އުރީދޫން ހިލޭ ސައިކަލެއް ހޯދުމުގެ ފުރުސަތު ހަމަވަނީ

އުރީދޫން މިދިޔަ ސެޕްޓެމްބަރު މަހު ފެށި ކޮންމެ ތިން ދުވަހަކުން ސައިކަލެއް ލިބޭ ޕްރޮމޯޝަން އަންނަ އަންގާރަ ދުވަހު ނިމޭނެ އެވެ.

ޖުމްލަ 30 ސައިކަލު ހުށަހަޅައިގެން ކުރިއަށް ގެންދާ މި ޕްރޮމޯޝަންގައި މިހާރު ބާކީ ހުރީ އެންމެ ފަސް ސައިކަލެވެ.

އޭގެ ތެރޭގައި ދެ އެއާ ބްލޭޑް 125 - ސްޓޭންޑާޑް އެޑިޝަން (ރަތް ކުލަ)، އެއް އެއާ ބްލޭޑް 160 - ސްޓޭންޑާޑް އެޑިޝަން (ރަތް ކުލަ) އަދި އެއް ޕީސީއެކްސް 160 (ކަޅު ކުލަ) އާއި ޕްރޮމޯޝަންގެ އެންމެ ބޮޑު އިނާމުގެ ގޮތުގައި ދޭ 2024 ވަނަ އަހަރުގެ ރެބެލް 300 (ކަޅު) ސައިކަލު ހިމެނެ އެވެ.

މި ޕްރޮމޯޝަނަކީ 30 ދުވަހުގެ ތެރޭގައި 250 ރުފިޔާ އަށް ވުރެ މަތިން ބިލް ދައްކައި ރީޗާޖުކޮށް އެޑްއޮން އެއް ބޭނުންކުރާ ކަސްޓަމަރުންނަށް ބައިވެރިވެވޭ ޕްރޮމޯޝަނެކެވެ. އަދި އުރީދޫގެ ހިދުމަތާ އަލަށް ގުޅޭ ކަސްޓަމަރުންގެ ތެރެއިން ހިދުމަތް ބޭނުންކުރަން 400ރ. އިން މަތިން ބިލް ދައްކައި ރީޗާޖުކޮށް ނުވަތަ އެޑް އޮން އެއް ބޭނުންކުރާ ކަސްޓަމަރުންނަށް ވެސް މި ޕްރޮމޯޝަނުގައި ބައިވެރިވެވޭނެ އެވެ.

އުރީދޫން ކޮންމެ ތިން ދުވަހަކުން ސައިކަލު ލިބޭ ކަސްޓަމަރެއް ހޮވަނީ ޝަރުތު ހަމަވާ ކަސްޓަމަރުންގެ މެދުގައި ނަގާ ގުރުއަތަކުންނެވެ. މި ޕްރޮމޯޝަނަށް ޝަރުތު ހަމަވާ ކަސްޓަމަރުންގެ މެދުގައި ގްރޭންޑް ލަކީޑްރޯއެއް ވެސް އޮންނާނެ އެވެ. އެ ލަކީޑްރޯއިން ހޮވޭ ނަސީބުވެރި އެއް ކަސްޓަމަރަކަށް ހުށަހަޅާފައި ވަނީ ރެބެލް 300 (ކަޅު) ސައިކަލެވެ.

ރާއްޖޭގެ ބޮޑު ބަޔަކަށް އުރީދޫން މިހާރު އަންނަނީ 5ޖީ ހިދުމަތް ދެމުންނެވެ. މި ޕްރޮމޯޝަނަކީ އެކަން ފާހަގަކޮށް "5ޖީ ލިބޭ" ނަމުގައި ފެށި ޕްރޮމޯޝަނެކެވެ.