ޝަމްއާނަށް ތުހުމަތުކުރަނީ 500،000 އަށް ވުރެ ގިނަ ރުފިޔާ ނެގުމަށް ފަހު ބިދޭސީއަކު ދޫކޮށްލި ކަމަށް

އިމިގްރޭޝަން ކޮންޓްރޯލަރު ކަމުގެ މަގާމުގައި ހުންނެވި މުހައްމަދު ޝަމްއާން ވަހީދު ރޭ ކުއްލި ގޮތަކަށް މަގާމުން ވަކިކުރީ ގިނަ އަދަދެއްގެ ފައިސާއާ އެކު ހައްޔަރުކުރި ބިދޭސީންތަކެއްގެ ތެރެއިން އެކަކު ދޫކޮށްލުމަށް އެ މީހާގެ އަތުން 500،000 އަށް ވުރެ ގިނަ ރުފިޔާ ނެގި ކަމަށް ތުހުމަތު ކުރެވޭ މައްސަލައެއްގައިކަން އެނގިއްޖެ އެވެ.

މި މައްސަލައިގެ މައުލޫމާތު އެނގޭ ފަރާތްތަކުން "މިހާރު" އަށް އެނގިފައިވާ ގޮތުގައި ރިޝްވަތުގެ ގޮތުގައި ފައިސާ ނެގުމަށް ފަހު ދޫކޮށްލި ކަމަށް ބެލެވޭ މީހާ އަކީ ގިނަ އަދަދެއްގެ ފައިސާއާ އެކު މާލޭގެ ގެސްޓް ހައުސްއަކުން އަތުލައިގަތް މީހުންގެ ގުރޫޕެއްގެ ތެރޭގައި ހިމެނޭ މީހެކެވެ.

"މާލޭގެ ގެސްޓް ހައުސްއެއްގައި ބިދޭސީންގެ ބަޔަކު ގިނަ އަދަދެއްގެ ފައިސާ ގެންގުޅޭ ކަމުގެ ރިޕޯޓެއް ލިބިގެން އިމިގްރޭޝަންގެ އޮފިސަރުންތަކެއް ކުލަ ހެދުމުގައި ގޮސް އެ ގެސްޓް ހައުސްއަށް ވަދެ ހަތް މީހަކު ގެންދިޔައީ އެ މީހުންގެ އަތުގައި ހުރި 530،000ރ. އާ އެކު. މި މީހުން ޑިޓެންޝަން ސެންޓަރަށް ގެންދިއުމަށް ފަހު، މީގެ ތެރެއިން އެކަކު ޖެހިގެން އައި ރޭ އިމިގްރޭޝަންގެ ވެހިކަލެއްގައި ގެންގޮސް މަގުމައްޗަށް ދޫކޮށްލަނީ،" މައުލޫމާތު އެނގިވަޑައިގަންނަވާ އޮފިޝަލަކު ވިދާޅުވި އެވެ.

އޭނާ ވިދާޅުވީ، ދޫކޮށްލި މީހާ އަކީ ބިދޭސީންގެ ތެރޭގައި އިސްކޮށް ހުރި މީހާ ކަމަށް ބެލެވޭ ކަމަށާއި އޭނާ ދޫކޮށްލަނީ ޑިޓެންޝަނަށް ގެންދިޔަ ދުވަހުގެ އަނެއް ދުވަހުގެ ރޭ ކަމަށެވެ.

"އޭނާ މަގުމައްޗަށް ދޫކޮށްލާފައި އިމިގްރޭޝަންގައި ކޮންޓްރޯލަރާ އެކު މަސައްކަތްކުރާ ދެ ސްޓާފަކު ސައިކަލްގައި ފައިސާ ކޮތަޅު ހިފައިގެން ސައިކަލެއްގައި ޝަމްއާންގެ ގެޔަށް ދިޔަކަން ވަނީ ތަހުގީގަށް މިހާތަނަށް ހޯދިފައި."

ފައިސާތަކާ އެކު ހައްޔަރުކުރި ބިދޭސީންގެ ތެރެއިން ދެން ހައްޔަރުކުރި މީހުން ދޫކޮށްނުލާ ކަމަށް ވެ އެވެ.

މި ތުހުމަތާ އެކު ޝަމްއާން މަގާމުން ވަކިކުރުމަށް ފަހު، ރޭގެ ވަގުތެއްގައި ވަނީ އޭނާގެ ގެ ވެސް ފާސްކޮށްފަ އެވެ. ފުލުހުން އެ ގެ ފާސްކުރުމަށް ފަހު ފައިސާ އާއި އެހެން ބައެއް ތަކެތި ގެންދިޔަކަން އެނގިފައި ވިޔަސް ފައިސާގެ އަދަދެއް އަދި ދެން ގެންދިޔަ ތަކެއްޗާ ބެހޭ ކަށަވަރު މައުލޫމާތެއް އަދި ނުލިބެ އެވެ.

ފުލުހުން މި މައްސަލައިގައި ހާމަކޮށްފައިވާ ހަމަ އެކަނި މައުލޫމާތަކީ މިދިޔަ ބުދަ ދުވަހުގެ ރޭ ހިންގި އޮޕަރޭޝަނެއްގައި ގެއެއް ބަލައި ފާސްކޮށް، ތިން މީހަކު ފުލުހުންގެ ބެލުމުގެ ދަށަށް ގެންދިޔަ ކަމާއި ތިން މީހަކު ހައްޔަރު ކުރި ކަމެވެ. އަދި މި މީހުންނާ ޝަމްއާންއާ އެއްވެސް ގުޅުމެއް އޮތް ކަމަކަށް ވެސް ފުލުހުން އަދި ހާމަކޮށްފައެއް ނުވެ އެވެ.

ނޮވެމްބަރު 19، 2023 ގައި އިމިގްރޭޝަން ކޮންޓްރޯލަރުގެ މަގާމަށް އައްޔަންކުރި ޝަމްއާންގެ ބަދަލުގައި ކުރީގެ ޕޮލިސް ކޮމިޝަނަރު އަހުމަދު ފަސީހު މިހާރު ވަނީ އެ މަގާމަށް އައްޔަންކުރައްވައިފަ އެވެ.

އިމިގްރޭޝަން އޮފިސަރެއްގެ ގޮތުގައި 14 އަހަރު މަސައްކަތް ކޮށްފައިވާ ޝަމްއާން އެ މަގާމުން ކުރިން ވަކިކޮށްފައި ހުރީ ކުރީގެ ރައީސް އަބްދުﷲ ޔާމީނަށް ތާއީދުކޮށް ސޯޝަލް މީޑިއާގައި ޕޯސްޓް ކުރަން ފެށުމުން ރައީސް އިބްރާހިމް މުހައްމަދު ސޯލިހުގެ ވެރިކަމުގަ އެވެ.

އެކަމަކު 2022 ގައި ވަޒީފާއާ ބެހޭ ޓްރައިބިއުނަލުން އޮތީ ޝަމްއާން ވަޒީފާ އިން ވަކިކުރީ ގާނޫނާ ހިލާފަށް ކަމަށް ނިންމައި، އަލުން ވަޒީފާ ރުޖޫއަ ކޮށްދިނުމަށް އަންގައިފަ އެވެ. އޭނާ އަށް އިމިގްރޭޝަން ކޮންޓްރޯލަރުކަން ދިނީ މި ސަރުކާރު ވެރިކަމަށް އައުމަށް ފަހު އެވެ.

ރާއްޖޭގައި ގަވާއިދާ ހިލާފަށް އުޅޭ ބިދޭސީން އަތުލުމާއި ގަވައިދުތަކުގެ ތެރެއަށް އެ މީހުން ފެއްތުމަށް ބޮޑެތި އޮޕަރޭޝަންތައް ކުރިއަށް ގެންގޮސް، ގަވާއިދާ ހިލާފަށް އުޅޭ 5،000 އަށް ވުރެ ގިނަ ބިދޭސީން ވަނީ މިހާތަނަށް ޑީޕޯޓުކޮށްފަ އެވެ.