ރާއްޖޭގެ ސްޕޯޓްސް ފިޝިންގެ އެމްބެސެޑަރަކަށް "ފްލައި" ނަވާރޯ ހަމަޖައްސައިފި

ސްޕޯޓްސް ފިޝިން ޓޫރިޒަމް މަންޒިލެއްގެ ގޮތުގައި ރާއްޖެ އިޝްތިހާރުކުރުމުގެ ގޮތުން ރާއްޖޭގެ ގްލޯބަލް އެމްބެސެޑަރަކަށް ބައިނަލްއަގުވާމީ ފެންވަރުގައި ފާހަގަކޮށްލެވޭ ކުޅިވަރުގެ މަސްވެރިކަމުގެ ތަޖުރިބާކާރު އަދި ފްލައި ޒޯން ފިޝިންގެ ބާނީ ރޮބަޓް "ފްލައި" ނަވާރޯ ހަމަޖައްސައިފި އެވެ.

މިއީ ބައިނަލްއަގުވާމީ ސްޕޯޓް ފިޝިން ކޮމިއުނިޓީގައި ރާއްޖޭގެ ކަނޑުގެ މާހައުލަށް ހުރި ޝައުގުވެރިކަން އިތުރުކޮށް, ދެމެހެއްޓެނިވި މަސްވެރިކަމުގެ މަންޒިލެއްގެ ގޮތުގައި ރާއްޖޭގެ މަގުބޫލުކަން އިތުރުކުރުމަށް އެޅިގެންދާ މުހިންމު ފިޔަވަޅެއްގެ ގޮތުގައި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)އިން ވަނީ ސިފަކޮށްފަ އެވެ.

ކުޅިވަރު މަސްވެރިކަމުގެ ސިނާއަތުގައި 30 އަހަރަށް ވުރެ ގިނަ ތަޖުރިބާ ލިބިފައިވާ، ފްލައި ނަވާރޯ އަކީ ހަ ބައްރަކަށް ދަތުރުކޮށް، ދުނިޔޭގެ އެންމެ ޝަރަފުވެރި މުބާރާތްތަކުގައި ބައިވެރިވެފައިވާ ކުޅަދާނަ އެންގަލަރެކެވެ.

މީގެއިތުރުން، ނަވާރޯ އަކީ، ފްލައި ޒޯން ފިޝިންގެ ބާނީ އަދި ދުނިޔޭގެ ހަމައެކަނި "ބްލޫ މާލިން" މުބާރާތް, "ބްލޫ މާލިން ވޯލްޑް ކަޕް" ގެ ކޯ ކްރިއޭޓަރުގެ ހައިސިއްޔަތުން މީޑިއާ އާއި އިވެންޓް ޕްރޮޑަކްޝަން ގެ ޒަރިއްޔާއިން އެންގަލަރުންގެ ކޮމިއުނިޓީ ބަދަހިކޮށް ފުޅާކުރުމުގެ މަސައްކަތުގައި ފާހަގަކޮށްލެވޭ މަގުބޫލު އޭންގަލަރެކެވެ.

އަދި ތަޖުރިބާއާއި ހުނަރާއި, މަގުބޫލުކަމަށް ބިނާކޮށް, ބައިނަލްއަގުވާމީ އެންގަލަރުންގެ މެދުގައި މަސްވެރިކަމަށް އެންމެ އެކަށޭނަ މަންޒިލްތަކުގެ މެޕް ގައި ދިވެހިރާއްޖޭގެ ނަން ފަވާލަން އެންމެ އެކަށޭނަ އެއް ޝަހުސިއްޔަތެވެ.

އެމްއެމްޕީއާރުސީން ބުނީ، މި އެމްބެސެޓަރޝިޕްގެ ދަށުން ފުރަތަމަ ހަރަކާތެއްގެ ގޮތުން ވިޒިޓްމޯލްޑިވްސްއިން ބާއްވާ ބުރުނުބޮމަ ގްލޯބަލް ފިޝިން މުބާރާތުގައި ނަވާރޯ ބައިވެރިވާނެ ކަމަށެވެ.

މި މުބާރާތް ކުރިއަށް ގެންދިޔުމަށް ހަމަޖެހިފައިވަނީ މެއި 2 ވަނަ ދުވަހުން މެއި 4 ވަނަ ދުވަހުގެ ނިޔަލަށެވެ. މި މުބާރާތުގައި ދުނިޔޭގެ އެކި ކަންކޮޅުތަކުގެ އެންގަލަރުން ރާއްޖޭގެ ކަނޑުގެ ސަރަހައްދުގައި, ހިބަރު، ކަންނެލި އަދި ފިޔަލަ ފަދަ ބޮޑެތި ގޭމް ފިޝް ބާވަތްތަކަށް އަމާޒުކޮށްގެން ވާދަވެރި މަސްވެރިކަމެއް ކުރުމަށް ވަނީ ހަމަޖެހިފަ އެވެ.

މި މުބާރާތުގެ އިތުރުން, ފްލައި ނަވާރޯ ގެ ތަޖުރިބާއާއި މަގުބޫލުކަން މެދުވެރިކޮށް, ދެމެހެއްޓެނިވި މެރިން ޓޫރިޒަމްގެ މަންޒިލަކަށް ރާއްޖެ ހެދުމަށް އިންޑަސްޓްރީގެ ޕާޓްނަރުންނާއެކުވެސް އިތުރު ހަރަކާތްތަކެއް ކުރިއަށް ގެންދިޔުމަށް ހަމަޖެހިފައިވާ ކަމަށް އެމްއެމްޕީއާރުސީން ބުންޏެވެ.

"ބައިނަލްއަގުވާމީ ފެންވަރުގައި ރާއްޖެ ތަމްސީލުކުރުމަކީ ލިބޭ ވަރަށް ބޮޑު ޝަރަފެއް. ރާއްޖޭގެ ކަނޑުގެ މާހައުލަކީ މުޅި ދުނިޔޭގައި ވެސް އެންމެ ހިތްގައިމު އެއް މާހައުލު. އަދި މިއީ މަސްވެރިކަމަށް ބަލާއިރު އެހެން މަންޒިލަކަށް މިއާ ވާދަ ނުކުރެވޭނެ ފަދަ ކަނޑުގެ މާހައުލެއް. މި މާހައުލު ދުނިޔެއަށް ދައްކައިދިނުމަށް އެހީތެރިވެދިނުމަކީ އަހަރެންނަށް ލިބޭ އުފަލެއް،" ނަވާރޯ ބުންޏެވެ.

އެމްއެމްޕީއާރުސީން ބުނި ގޮތުގައި، ގްލޯބަލް އެމްބެސެޑަރުގެ ހައިސިއްޔަތުން ނަވާރޯގެ ސްޓްރެޓެޖިކް މީޑިއާ އައުޓްރީޗް، އިންޓަނޭޝަނަލް ޕާޓްނާޝިޕް އަދި އޮން ދަ ގްރައުންޑް އިނީޝިއޭޓިވްތައް މެދުވެރިކޮށް ކުޅިވަރު މަސްވެރިކަމާއި މެރިޓައިމް ޓޫރިޒަމް އިންޑަސްޓްރީގައި ރާއްޖެ އިޝްތިހާރު ކުރުމުގައި އެހީތެރިވެދޭނެ އެވެ.