އުރީދޫ ކަލަންޑަރު: މި ފަހަރު އޮތީ ފޯކްލޯ ކެރެކްޓާތަކާ އެކު ޗެޓު ކުރުން

ރާއްޖޭގެ ފުލޯކު ވާހަކަތައް ހިމަނައިގެން، އުރީދޫ މޯލްޑިވްސް އިން 2025 ގެ ކަލަންޑަރު ރޭ އިފުތިތާހު ކޮށްފި އެވެ.

"ފިއުޗާ މީޓްސް ނޮސްޓަލްޖިއާ" ނަމުގައި ތައްޔާރު ކޮށްފައިވާ އެ ކަލަންޑަރު އިފުތިތާހު ކޮށްދެއްވީ ހޯމްލޭންޑް ސެކިއުރިޓީ އެންޑް ޓެކްނޮލޮޖީ މިނިސްޓަރު އަލީ އިހުސާނެވެ.

އެންމެ ފަހުގެ ޓެކްނޮލަޖީގެ އެހީގައި އިންޓަރެކްޓިވް ހިޔާލުތަކަކަށް ކަލަންޑަރު ޑިޒައިންކޮށް، ނެރެމުން އަންނަ އުރީދޫން މި ފަހަރުގެ ކަލަންޑަރުގައި ވެސް ހާއްސަ އޭއައި ފީޗާއެއް ވަނީ ހިމަނައިފަ އެވެ. ކަލަންޑަރުގައި ހިމެނޭ އެކި ފުލޯކު ވާހަކަތަކުގެ ކެރެކްޓަރުތަކާ އެކު، އެ ފީޗާގެ އެހީގައި ޗެޓު ކުރެވޭނެ އެވެ. އޭގެ ތެރޭގައި ދިވެހި ކުޑަކުދިންގެ މެދުގައި ވަރަށް މަގުބޫލު ފޫޅުދިގު ހަންޑި އާއި ސަފަރު ކަތްދަ ފަދަ ކެރެކްޓާތައް ވެސް ހިމެނެ އެވެ.

ކަލަންޑަރުގައި ހިމެނޭ އޭއައި ފީޗާ އިން ކެރެކްޓާތަކާ ވާހަކަތައް ހިއްސާކޮށް، ސުވާލުތަކަށް ޖަވާބު ދީ، އެ މީހުންގެ ދުނިޔެއާ ބެހޭ ގޮތުން މައުލޫމާތު ފޯރުކޮށްދީ، ފޯކްލޯރުތަކުގެ އާ ތަޖުރިބާއެއް ކުރުމުގެ ފުރުސަތު ލިބޭނެ އެވެ.

ޖުމްލަ 12 ކެރެކްޓާ ހިމަނައިގެން ތައްޔާރު ކޮށްފައިވާ މި ފީޗާގައި މަހަކު ކެރެކްޓާއެއް އަންލޮކް ކުރެވޭނެ އެވެ. ކެރެކްޓާތަކާ ވާހަކަ ދެއްކޭނީ އަންލޮކް ވުމުންނެވެ. މިއީ ރާއްޖޭގެ ފުރަތަމަ އެންއެފްސީ އިންޓަގްރޭޓަޑް ކަލަންޑަރެވެ.

އެ ކަލަންޑަރު އިފުތިތާހު ކުރުމުގެ ރަސްމިއްޔާތުގައި އުރީދޫގެ ޗީފް ކޮމާޝަލް އޮފިސަރު ހުސައިން ނިޔާޒް ވިދާޅުވީ މި އަހަރުގެ ކަލަންޑަރު ރަމްޒު ކޮށްދެނީ ޓެކްނޮލޮޖީގެ ބޭނުން ހިފައި، ދިވެހި ސަގާފަތް ދެމެހެއްޓުމަށް ކުރާ މަސައްކަތް ކަމަށެވެ.

ނިޔާޒް ވިދާޅުވީ މި ކަލަންޑަރު އިންޓަރެކްޓިވް ގޮތަކަށް ރާއްޖޭގެ ފޯކްލޯތައް ދަސްވުމުގެ އިތުރުން އެ ވާހަކަތައް ކުރިއަށް އޮތް އަހަރުތަކަށް ދެމިގެންދާނެ ކަމުގެ ޔަގީންކަން ވެސް ލިބޭނެ ކަމަށެވެ. އެ ކަލަންޑަރަކީ ޑިޖިޓަލް ގައުމެއް ބިނާ ކުރުމަށް އުރީދޫން ކުރަމުން އަންނަ މަސައްކަތްތަކުގެ ރަމްޒެއް ކަމަށް ވެސް އޭނާ ވިދާޅުވި އެވެ.

"މިއީ ދިވެހި ތަރިކަ ހިމާޔަތްކޮށް، މާނަ ހުރި ގުޅުމެއް އުފައްދައި، ޓެކްނޮލޮޖީ ބޭނުންކޮށްގެން ޖީލުތަކުގެ މެދުގައި ގުޅުން ދަމަހައްޓައި، ޑިޖިޓަލް މޯލްޑިވްސްއެއް ބިނާކުރުމަށް އުރީދޫން ކުރަމުންދާ މަސައްކަތުގެ މުހިންމު ބޮޅެއް،" ނިޔާޒް ވިދާޅުވި އެވެ.

ރާއްޖެއާ ގުޅޭ އެކި މައުލޫމާތާއި ކަންތައްތައް ހިމަނައިގެން، އެންމެ ފަހުގެ ޓެކްނޮލޮޖީތަކުގެ އެހީގައި އުރީދޫން ކޮންމެ އަހަރަކު ވެސް އަންނަނީ ކަލަންޑަރުތައް ނެރެމުންނެވެ.