ގަތަރުން ހަދިޔާކުރާ ޖެޓް ގަބޫލު ނުކުރުމަކީ މޮޔަކަމެއް: ޓްރަމްޕު

އެމެރިކާގެ ރައީސުން ދަތުރުކުރެއްވުމަށް ހާއްސަ މަތިންދާބޯޓު، އެއާ ފޯސް ވަންގެ ގޮތުގައި ބޭނުންކުރުމަށް ގަތަރުން ހަދިޔާކުރަން ނިންމާފައިވާ ޖެޓް ގަބޫލު ނުކޮށް ދޫކޮށްލުމަކީ މޮޔަ ކަމަކަށް ނޫނީ ނުވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕު ވިދާޅުވެއްޖެ އެވެ.

އަގުބޮޑު މި ހަދިޔާ ގަބޫލުކުރުމަކީ ސުލޫކީ މައްސަލައެއް ކަމަށް ބުނެ އެތައް ބަޔަކު ކަންބޮޑުވުން ފާޅުކުރި ނަމަވެސް ހަރުކަށިކަމާ އެކު އެކަމަށް އިންކާރު ކުރައްވަމުން ޓްރަމްޕު ވިދާޅުވީ ގަތަރުން އެ ދެނީ ރަނގަޅު ހަދިޔާއެއް ކަމަށާއި އެއީ ވަރަށް ރަނގަޅު ނިންމުމެއް ކަމަށެވެ.

"މިވަރުގެ [ރަނގަޅު] ހުށަހެޅުމަކަށް އިންކާރުކުރާ މީހަކަށް ދުވަހަކު ވެސް ނުވާނަން. މި ބުނީ، ނޫނެކޭ، މިހާ އަގުބޮޑު ހަދިޔާއެއް ހިލޭ ބޭނުމެއް ނެތޭ ބުނާހާ މޮޔަ މީހަކަށް އަޅުގަނޑު ނުވާނަމޭ،" އުމުރުން 78 އަހަރުގެ ބިލިއަނަރު ވިދާޅުވި އެވެ.

ވައިޓް ހައުސް އިން ވެސް ބުނެފައިވަނީ ގަތަރުން ދޭ ލަގްޒަރީ ޖެޓަކީ އެއްވެސް ކަމެއްގެ ބަދަލުގައި ދޭ އެއްޗެއް ނޫން ކަމަށާއި އެހެންވެ ހަދިޔާއެއްގެ ގޮތުގައި އެ ގަބޫލުކުރުމުގައި އެއްވެސް މައްސަލައެއް ނެތް ކަމަށެވެ.

ގަތަރުގެ ޝާހީ އާއިލާއިން ޓްރަމްޕަށް ހަދިޔާކުރާ ބޮއިން 8-747 ޖަމްބޯ ޖެޓް ގަބޫލުކުރަން ނިންމާފައި ވާއިރު ރިޔާސީ މަތިންދާބޯޓުގެ ގޮތުގައި ބޭނުންކުރުމަށް ބޮއިން ކުންފުންޏަށް އޯޑަރު ދީގެން ހަދަމުން ގެންދާ ދެ ބޯޓުގެ މަސައްކަތް ނުނިމި ވަނީ ދިގުލައިފަ އެވެ.

އެމެރިކާގެ ގާނޫނުއަސާސީ ބުނާ ގޮތުން ރަސްކަލުންނާއި އަމީރުން އަދި ބޭރު ދައުލަތްތަކުން ދޭ ހަދިޔާ ގަބޫލުކުރުމަކީ އެމެރިކާ ސަރުކާރުގެ އޮފިޝަލުންނަށް މަނާ ކަމެކެވެ. އެކަން ބަޔާންކޮށްފައި އޮންނަނީ ސަރުކާރު މުވައްޒަފުންނަށް މުސާރަ އާއި އިނާޔަތްތައް ދިނުމާ ބެހޭ ގޮތުން އޮންނަ މާއްދާއެއްގަ އެވެ.