ރާއްޖޭގެ އެންމެ ބޮޑު ގޭމިން ފެސްޓިވަލް ފެބްރުއަރީ މަހު ބާއްވަނީ

ރާއްޖޭގެ އެންމެ ބޮޑު ގޭމިން ފެސްޓިވަލް "އުރީދޫ ނޭޝަން ގޭމާސް ލޭންޑް 2024" އަންނަ އަހަރުގެ ފެބްރުއަރީ މަހު ބާއްވަން ނިންމައިފި އެވެ.

ފެބްރުއަރީ 21، 22 ގައި ބާއްވާ ގޭމިން ފެސްޓިވަލުގައި މި އަހަރުގެ "އުރީދޫ ނޭޝަން" ގެ ކޮންޓެންޑާ ސީރީޒްތަކުގައި ވާދަކޮށް، ޗެމްޕިއަންކަން ހޯދާފައިވާ އެންމެ މޮޅު ގޭމަރުންނާއި ޓީމުތަކުން އެއް ލައްކަ ރުފިޔާގެ އިނާމަށް ވާދަކުރާނެ އެވެ.

އުރީދޫ ނޭޝަން ގޭމާސް ލޭންޑްގެ އަލްޓިމޭޓް ގޭމިން ފެސްޓިވަލްގައި ކުޅުންތެރިން ވާދުކުރާ ގޭމްތަކުގެ ތެރޭގައި ޕަބްޖީ މޮބައިލް ޗެމްޕިއަންޝިޕާއި އީއޭއެފްސީ ޗެމްޕިއަންޝިޕާއި މޮބައިލް ލެޖެންޑްސް: ބޭންގް ބޭންގް ޗެމްޕިއަންޝިޕް ހިމެނެ އެވެ.

މި ފެސްޓިވަލްގައި "އުރީދޫ ނޭޝަން ގޭމާސް ލޭންޑް އެވޯޑް 2024" ގައި އެންމެ މޮޅު ގޭމަރަށް "އަލްޓިމޭޓް ޕްލޭޔާ އޮފް ދަ އިޔާ"ގެ އެވޯޑު ދޭނެ އެވެ. އެއީ މި އަހަރުގެ މުބާރާތްތަކުގައި ވާދަކުރި މީހުންގެ ތެރެއިން އެންމެ މޮޅު ކުޅުމަކާއި ހުނަރު ދެއްކި ގޭމަރަށް ދިނުމަށް ހަމަޖެހިފައިވާ އެވޯޑެކެވެ.

އެ އެވޯޑަށް ޝަރުތު ހަމަވާ ކުޅުންތެރިން އިވެލުއޭޓް ކުރާނީ އުރީދޫ ނޭޝަންގެ ފަނޑިޔާރުންގެ ޕެނަލާއި އާންމުންގެ ވޯޓުންނެވެ.

އުރީދޫ ނޭޝަން އިން ގޭމިން ފެސްޓިވަލް އެންމެ ފުރަތަމަ ބޭއްވީ މިދިޔަ އަހަރު އެވެ. އެ ފެސްޓިވަލަށް ބޮޑު ތަރުހީބެއް ލިބުނެވެ. މި އަހަރުގެ ތެރޭގައި އުރީދޫ ނޭޝަަން އިިން ވަނީ އެކި ގޭމިން މުބާރާތްތައް ބާއްވައިފަ އެވެ.

އުރީދޫ ނޭޝަން އަކީ ގޭމިން ކުރިއަރުވައި، އީ-ސްޕޯޓްސްގެ ފުރުސަތުތައް ގައުމީ އަދި ބައިނަލްއަގްވާމީ ފެންވަރުގައި ހޯދައިދިނުމުގެ ގޮތުން އުރީދޫން ތައާރަފް ކުރި ޕްލެޓްފޯމެކެވެ.