިސްކަމެއް ދެން. އަމާޒަކީ 2030 ވަނަ އަހަރު އަންނައިރު އެ ދާއިރާ އަކީ ރާއްޖޭގެ އުފެއްދުންތެރިކަމުގެ 15 ޕަސެންޓަށް ހެދުން" އެ މަނިކުފާނު ވިދާޅުވި އެވެ.

ރައީސް ވިދާޅުވީ، ރާއްޖެއަކީ ޓެކްނޮލޮޖީ ދާއިރާ އަށް އަހުލުވެރި ޒުވާން ޖީލެއް އޮތް ގައުމެއް ކަމަށާއި ޑިޖިޓަލް އިންފްރާސްޓްރަކްޗާ ތަރައްގީ ކުރުމަށް މުހިއްމު މަސައްކަތްތަކެއް ފަށާފައިވާ ކަމަށެވެ.

"އިނގިރޭސި ވިލާތުގެ ޓެކް ކުންފުނިތަކަށް ވެސް އާ ފުރުސަތުތައް މިވަނީ ހުޅުވާލާފައި. ސޮފްޓްވެއާ ފޯރުކޮށްދޭ ކުންފުނިތަކާއި އީ ގަވަނަންސް އެކްސްޕާޓުންނާއި ސައިބަ ސެކިއުރިޓީ ފާމުތަކަށް ވެސް ފުރުސަތުތައް އެބައޮތް،" ރާއްޖޭގައި ހުރި ފުރުސަތުތަކަށް އަލިއަޅުވައިލައްވަމުން އެ މަނިކުފާނު ވިދާޅުވި އެވެ.

މިއަދުގެ ރަސްމިއްޔާތުގައި ރައީސް މުއިއްޒު ވަނީ ރާއްޖޭގެ މަސްވެރިކަމުގެ ދާއިރާގެ އާ ބްރޭންޑެއް ވެސް އިފުތިތާހު ކޮށްދެއްވައިފަ އެވެ. "މޯލްޑިވްސް ފިޝަރީޒް ބްރޭންޑް" އަކީ ސީފުޑާ ގުޅޭ ޕްރިމިއަމް ނުވަތަ ހައި ކޮލިޓީ ބްރޭންޑެކެވެ.