އިމިގްރޭޝަންގެ ރަސްމީ ގަޑި ހެނދުނު 8 އިން މެންދުރު 2 އަށް ބަދަލުކޮށްފި

މޯލްޑިވްސް އިމިގްރޭޝަންގެ ރަސްމީ މަސައްކަތު ގަޑި ސިވިލް ސާވިސް އެކޭ އެއްގޮތަށް ހެނދުނު 8 އިން މެންދުރު 2 އަށް މާދަމާ އިން ފެށިގެން ބަދަލުކުރަން ނިންމައިފި އެވެ.

އިމިގްރޭޝަންގެ ރަސްމީ މަސައްކަތު ގަޑިއަކީ މިހާތަނަށް ހެނދުނު 8 އިން ހަވީރު 4 އެވެ.

އެ އިދާރާ އިން މިރޭ ބުނީ، ރަސްމީ މަސައްކަތު ގަޑި މާދަމާ އިން ފެށިގެން 8 އިން މެންދުރު 2 އަށް ބަދަލުކުރި ނަމަވެސް މިހާރު ވެސް ހިދުމަތް ދޭ ގަޑިތަކުގައި ހިދުމަތްތައް ދޭނެ ކަމަށެވެ. އޭގެ ތެރޭގައި ޕާސްޕޯޓު ހެއްދުމާ ގުޅޭ ހުރިހާ ހިދުމަތެއް ވެސް ހިމެނޭ ކަމަށް އިމިގްރޭޝަނުން ބުންޏެވެ.

"ހަމައެކަނި ރަސްމީ މަސައްކަތު ގަޑިއަށް އައި ބަދަލެއް މިއީ،" އިމިގްރޭޝަންގެ އިސް އޮފިޝަލަކު ވިދާލުވި އެވެ.

ސަރުކާރުގެ ޔުނިފޯމް ބޮޑީތަކުގެ ތެރެއިން ސިވިލް ސާވިސްގެ ދާއިރާގެ ތެރޭގައި މިހާރު ހިންގަނީ އިމިގްރޭޝަން އެކަންޏެވެ. އެ އިދާރާގައި މިހާރު 500 އާ ގާތްކުރާ އަދަދަކަށް މުވައްޒަފުން މަސައްކަތް ކުރެ އެވެ.