ޑަބްލިއުޓީއޭގެ މުހިއްމު ދެ އެވޯޑެއް ރާއްޖެއަށް

ވޯލްޑް ޓްރެވަލް އެވޯޑްސް (ޑަބްލިއުޓީއޭ)ގެ އިންޑިއަން އޯޝަން ކެޓަގަރީގެ މި އަހަރުގެ މުހިއްމު ދެ އެވޯޑެއް ރާއްޖެއަށް ލިބިއްޖެ އެވެ.

ޓެންޒޭނިއާގައި ބޭއްވި ވޯލްޑް ޓްރެވަލް އެވޯޑްސްގެ ހަފްލާގައި ރާއްޖެއަށް ލިބުނު ދެ އެވޯޑާ ހަވާލުވީ،= އެ ކުންފުނީގެ މެނޭޖިން ޑިރެކްޓަރު އިބްރާހިމް ޝިއުރީ އެވެ.

ރާއްޖެއަށް ލިބިފައިވަނީ ޑަބްލިއުޓީއޭ އިންޑިއަން އޯޝަން ކެޓަގަރީ އިން ލީޑިން ޑެސްޓިނޭޝަން އެވޯޑާއި ލީޑިން ގްރީން ޑެސްޓިނޭޝަން އެވޯޑެވެ. މިއީ ލީޑިން ޑެސްޓިނޭޝަން އެވޯޑު ވިދި ވިދިގެން ރާއްޖެ އަށް ލިބޭ ހަ ވަނަ ފަހަރެވެ. އަދި ގްރީން ޑެސްޓިނޭޝަން އެވޯޑު ލިބޭ ދެ ވަނަ އަހަރެވެ.

ވޯލްޑް ޓްރެވަލް އެވޯޑްސް ދޭން ފެށީ 1993 ގަ އެވެ. އެ އެވޯޑްގެ މަގުސަދަކީ ދުނިޔޭގެ ފެންވަރުގައި ދަތުރުފަތުރާއި ޓޫރިޒަމްގެ ސިނާއަތުގެ ހުރިހާ ދާއިރާއަކުން ހޯދާ ކާމިޔާބީތައް ފާހަގަކުރުމެވެ.

އެ ޝަރަފުވެރި އެވޯޑްތައް މި އަހަރު އަނެއްކާވެސް ލިބުމުން ޝިއުރީ ވިދާޅުވީ، އެ އެވޯޑުތަކުގެ ސަބަބުން ޓޫރިޒަމް ދާއިރާގައި ހާއްސަ މަންޒިލެއްގެ ގޮތުގައި ދެމެހެއްޓުމަށް އިތުރު ހިތްވަރެއް ލިބިފައިވާ ކަމަށެވެ. އަދި ކުރިއަށް އޮތްތަނުގައި އިތުރަށް ރާއްޖެ އިޝްތިހާރުކުރަން އިތުރު ފުރުސަތުތަކެއް ފަހިކުރުމަށް ފަސޭހަވާނެ ކަމަށް އޭނާ ވިދާޅުވި އެވެ.