ރައީސް މުއިއްޒުގެ ދެކަނބަލުން ނުރަސްމީ ދަތުރުފުޅެއްގައި އިނގިރޭސި ވިލާތަށް

ރައީސް ޑރ. މުހައްމަދު މުއިއްޒުގެ ދެކަނބަލުން ނުރަސްމީ ދަތުރުފުޅެއްގައި ރޭ އިނގިރޭސި ވިލާތަށް ފުރާވަޑައިގެންފި އެވެ.

ރައީސް އޮފީހުން ބުނީ، އެ ދަތުރުފުޅުގެ ހުރިހާ ހަރަދެއް ކުރައްވާނީ އެ މަނިކުފާނު އަމިއްލަފުޅަށް ކަމަށެވެ. އޭގެ ތެރޭގައި އިދާރީ މަސައްކަތްޕުޅުތަކުގެ ހަރަދާއި އާއިލާ އާއި އަމިއްލަފުޅު ކަންކަން ވެސް ހިމެނޭ ކަމަށް އެ އޮފީހުން ބުންޏެވެ.

ރައީސް މުއިއްޒު ރާއްޖެ އިން ބޭރަށް ކުރައްވާ ރަސްމީ ދަތުރުފުޅުތަކުގެ ހުރިހާ ހަރަދެއް މަގާމާ ހަވާލުވީއްސުރެ ގެންދަވަނީ އާންމު ކުރައްވަމުންނެވެ. އެއީ ރަސްމީ ދަތުރުފުޅުތަކުގެ ހުރިހާ ހަރަދެއް އާންމު ކުރައްވާ ރާއްޖޭގެ ފުރަތަމަ ރައީސް ވެސް މެ އެވެ.

ރައީސް އިނގިރޭސި ވިލާތަށް ފުރާވަޑައިގަތީ ރައްޔިތުންގެ މަޖިލީހުގެ މެންބަރުން އިންތިހާބުވުމަށް ފަހު، ސިޔާސީ ޕާޓީ ބަދަލުކޮށްފި ނަމަ ނުވަތަ ޕާޓީން ވަކިކޮށްފި ނަމަ މަޖިލީހުގެ މެންބަރުކަން ގެއްލޭ ގޮތަށް ގާނޫނުއަސާސީ އަށް ރައްޔިތުންގެ މަޖިލިހުން އިއްޔެ ގެނައި އިސްލާހު ތަސްދީގު ކުރެއްވުމަށް ފަހު އެވެ.