ރާއްޖޭގެ ޓޫރިޒަމް ދާއިރާ އަށް ހާއްސަ ޑޭޓާ ޕްލެޓްފޯމެއް

ރާއްޖޭ ޓޫރިޒަމް ޕްރޮމޯޓް ކުރުމަށް މަސައްކަތްކުރާ ކުންފުނި "ވިޒިޓް މޯލްޑިވްސް" އަށް ބޭންކް އޮފް މޯލްޑިވްސް (ބީއެމްއެލް) އާއި މާސްޓާކާޑާ ގުޅިގެން ޓޫރިޒަމް އިންސައިޓް ޑޭޓާ ޕްލެޓްފޯމެއް މިއަދު ތައާރަފުކޮށްފި އެވެ.

ބީއެމްއެލް އިން ބުނީ، އެއީ އެންމެ މި ޒަމާނުގެ "ޓޫރިޒަމް އިންސައިޓް ޑޭޓާ ޕްލެޓްފޯމް" އެއް ކަމަށެވެ.

ބީއެމްއެލް އިން ބުނިގޮތުގައި، ޓޫރިޒަމް ދާއިރާގައި ހަރަކާތްތެރިވާ މީހުންނާއި ޓޫރިސްޓުން ހަރަދުކުރުމުގެ އާދަތަކާއި އިސްކަންދޭ ކަންތައްތަކާ ގުޅޭ މައުލޫމާތު ޑޭޓާގެ އަލީގައި އެ ޕްލެޓްފޯމުން ލިބިދޭނެ އެވެ.

"މި ޑޭޓާ ބޭނުންކޮށްގެން، ފަތުރުވެރިކަމުގެ ދާއިރާގެ ވިޔަފާރިތަކަށް ކުރިއެރުމުގެ ފުރުސަތުތައް ހޯދުމަށާއި ދަތުރުގެ ކޮންމެ މަރުހަލާއެއްގައި ވެސް ފަތުރުވެރިން ކުރާ ތަޖުރިބާ އިތުރަށް ރަނގަޅު ކުރުމަށް ބޭނުންވާ މައުލޫމާތު ހޯދައި އެ މައުލޫމާތުގެ މައްޗަށް ބިނާކޮށް ރަނގަޅު ނިންމުންތައް ނިންމުމުގެ ފުރުސަތު ލިބޭނެ އެވެ،" ބީއެމްއެލް އިން ނެރުނު ބަޔާނުގައި ވެ އެވެ.

ރާއްޖޭގެ ޓޫރިޒަމް ޕްރޮމޯޓް ކުރަން ސަރުކާރުން އުފައްދާފައިވާ ކުންފުނި އެމްއެމްޕީއާރުސީގެ ނަން ވިޒިޓް މޯލްޑިވްސް ކޯޕަރޭޝަން ލިމިޓެޑަށް މިދިޔަ ޖުލައި 13 ވަނަ ދުވަހުން ފެށިގެން ބަދަލުކޮށްފަ އެވެ. ވިދިވިދިގެން ހަތަރު އަހަރު ގެއްލުމުގައި ހިންގުމަށް ފަހު، ވިޒިޓް މޯލްޑިވްސް ކުންފުނި ނުވަތަ ކުރީގެ ނަމުން ނަމަ އެމްއެމްޕީއާރުސީ އަށް މިދިޔަ އަހަރު 27 މިލިއަނަށް ވުރެ ގިނަ ރުފިޔާގެ ފައިދާއެއް ލިބުނެވެ.