ރާއްޖެ އިޝްތިހާރު ކުރަން ގިނަ ހަރަކާތްތަކެއް، ޓޫރިޒަމުން 5 ބިލިއަން ޑޮލަރު ހޯދަން އަމާޒު ހިފައިފި

ޓޫރިޒަމްގެ މުހިންމު މާކެޓުތަކުގައި ރާއްޖެ އިޝްތިހާރު ކުރުމުގެ ގިނަ ހަރަކާތްތަކަކާ އެކު، އެ ސިނާއަތުން އަންނަ އަހަރު ފަސް ބިލިއަން ޑޮލަރުގެ އާމްދަނީއެއް ހޯދަން ސަރުކާރުން އަމާޒު ހިފައިފި އެވެ.

ރާއްޖޭގެ ބައި ގަރުނުގެ ޓޫރިޒަމް ތާރީހުގައި، މި އަހަރުގެ ތެރޭގައި ފުރަތަމަ ފަހަރަށް ވަނީ ދެ މިލިއަން ޓޫރިސްޓުން އައިސްފަ އެވެ.

މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރުސީ) އިން މިއަދު ބުނީ، މި އަހަރުގެ ތެރޭގައި ރެކޯޑު އަދަދަކަށް ޓޫރިސްޓުން ރާއްޖެ އަށް ޒިޔާރަތް ކުރުމުގައި، އެ ކޯޕަރޭޝަނުން އިސްވެ ކުރިއަށް ގެންދިޔަ ހަރަކާތްތައް ފާހަގަކުރެވޭ ކަމަށެވެ.

އޭގެ ތެރޭގައި، ތިން ފެއާ އަކާއި ރޯޑްޝޯ އާއި ސޯޝަލް މީޑިއާގެ 15 ކެމްޕޭން އަދި 23 ވާޗުއަލް އިވެންޓް ހިމެނޭއިރު، މުހިންމު ގިނަ މާކެޓްތަކަކަށް ރާއްޖޭގެ ތަފާތު ތަޖުރިބާތައް ދައްކާލުމަށް ކުރިއަށް ގެންދިޔަ 'ޑިސްކަވާ މޯލްޑިވްސް' ވެބިނާ ސީރީޒް ހިމެނެ އެވެ.

ޗައިނާ ފަދަ މުހިންމު މާކެޓުތަކުގައި މި އަހަރު ސިމްޕޯސިއަމްތައް ބޭއްވި ކަމަށް ވެސް އެމްއެމްޕީއާރުސީން ބުންޏެވެ.

މި އަހަރުގެ ކާމިޔާބީގެ މައްޗަށް އަންނަ އަހަރު، ވިޒިޓް މޯލްޑިވްސް އިން އާ ސްޓްރެޓީޖިކް އެޕްރޯޗެއްގެ ދަށުން ވީޑިއޯ ޑިޖިޓަލް ކެމްޕޭންތަކަށް ސަމާލުކަމެއް ދީގެން ކޮންޓެންޓް އުފެއްދުމާއި ސަގާފީ ޓްރޭޑް ޝޯތަކުން އަމާޒު ބަދަލުކޮށް، ކޮންވާޝަން ޑްރައިވަން މާކެޓިން ހަރަކާތްތަކަށް ބަދަލުކުރުމުގެ ވިސްނުން މިއަދު ހާމަކުރި އެވެ.

އަންނަ އަހަރަށް ރާވާފައިވާ ހަރަކާތްތަކުގެ ތެރޭގައި ބްރޭންޑް މާޗަންޑައިޒް ވިއްކުމުގެ އާ ޕްލެޓްފޯމެއް ކަމަށްވާ ވިޒިޓް މޯލްޑިވްސް ޝޮޕް ލޯންޗުކުރުމާއި ވިޒިޓް މޯލްޑިވްސް ކަލަންޑަރުގެ ދަށުން ރާއްޖޭގައި ހިނގަމުންދާ ހުރިހާ އިވެންޓްތަކެއްގެ މައުލޫމާތުތައް ހިމަނައި ސެންޓްރަލައިޒްޑް ހަބެއް ގާއިމްކޮށް، ޓޫރިސްޓުންގެ ދަތުރުތައް ރޭވުމަށް ފަސޭހަ މަގެއް ހޯދައި ދިނުން ހިމެނެ އެވެ.

ހަމަ އެއާ އެކު، ވިޒިޓް މޯލްޑިވްސް އެކަޑަމީއެއް ގާއިމްކޮށް، ސިނާއަތުގެ އިލްމު އިތުރުކުރުމަށާއ، ޑެސްޓިނޭޝަން ސްޕެޝަލިސްޓް ސެޓްފިކެޓް ދިނުމަށް ފަރުމާކޮށްފައިވާ ތައުލީމީ ޕްރޮގްރާމްތައް ކުރިއަށް ގެންދާނެ ކަމަށް ވެސް އެމްއެމްޕީއާރުސީން ބުންޏެވެ.

އެމްއެމްޕީއާރުސީން ބުނި ގޮތުގައި، އަންނަ އަހަރު ތައާރަފްކުރާ ވިޒިޓް މޯލްޑިވްސް ކޮންޓެންޓް ޕޯޓަލް ވާނީ އުފެއްދުންތެރިންނަށް ކިއުރޭޓަޑް ކޮންޓެންޓް ހޯދުމަށާއި އެ މީހުންގެ ޑިޖިޓަލް އުފެއްދުންތައް ދައްކާލުމާއި ވިއްކުމުގެ ފުރުސަތު ވެސް ލިބޭނެ ވަސީލަތަކަށެވެ.

އެމްއެމްޕީއާރުސީގެ އަންނަ އަހަރުގެ ޖުމްލަ އަމާޒަކ،ީ ހޫނު މޫސުމުގެ ބޮޑެތި ކެމްޕޭންތަކާއެކު 25 މާކެޓުގައި ކޮންމެ ކުއާޓަރެއްގައި ވެސް ހަރަކާތްތައް ކުރިއަށް ގެންދިއުމެވެ.

ސަރުކާރުގެ އަމާޒަކީ އަންނަ އަހަރު 2.2 މިލިއަން ޓޫރިސްޓުން ގެންނައުމެވެ،

އެމްއެމްޕީއާރުސީގެ ސީއީއޯ އަދި އެމްޑީ އިބްރާހިމް ޝިއުރީ މިއަދު ނޫސްވެރިންނަށް ވިދާޅުވީ، ގޫގުލް ޓްރެންޑްސްއަށް ބަލާއިރު، ރާއްޖޭގައި ޗުއްޓީ ހޭދަކުރަން އަންނަން ޝައުގުވެރިވެގެން ދުނިޔޭގެ އެކި ކަންކޮޅުތަކުން 20 މިލިއަނެއްހާ މީހުން ގޫގުލް ކުރާ ކަމަށެވެ.

އެއާ އެކު، ސަރުކާރުގެ އަމާޒަށް ވާސިލުވުމަށް އެ ކޯޕަރޭޝަނާއި ޓޫރިޒަމް ސިނާއަތުގެ ހުރިހާ ފަރާތްތަކެއް ގުޅިގެން މަސައްކަތް ކުރާނެ ކަމުގެ ޔަގީންކަން ޝިއުރީ ދެއްވި އެވެ.