ކިނބިދޫގެ މިއަހަރުގެ "ބޮޑު ކުނބުސް" ތައްޔާރުކުރީ އުރީދޫގެ އެހީއާ އެކު

ކޮންމެ ރަށެއްގައި ވެސް އީދަށް ހާއްސަ ސަގާފަތްތަކާއި އާދަކާދަތަކެއް ހުރެ އެވެ. މި ސަގާފަތްތަކާއި އާދަކާދަތަކަކީ އެ ރަށެއްގެ ތާރީހުގެ ބޮޑު ބައެކެވެ. އަދި މިއީ ކޮންމެ ރަށެއްގައި ވެސް އެކަކު އަނެކެއްގެ މެދުގައި ޒަމާނުއްސުރެ އޮންނަ ލޯތްބާއި އެއްބައިވަންތަކަން އާލާކޮށްދީ އީދުގެ ރޫހު ދިރުވައިދޭ ކަންތައްތަކެވެ. ތ. ކިނބިދޫއިން ކޮންމެ އަޟްހާ އީދަކަށް ތައްޔާރު ކުރާ "ބޮޑު ކުނބުސް" އަކީ އެފަދަ ހާއްސަ ސަގާފަތެކެވެ.

"ބޮޑު ކުނބުސް" އަކީ އަޟްހާ އީދުގެ ތިން ދުވަސް ކުރިން ރަށުގެ އެންމެންހެން ނުކުމެ ތައްޔާރުކުރާ ބޮޑު މެޓާގަނޑެކެވެ. މި މެޓާގަނޑު ތައްޔާރުކުރުމަށް ތަކެތި ހޯދުމުން ފެށިގެން, ތައްޔާރުކޮށް ނިންމަނީ ވެސް ރަށުގެ ކުދި ބޮޑު އެންމެން އެކުވެގެންނެވެ. ކިނބިދޫގެ "ބޮޑު ކުނބުސް" އަކީ ކިހިނެތް ކޮންއިރަކު ފެށުނު ސަގާފަތެއްކަން ރަށުގެ ދޮށީ އުމުރުގެ މީހުންނަށް ވެސް ކިޔައިދޭން ދައްޗެވެ. ކޮންމެ މީހެއްގެ ވެސް އެންމެ ދުރު ހަނދާނުގައި ވެސް ހުންނަނީ އަޟްހާ އީދަށް ރަށުގެ އެންމެން އެކުވެ "ބޮޑު ކުނބުސް" ތައްޔާރުކުރާ ކަމެވެ. މިއީ އެރަށުގެ ތާރީހުގެ ވެސް ބޮޑު ބައެކެވެ.

"ބޮޑު ކުނބުސް" ތައްޔާރު ކުރުމުގައި ފުށާއި ދިޔާހަކުރާއި ހަކުރު އަދި ގަބުޅި ފަދަ އެކި ބާވަތްތައް ބޭނުން ކުރެ އެވެ. މި މެޓާގަނޑު ތައްޔާރު ކުރަނީ ރަށުގެ ރައްޔިތުން ހާއްސަކޮށްފައިވާ ވަކި ސަރަހައްދަކަށް ނުކުމެ ތިބެ އެވެ. އެ ތަނުގައި "ބޮޑު ކުނބުސް" ކެއްކުމުގައި އެއްބަޔަކު އުޅޭއިރު, އެ ކެއްކުމުގެ އިރުޝާދުތައް ދިނުމުގައި ރަށުގެ ދުވަސްވީ މީހުން ބައިވެރިވެ އެވެ. އަދި މި ތައްޔާރުކުރާ ގޮތް ބަލައި ދަސްކުރުމުގައި ރަށުގެ ކުޑަކުދިންނާއި ޒުވާނުން ބައިވެރިވެ އެވެ.

ރަށުގެ ގިނަ ބައެއްގެ ޝާމިލުވުމާ އެކު ތައްޔާރުކުރާ "ބޮޑު ކުނބުސް" ކެއްކުމަށް ފަހު ދަރު ޖައްސާ ފިހެ ނިންމުމަށްފަހު އަދި ބަންދުކޮށް ރަށުގެ ކޮންމެ ގެއަކަށް ވެސް ވާ ވަރަށް އެ ފޮތިފޮތިކޮށް ބަހަ އެވެ. މިއަހަރު ކިނބިދޫގެ "ބޮޑު ކުނބުސް" ތައްޔާރުކުރީ އުރީދޫގެ އެހީއާ އެކު އެވެ.

އުރީދޫ އަކީ ރާއްޖޭގެ ސަގާފަތާއި އާދަކާދަތައް ދިރުވުމުގެ އެކި ހަރަކާތްތަކުގައި ބައިވެރިވެ އެއްބާރުލުން ދޭ ކުންފުންޏެވެ. އެގޮތުން އެކި ރަށްރަށުގައި މިއަހަރު ކުރިއަށް ދިޔަ އީދު ކުޅިވަރުތަކާއި އީދު ސައި ފަދަ ހަރަކާތްތަކަށް އުރީދޫން ވަނީ އެހީވެފަ އެވެ. އޭގެ އިތުރުން އުރީދޫ އަކީ ކޮންމެ އަހަރަކު ވެސް ރާއްޖޭގައި އީދު ހަދިޔާ ބެހުމުގެ ސަގާފަތް ދިރުވުމުގައި ބައިވެރިވެ, އީދު ހަދިޔާ ބަހާ ކުންފުންޏެކެވެ. އުރީދޫން ރާއްޖޭގެ ސަގާފަތް ދިރުވުމުގެ މަސައްކަތްތަކުގައި އަބަދުވެސް އެއްބާރުލުން ދޭނެ ކަމަށް އެ ކުންފުނިން ބުންޏެވެ.