Roadha Mihaaru

ކުއްޔަށް ދޫކުރާ ރަށްތަކުގައި މަސައްކަތް ނުހިނގާނަމަ އެއްބަސްވުން ބާތިލުކުރެވޭނެ: އުޝާމް

އެކި ބޭނުންތަކަށް ކުއްޔަށް ދޫކޮށްފައި ހުންނަ ފަޅުތަކާއި ރަށްތަކުގައި އެއްބަސްވުމާ އެއްގޮތަށް މަސައްކަތް ނުކުރާނަމަ އެއްބަސްވުންތައް ބާތިލް ކުރެވޭނެ ކަމަށް ބަންޑާރަ ނައިބު އަހުމަދު އުޝާމް ވިދާޅުވެއްޖެ އެވެ.

މަސައްކަތް ނުހިނގާ ރަށްތަކުގެ އެއްބަސްވުން ބާތިލުކުރާނެ
ފާތިމަތު އަޖްފާން
ފާތިމަތު އަޖްފާން

13 މެއި 2025

އެކި ބޭނުންތަކަށް ކުއްޔަށް ދޫކޮށްފައި ހުންނަ ފަޅުތަކާއި ރަށްތަކުގައި އެއްބަސްވުމާ އެއްގޮތަށް މަސައްކަތް ނުކުރާނަމަ އެއްބަސްވުންތައް ބާތިލް ކުރެވޭނެ ކަމަށް ބަންޑާރަ ނައިބު އަހުމަދު އުޝާމް ވިދާޅުވެއްޖެ އެވެ.

ރޭ ޕީއެސްއެމްގައި ބޭއްވި އަހާ ފޯރަމްގައި އެގްރިކަލްޗަރު މިނިސްޓަރު މަރިޔަމް މާރިޔާއާ މީހަކު ސުވާލު ކުރެއްވީ ސަން ޓްރެވަލްސް ކުންފުންޏަށް ކުއްޔަށް ދޫކޮށްފައި އޮތް ދެ ރަށުގެ [ނ. އުއްދޫ އާއި މިނާވަރު] ތެރެއިން އެއް ރަށުގެ އެއްބަސްވުން ބާތިލުކޮށް، އަނެއް ރަށުގެ އެއްބަސްވުން އާ ނުކޮށްދިނުމާ ގުޅޭގޮތުންނެވެ.

އެ ސުވާލަށް ޖަވާބު ދެއްވަމުން މާރިޔާ ވިދާޅުވީ އެ މައްސަލާގައި އަމަލު ކުރެއްވީ ބަންޑާރަނައިބުގެ ލަފާގެ މަތިން ކަމަށެވެ.

އުޝާމް ވިދާޅުވީ ކުއްޔަށް ދޫކުރާ ކޮންމެ ރަށެއްގެ އެއްބަސްވުން ވެސް އެއްބަސްވުމާ އެއްގޮތަށް މަސައްކަތް ނުކުރާނަމަ ބާތިލް ކުރެވޭނެ ކަމަށެވެ.

"އަޅުގަނޑުމެންނަށް އެބަ ދިމާވޭ، ހަމަ އެކަނި ދަނޑުވެރިކަމަށް ދޫކޮށްފައި ހުރި ރަށްރަށެއް ނޫން. އެގްރިމެންޓުގައި ހުރި ކަންކަން ނުކޮށް، އެހެން ކަންކަން ކުރުމަށް އެބަ ބޭނުން ކުރޭ. އަޅުގަނޑުމެން ސަރުކާރުން އެއްވެސް ތަފާތު ކުރުމެއް ނުގެންގުޅޭނަން. އަޅުގަނޑުމެން އެ ކަހަލަ ހުރިހާ މައްސަލަތަކެއް ބަލާނަން،" އޭނާ ވިދާޅުވި އެވެ.

މަޝްހޫރު ވިޔަފާރިވެރިޔާ އަދި ދ. މީދޫ ދާއިރާ މަޖިލިސް މެމްބަރު އަހުމަދު ސިޔާމް މުހައްމަދު--

މަޝްހޫރު ވިޔަފާރިވެރިޔާ އަދި ދ. މީދޫ ދާއިރާ މަޖިލިސް މެމްބަރު އަހުމަދު ސިޔާމް މުހައްމަދު--

ދަނޑުވެރިކަމުގެ އިތުރުން ޓޫރިޒަމްގެ ބޭނުންތަކަށް ދޫކޮށްފައިވާ ފަޅާއި ރަށްރަށުގެ ތެރެއިން ވެސް މަސައްކަތް ހިނގަމުންނުދާ ތަންތަން ގިނަ ކަމަށާއި މިހާރު އެފަދަ ތަންތަނުގެ މައްސަލަ ރިވިއު ކުރަމުން އަންނަ ކަމަށް އުޝާމް ވިދާޅުވި އެވެ.

އުޝާމް ވިދާޅުވި ގޮތުގައި، ސަން ޓްރެވަލްސަށް ކުއްޔަށް ދޫކުރި ދެ ރަށް ދޫކޮށްފައިވަނީ ވަކި ޕްރޮޕޯސަލެއް ހުށަހެޅުމުން ވަކި މަސައްކަތްތަކެއް ކުރުމަށް އެއްބަސްވުމެއް އެކުލަވާލެވިގެންނެވެ. ނަމަވެސް ސަރުކާރުން ކުރިއަށްގެންދިޔަ ސާވޭތަކުން އެ ރަށްރަށުގައި އެއްބަސްވުމާ އެއްގޮތަށް މަސައްކަތް ކުރިއަށް ނުގެންދާކަމަށް އޭނާ ވިދާޅުވި އެވެ.

"އުއްދޫއަކީ 25 އަހަރަށް ކުއްޔަށް ދޫކޮށްފައިވާ ރަށެއް. އެއީ ކުއްޔަށް ދޫކޮށްފައި އޮތް ރަށެއް. މުއްދަތު ހަމަވުމުން އެއްބަސްވުން އާ ނުކުރަން ސަރުކާރުން ނިންމީ. ރަށް ސަރުކާރަށް ނެގީކީ ނޫން،" އޭނާ ވިދާޅުވި އެވެ.

މިނާވަރުގައި ވެސް އެއްބަސްވުމާ އެއްގޮތަށް މަސައްކަތް ހިނގަމުންނުދާތީ އެއްބަސްވުމުގައިވާ ހުރިހާ އިޖުރާއަތްތަކެއް ފުރިހަމަކޮށް، ނޯޓިސްދިނުމަށްފަހު އެއްބަސްވުން ބާތިލުކުރީކަމަށް ބަންޑާރަ ނައިބު ވިދާޅުވި އެވެ.

އެކަމަކު، ސިޔާމްގެ ޕާޓީ އެމްޑީއޭގެ ޑެޕިއުޓީ ލީޑަރު މުހައްމަދު އައްބާސް އެކްސްގައި ކުރެއްވި ޕޯސްޓެއްގައި ވިދާޅުވި ގޮތުގައި، އެއްބަސްވުން ބާތިލުކުރަން ސަރުކާރުން ނިންމީ ބަދަލު ދިނުމަކާ ނުލަ އެވެ.

އޭނާ ވިދާޅުވިގޮތުގައި 25 އަހަރުގެ މުއްދަތަށް ދޫކޮށްފައިވާ މިނާވަރުގެ އެއްބަސްވުން ބާތިލް ކުރުމުގެ ނޯޓިސް ފޮނުވިއިރު ބާކީ އަށް އަހަރު އަދި އެބައޮތެވެ.

ސިޔާމްގެ އެމްޑީއޭ އެކު ސަރުކާރު ކޯލިޝަނުން ކުރިން މަސައްކަތް ކުރަމުން އައި ނަމަވެސް އެންމެ ފަހުން ބޭއްވި މީޑިއާ ބްރީފިންގައި ނޫސްވެރިން ސުވާލު ދެންނެވުމުން ރައީސް ޑރ. މުހައްމަދު މުއިއްޒު ވިދާޅުވެފައި ވަނީ ސަރުކާރު ކޯލިޝަންގައި މިހާރު އެ ޕާޓީ ނެތް ކަމަށެވެ.