ޖެޓަކީ ޓްރަމްޕަށް ދޭ ހަދިޔާއެއް ނޫން، އެ ދެނީ ސަރުކާރަށް: ގަތަރު

އެމެރިކާގެ ރިޔާސީ މަތިންދާބޯޓު، އެއާ ފޯސް ވަން، ގެ ގޮތުގައި ބޭނުންކުރުމަށް ގަތަރުން ހަދިޔާކުރަން ނިންމާފައިވާ ލަގްޒަރީ ޖެޓަކީ ރައީސް ޑޮނަލްޑް ޓްރަމްޕަށް ދޭ ހަދިޔާއެއް ނޫން ކަމަށާއި އެއީ އެއް ސަރުކާރުން އަނެއް ސަރުކާރަށް ދޭ އެއްޗެއް ކަމަށް ގަތަރުގެ ބޮޑުވަޒީރު ވިދާޅުވެއްޖެ އެވެ.

ޓްރަމްޕު މެދުއިރުމައްޗަށް ކުރައްވަމުން ގެންދަވާ ދަތުރުގައި އިއްޔެ ގަތަރަށް ވަޑައިގެންފައި ވާއިރު ގަތަރުން 400 މިލިއަން ޑޮލަރުގެ ޖެޓެއް ދޭން ނިންމާފައި ވާތީ އެކަމަށް ވަނީ ވަރަށް ބޮޑަށް ފާޑުކިޔުން އަމާޒުވެފަ އެވެ. އެ ޖެޓް އެއާ ފޯސް ވަންގައި ބޭނުންކުރުމަށް ފަހު ޓްރަމްޕުގެ ވެރިކަން ނިމުމަށް ފަހު އަމިއްލަ އެއްޗެއްގެ ގޮތުގައި ވެސް ބޭނުންކުރުމުގެ ވިސްނުން ގެންގުޅޭ ކަމަށް މީޑިއާ ރިޕޯޓްތައް ބުނެ އެވެ.

ނަމަވެސް ސީއެންއެން އަށް ދެއްވި އިންޓަވިއުއެއްގައި ގަތަރުގެ ބޮޑުވަޒީރު ޝައިހް މުހައްމަދު ބިން އަބްދުއްރަހްމާން ބިން ޖާސިމް އައް ސާނީ ވިދާޅުވީ މި މުއާމަލާތުގައި ކަންބޮޑުވާންޖެހޭ ކަމެއް ނެތް ކަމަށެވެ.

"މިއީ ދެ ސަރުކާރުގެ ދެމެދުގައި ހިންގާ މުއާމަލާތެއް. މިއީ އެމެރިކާ އަދި ގަތަރުގެ ފަރާތުން ބެލި ނަމަވެސް އަމިއްލަ ހައިސިއްޔަތެއް ހިމެނޭ މުއާމަލާތެއް ނޫން. މިކަން ކުރަނީ [އެއްގައުމުގެ] ޑިފެންސް މިނިސްޓްރީ އާއި [އަނެއް ގައުމުގެ] ޑިފެންސް މިނިސްޓްރީއާ ދެމެދު،" މިއީ ގަތަރުގެ ޝާހީ އާއިލާއިން ޓްރަމްޕަށް ދޭ ހަދިޔާއެއް ކަމަށް ބުނާ ވާހަކަ ދޮގުކުރައްވައި ބޮޑުވަޒީރު ވިދާޅުވި އެވެ.

މި އަގުބޮޑު ހަދިޔާ އަކީ އެމެރިކާ އާއި ގަތަރުގެ ގުޅުން ރަނގަޅުކުރުމަށް ދޭ ރިޝްވަތެއް ކަމަށް ބުނާތީ ބޮޑުވަޒީރު ވަނީ އެ ވާހަކައަށް ވެސް ރައްދު ދެއްވައިފަ އެވެ.

"ގަތަރަކީ އަބަދުވެސް އެމެރިކާގެ އިތުބާރު އޮންނަ އެކުވެރިއެއް. އަބަދުވެސް އެމެރިކާއަށް އަންނަނީ ބޭނުންވާ ވަގުތު އެހީތެރިވަމުން. ގަތަރުން ގަބޫލުކުރަނީ މި އެކުވެރި ގުޅުމަކީ އެއްކޮޅުން އެކަނި ކަންތައް ކޮށްދޭންޖެހޭ އެކުވެރިކަމެއް ނޫން ކަމަށް،" ޝައިހް މުހައްމަދު ވިދާޅުވި އެވެ.

ހަދިޔާކުރަން ނިންމާފައިވާ ބޮއިން 8-747 ލަގްޒަރީ ޖަމްބޯ ޖެޓާ ގުޅޭ ގޮތުން ހުރި ކަންބޮޑުވުންތަކާ ގުޅޭ ގޮތުން އިތުރަށް އޭނާ ވިދާޅުވީ މި ހަދިޔާއާ ގުޅޭ ގާނޫނީ ކަންކަން އަދިވެސް ފުރިހަމަނުވާ ކަންކަމާއި އެހެންވެ އަދި މިއީ އެއްކޮށް ކަށަވަރު ވެސް ނުވާ މުއާމަލާތެއް ކަމަށެވެ.

މިހާރު އެއާ ފޯސް ވަންގައި ބޭނުންކުރާ ބޮއިން 747-200ބީ މަރުކާގެ ޖެޓްތަކާ މެދު ހިތްހަމަނުޖޭކަން ޓްރަމްޕު ކުރިން ވެސް ހާމަކުރައްވާފައިވެ އެވެ. ބޮއިން ވަނީ 2024 ވަނަ އަހަރު ނިމުމުގެ ކުރިން 747-8 މަރުކާގެ ދެ މަތިންދާބޯޓު 3.9 ބިލިއަން ޑޮލަރުގެ އަގެއްގައި ސަޕްލައިކޮށްދޭން 2018 ވަނަ އަހަރު އެއްބަސްވެފަ އެވެ. އެކަމަކު މި ލިބުން ލަސްވާތީ ޓްރަމްޕް ވަނީ ބޮއިން ނޫން އެހެން ގޮތެއް ހޯދަން ވިސްނަވާ ކަމަށް ވެސް ވިދާޅުވެފަ އެވެ.