އިނގިރޭސި ވިލާތުގެ ފޮރިން މިނިސްޓަރު، ރައީސް މުއިއްޒުގެ އަރިހަށް

އިނގިރޭސި ވިލާތުގެ ފޮރިން މިނިސްޓަރު ޑޭވިޑް ލެމީ، ރާއްޖޭގެ ރައީސް ޑރ. މުހައްމަދު މުއިއްޒުއާ އިއްޔެ ބައްދަލުކުރައްވައިފި އެވެ.

އިނގިރޭސި ވިލާތުގައި ބާއްވާ މަތީފެންވަރުގެ ބައްދަލުވުންތަކަކަށް ރައީސް މުއިއްޒު މިހާރު އެ ގައުމަށް ވަޑައިގެން އުޅުއްވާއިރު، ފޮރިން މިނިސްޓަރު ޑޭވިޑް ލެމީއާ އެކު ބޭއްވެވި ބައްދަލުވުމުގައި ރާއްޖެ އާއި އިނގިރޭސި ވިލާތާ ދެމެދުގައި ދެމެހެއްޓެނިވި ގޮތެއްގައި ގުޅުން ބަދަހިކުރުމާއި އަދި ހަރުދަނާކުރުމާ ގުޅޭ ގޮތުން މަޝްވަރާ ކުރެއްވި ކަމަށް ރައީސް އޮފީހުން ބުންޏެވެ.

އޭގެ އިތުރުން މަސްވެރިކަމުގެ ދާއިރާ އާއި މޫސުމަށް އަންނަ ބަދަލުތަކަށް އެކަށީގެންވާ ގޮތެއްގައި ހޭނުމުގެ މަސައްކަތްތަކުގަ އާއި އިއާދަކުރަނިވި ހަކަތަ އިތުރުކުރުމުގަ އާއި ތައުލީމާއި ސްކޮލާޝިޕްގެ ފުރުސަތުތައް އިތުރުކޮށްދިނުމުގައި، އެއްބާރުލުން އިތުރުކުރުމާ ބެހޭގޮތުން މަޝްވަރާ ކުރއްވި އެވެ.

"މި ނޫން ވެސް މުހިންމު ދާއިރާތަކުން ގުޅުން ބަދަހިކުރުމާ ބެހޭ ގޮތުން ދެބޭފުޅުން ވަނީ ވާހަކަފުޅުދައްކަވާފަ އެވެ،" ރައީސް އޮފީހުގެ ވެބްސައިޓުގައި ވެ އެވެ.

ރައީސް މުއިއްޒު އިއްޔެ ވަނީ ގާނޫނު ހަދާ މަޖިލިސް ހައުސް އޮފް ކޮމަންސްގެ ރައީސް ލިންޑްޒޭ ހޮޔިލްއާ ވެސް ބައްދަލުކުރައްވައިފަ އެވެ.

އެ ބައްދަލުކުރެއްވުން ބޭއްވީ ލިންޑްޒޭ ހޮޔިލްގެ ރަސްމީ ގެކޮޅުގަ އެވެ.

"ދިވެހިރާއްޖެ އާއި އިނގިރޭސިވިލާތާ ދެމެދުގައި ދެމެހެއްޓެނިވި ގޮތެއްގައި ގުޅުން ބަދަހިވެފައި އޮތްކަން ފާހަގަކުރައްވައި، ހާއްސަކޮށް ތިމާވެށި ހިމާޔަތް ކުރުމާއި ދެމެހެއްޓެނިވި ފަތުރުވެރިކަމާއި މަސްވެރިކަމާއި ޑިމޮކްރެޓިކް ވެރިކަން ކުރިއެރުވުން ފަދަ ދާއިރާތަކުން، ދޭދޭ ގުޅުން ބަދަހިކުރުމާ ބެހޭގޮތުން، މިއަދުގެ މި ބައްދަލުކުރެއްވުމުގައި ވަނީ މަޝްވަރާކުރައްވާފަ އެވެ،" ރައީސް އޮފީހުން ބުންޏެވެ.

އިނގިރޭސި ވިލާތާއި ރާއްޖޭގެ ގާނޫނު ހަދާ މަޖިލިހުގެ މެންބަރުންގެ މައްޗަށް އެކުލަވާލާފައިވާ އޯލް ޕާޓީ ޕާލިމެންޓަރީ ގްރޫޕް (އޭޕީޕީޖީ)ގެ ބައްދަލުވުމެއްގައި ވެސް ރައީސް މުއިއްޒު އިއްޔެ ބައިވެރިވެވަޑައިގަތެވެ.

އެ ގުރޫޕުގެ ކޯޗެއާ، ޔާސްމީން ގުރެއިޝީގެ ވާހަކައިގައި، ތަރައްގީވަމުން އަންނަ ކުދި ޖަޒީރާ ގައުމުތަކަށް ކުރިމަތިވެފައިވާ ގޮންޖެހުންތައް ހައްލުކުރުމަށް ބައިނަލްއަގުވާމީ ފަރާތްތަކުގެ ޒިންމާގެ މައްޗަށާއި އެފަދަ ގައުމުތަކަށް ފޯރުކޮށްދޭން ޖެހޭ މާލީ އަދި ފަންނީ އެހީތެރިކަމާއި ބައިނަލްއަގުވާމީ އެއްބާރުލުމުގެ މައްޗަށް އަލިއަޅުވައިލެއްވި ކަމަށް ރައީސް އޮފީހުން ބުންޏެވެ.

ރައީސްގެ ވާހަކަފުޅުގައި، ދެ ގައުމުގެ މެދުގައި އޮތް ބަދަހި ގުޅުމަކީ އިހުތިރާމާއި އުސޫލުތަކެއްގެ މައްޗަށް ބިނާވެފައިވާ ގުޅުމެއް ކަމަށާއި އެ ގުޅުންތައް އިތުރަށް ހަރުދަނާކުރުމަށް ރާއްޖެ އިން އިސްކަންދޭނެ ކަމަށް ވިދާޅުވި އެވެ.

"އަދި، ދިވެހިރާއްޖޭގެ އަދުލު އިންސާފުގެ ދާއިރާ އާއި ޑިމޮކްރަސީ ހަރުދަނާކުރުމާއި މޫސުމީ ބަދަލުތަކަށް ވިލުންތެރިވުމާއި ދިފާއީ ދާއިރާ ހަރުދަނާ ކުރުމާއި މި ދާއިރާތަކުން ކެޕޭސިޓީ އިތުރުކުރުމުގައި އިނގިރޭސި ވިލާތުން ފޯރުކޮށްދެމުން އަންނަ އެހީތެރިކަމަށް ރައީސުލްޖުމްހޫރިއްޔާ ޝުކުރު އަދާކުރެއްވި އެވެ،" ރައީސް އޮފީހުން ބުންޏެވެ.