ގަތަރަށް އިޒްރޭލުން ދިން ހަމަލާގައި ހަ މީހަކު މަރުވި، ހަމާސްގެ ލީޑަރުން ސަލާމަތްވި

އިޒްރޭލުން އިއްޔެ ގަތަރުގެ ވެރިރަށް ދޯހާގައި ހަމާސްގެ ލީޑަރުންނަށް އަމާޒުކޮށް ދިން ހަމަލާގައި އެ ބޭފުޅުން ސަލާމަތްވި ކަމަށާއި އެކަމަކު ހަ މީހަކު މަރުވި ކަމަށް އެ ޖަމާއަތުން ބުނެފި އެވެ.

މި ހަމަލާގެ މައްސަލަ ބޮޑުވެ އެމެރިކާގެ ރައީސް ޑޮނަލްޑް ޓްރަމްޕު ވަނީ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫއަށް ވެސް ނުރުހުމުގެ ރާގުގައި ވާހަކަ ދައްކަވައިފަ އެވެ. އަދި މުޅި ދުނިޔެއިން ދަނީ ހަމަލާ ކުށްވެރިކުރަމުންނެވެ.

ހަމާސް އިން ބުނީ ހަމަލާގައި މަރުވި މީހުންގެ ތެރޭގައި އެ ޖަމާއަތުން މަޝްވަރާތަކުގައި އުޅުއްވާ ޚަލީލް އަލް ހައްޔާގެ އެހީތެރިއަކާއި ފިރިހެން ދަރިއަކު ހިމެނޭ ކަމަށެވެ. ހަމަލާގައި ލީޑަރުން ސަލާމަތްވި ކަމަށް ބުންޏެވެ. ގަތަރުން ބުނި ގޮތުގައި އެ ގައުމުގެ ސެކިއުރިޓީ އޮފިސަރަކު ވެސް ވަނީ މަރުވެފަ އެވެ.

މަރުވި މީހުންގެ ތެރޭގައި ދެން ހިމެނެނީ ބޮޑީގާޑުންގެ ތިން މީހަކު ކަމަށް ހަމާސް އިން ބުންޏެވެ.

ވައިޓް ހައުސް އިން ބުނި ގޮތުގައި ގަތަރަކީ އެމެރިކާގެ ގާތް އެކުވެރިއަކަށް ވާއިރު އިޒްރޭލުން މި ދިން ހަމަލާއަށް ޓްރަމްޕު ތާއީދެއް ނުކުރައްވަ އެވެ. އަދި ހަމަލާދޭން އުޅޭ ކަމުގެ އިންޒާރު އެމެރިކާއިން ގަތަރަށް ކުރިން ދިން ކަމަށް ވެސް ބުންޏެވެ.

ނަމަވެސް ގަތަރުން ބުނީ އެމެރިކާއިން ދުރާލައި އިންޒާރު ދިން ކަމަށް ބުނާ ވާހަކަ އަކީ ދޮގެއް ކަމަށެވެ. ހަމަލާގެ ވާހަކަ އެމެރިކާއިން އެންގީ އިޒްރޭލުން ހަމަލާދޭން ފެށި ފަހުން ކަމަށް ގަތަރުން ބުންޏެވެ.

ގަތަރުގެ ބޮޑުވަޒީރު ޝައިހް މުހައްމަދު ބިން އަބްދުއްރަހްމާން އަލް ތާނީ ނޫސްވެރިންގެ ބައްދަލުވުމެއްގައި ވިދާޅުވީ އިޒްރޭލުގެ މި ނޭއްގާނީ އަމަލުގެ ރައްދު ދިނުމުގެ ހުރިހާ ހައްގެއް ގަތަރަށް ލިބިގެންވާ ކަމަށާއި މިއީ ސަރަހައްދަށް ވަރަށް މުހިންމު ވަގުތެއް ކަމަށެވެ.

ގަތަރުން ބުނި ގޮތުގައި އިޒްރޭލުގެ ހަމަލާތައް ހަމާސްގެ ލީޑަޝިޕްގެ ބޭފުޅުން އުޅުއްވާ އެކި ގެތަކަށް އަމާޒުކުރި އެވެ.

އިޒްރޭލުގެ ބޮޑުވަޒީރު ވަނީ މި ހަމަލާއަކީ ހޯމަ ދުވަހު ގުދުސްގައި ބަޑިން ހަމަލާދީ އިޒްރޭލުގެ ހަ މީހަކު މަރާލުމުން އެކަމުގެ ބަދަލުހިފުމަށް ދޭން އެންގި ހަމަލާއެއް ކަމަށް ބުނެފަ އެވެ. މި ހަމަލާގެ ޒިންމާ ހަމާސް އިން ވަނީ އުފުލައިފަ އެވެ.