ލަންޑަންގައި އައްޑޫ ޕްރޮމޯޓް ކުރަން ކައުންސިލުން 700،000ރ. އަށް ވުރެ ބޮޑު ހޭދައެއް

އިނގިރޭސި ވިލާތުގެ ލަންޑަންގައި މިދިޔަ މަހު ބޭއްވި ވޯލްޑް ޓްރެވެލް މާކެޓުގައި އައްޑޫގެ ޓޫރިޒަމް ޕްރޮމޯޓް ކުރުމަށް ދިޔަ 10 މީހުންގެ ވަފުދަށް ހަތް ލައްކަ އަށް ވުރެ ގިނަ ރުފިޔާ ހަރަދުކޮށްފައިވާ ކަމަށް އައްޑޫ ސިޓީ ކައުންސިލުން ބުނެފި އެވެ.

މައުލޫމާތު ހޯދައި ލިބިގަތުމުގެ ގާނޫނުގެ ދަށުން އެ ކައުންސިލުން "މިހާރު" އާ ހިއްސާކުރި މައުލޫމާތުތަކުން އެނގޭ ގޮތުން، ނޮވެމްބަރު 2 އިން 11 އަށް ލަންޑަންގައި ބޭއްވި ޓްރެވެލް މާކެޓަށް ކައުންސިލްގެ ބަޖެޓުން 528،027ރ. އަދި ޓްރަސްޓް ފަންޑުން 196،111ރ. އާ އެކު ޖުމްލަ 724،138ރ. ވަނީ ހަރަދު ކޮށްފަ އެވެ.

އެ ދަތުރުގައި ބައިވެރިވި އައްޑޫ ސިޓީ ކައުންސިލްގެ ވަފުދުގައި 10 މީހަކު ބައިވެރިވާ ގޮތަށް ހަމަޖައްސާފައިވީ ނަމަވެސް، ސިއްހީ ސަބަބުތަކާ ހެދި އެއް ކައުންސިލަރަކަށް ދަތުރެއް ނުކުރެއްވުނެވެ. އެހެންވެ، ދަތުރުގައި ބައިވެރިވީ ނުވަ މީހެކެވެ. އެއީ މޭޔަރު އަލީ ނިޒާރުގެ އިތުރުން ހަތަރު ކައުންސިލަރަކާއި ކައުންސިލް އެގްޒެކެޓިވްއަކާއި ކައުންސިލް އޮފިސަރަކާއި ޕަބްލިކް ރިލޭޝަންސް އޮފިސަރު އަދި ޓެކްނިކަލް އެކްސްޕާޓެއްގެ ގޮތުގައި އެންކްރިއާ ސްޓޫޑިއޯގެ އާޓް ޑިރެކްޓަރާ އެކު ނުވަ މީހެކެވެ.

އައްޑޫން މާލެ އަށް އަދި މާލެ އިން ލަންޑަނަށް ދިއުމާއި އަނބުރާ އައުމުގެ ޓިކެޓަށް 213،582ރ. ހަރަދުކުރި އެވެ. ލަންޑަންގައި ތިބުމާއި ކެއުމުގެ ހަރަދަށް 472،006ރ. ހަރަދު ކޮށްފައިވާއިރު، ސްޓޮޕް އޯވާ ހަރަދަށް 15،420ރ. އަދި ޕޮކެޓު މަނީގެ ގޮތުގައި 23،130ރ. ހޭދަވި އެވެ.

އައްޑޫ ސިޓީ ކައުންސިލުން ބުނީ ޓްރެވެލް މާކެޓުގައި ބައިވެރިވީ ދުނިޔެ އަށް އައްޑޫގެ ޓޫރިޒަމް އިޝްތިހާރު ކުރުމާއި ބްރޭންޑު ލޯންޗުކުރުން އަދި ޕޮޒިޝަނިން ކުރުމަށް ކަމަށެވެ.

އެ ދަތުރަށް ފަހު ކައުންސިލުން ނެރުނު ރިޕޯޓުގައި ބުނީ، ޓްރެވެލް މާކެޓުގައި އައްޑޫގެ ޓޫރިޒަމް ބްރޭންޑް ކުރަން ނިންމީ އެ ސިޓީ، އިނގިރޭސިންގެ ހިމާޔަތުގައި އޮތުމާއި ދެ ވަނަ ބޮޑު ހަނގުރާމައިގައި އޮތް ގުޅުން އަދި އެ ހަނގުރާމަ އަށް ފަހު ވެސް އޮތް ގުޅުމުގެ ސަބަބުން ކަމަށެވެ.

އެ ހަރަކާތުގެ ބޭނުމަކީ ހަމައެކަނި އައްޑޫގެ ޓޫރިޒަމް ޕްރޮމޯޓް ކުރުން ނޫން ކަމަށާއި އެއީ އިނގިރޭސިންގެ ތާރީހާ ވެސް ގުޅިފައިވާ އައްޑޫގެ ތަފާތު ތަރިކައާ ސަގާފަތް ބަލާލަން ވެސް ދެވޭ ދައުވަތެއް ކަމަށް ކައުންސިލުން ބުންޏެވެ. އެ ދަތުރުގައި ލިބުނު މައުލޫމާތާއި ގުޅުންތަކުން، އައްޑޫގެ އިގުތިސޯދު ރަނގަޅު ކުރަން އިތުރު ހިތްވަރެއް ލިބިފައިވާ ކަމަށް ބުންޏެވެ.