މިއީ ވައުދު ފުއްދުމުގެ ބަޖެޓެއް، އަމަލީ ނަތީޖާ ނެރެދޭނަން: ރައީސް

ރައްޔިތުންގެ މަޖިލިހުން މި އަހަރަށް ފާސްކޮށްފައިވަނީ ވައުދު ފުއްދުމުގެ ބަޖެޓެއް ކަމަށާއި އަމަލީ ނަތީޖާ ނެރެދެއްވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ގއ. އާއި ގދ. ގެ ބައެއް ރަށްރަށަށް މިއަދު ފެއްޓެވި ތިން ދުވަހުގެ ދަތުރުފުޅުގައި ގދ. ހޯނޑެއްދޫގައި ބޭއްވި ޖަލްސާގައި އެ މަނިކުފާނު ވިދާޅުވީ ރިޔާސީ އިންތިހާބުގެ ތެރޭގައި ވައުދުތައް ވެވަޑައިގެންނެވީ އެކަންތައް ކޮށްދެއްވަން ކަމަށެވެ. އެހެންވެ. އެ ކަންކަން ސަރުކާރުން ކޮށްދޭނެކަން ތަކުރާރު ކުރައްވައި ރައީސް ވިދާޅުވީ، މިދިޔަ އަހަރު ވައުދުތައް ފުއްދުމުގައި އިގުތިސާދީ ގޮންޖެހުންތަކާއި ބަޖެޓުގެ ތާށިކަން އޮތް ކަމަށެވެ.

ނަމަވެސް، މަޖިލީހުން މި އަހަރަށް ފާސްކޮށްދީފައި ވަނީ ވައުދު ފުއްދުމުގައި ނަތީޖާ ނެރެވޭނެ ބަޖެޓެއް ކަމަށް އެ މަނިކުފާނު ވިދާޅުވި އެވެ.

މި ރަށުގައި ރަށް ގިރުމާއި އުދަ އެރުމުގެ މައްސަލައިން ފެށިގެން ހައްލުކުރަން ޖެހޭ ގިނަ ކަންކަން އެބަހުރި ކަމަށް ވެސް ރައީސް މުއިއްޒު ވިދާޅުވި އެވެ. ރަށް ގިރުމުގެ މައްސަލައަށް މި އަހަރުގެ ބަޖެޓުގެ ތެރެއިން ދާއިމީ ހައްލެއް ގެނެސް މަގު ހަދައިދޭނެ ކަމަށް އެ މަނިކުފާނު ވިދާޅުވި އެވެ.

ރައީސް ވިދާޅުވިގޮތުގައި، އެކި ރަށްރަށުގައި މަގު ހެދުމުގެ މަޝްރޫއުތައް ހިންގަނީ އެކި ލެވެލްގަ އެވެ.

ޕީއެސްއައިޕީ ބަޖެޓުގެ ތެރެއިން މި އަހަރު އެންމެ އިސްކަން ދެއްވާނީ، ރައީސް ވިދާޅުވި ގޮތުގައި، ގެދޮރުވެރިކަމުގެ މަޝްރޫއުތައް ހިންގާށެވެ. އެއާ އެކު، ސިއްހަތާއި ތައުލީމާއި ރަށްރަށުގައި ފެނާއި ނަރުދަމާ ނިޒާމް ގާއިމްކޮށް މަގުތައް ހަދާނެ ކަމަށް ވިދާޅުވި އެވެ.

ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ހޮރައިޒަން ފިޝަރީޒުން މި ރަށުގައި ހަދަން ފަށާފައިވާ ކޯލްޑް ސްޓޯރޭޖުގެ މަސައްކަތް ނުނިމި ދިގުލައިގެން ދާތީ ކައުންސިލުން ވަނީ އެކަން ހައްލުކޮށްދިނުމަށް ރައީސް މުއިއްޒުގެ އަރިހުން އެދިފަ އެވެ.

އެ މަނިކުފާނު ވެސް ވިދާޅުވީ މަސް ޕްލާންޓު ހަދަން ބޮޑު ބިމެއް ކުއްޔެއް ދީފައިވާ ކަމަށެވެ. ނަމަވެސް މަސައްކަތް ނުނިމި ދިގުލައިގެން ދާތީ ބިމުން ކުއްޔެއް ނުލިބޭ ކަމަށް ވިދާޅުވެ، ރައީސް ވަނީ، އެ މައްސަލަ ހައްލުކުރަން މަސައްކަތް ކުރައްވާނެ ކަމަށް ވިދާޅުވެފަ އެވެ.

އާމްދަނީ އިތުރުކޮށް، އިގުތިސާދު ފުޅާކުރަން ކައުންސިލްތަކަށް ފުރުސަތުތައް ފަހިކޮށްދީފައިވާ ކަމަށާއި އޭގެ ތެރެއިން ފަޅު ރަށްތައް ނަގައި ވަކި ތަންތަނެއް ބޭނުންކުރަން ފުރުސަތު ހުޅުވާލާނެ ކަމަށް ވެސް ރައީސް ވިދާޅުވި އެވެ. އޭގެ އިތުރުން ހޯނޑެއްދޫގައި؛

- ސިއްހީ މަރުކަޒު 24 ގަޑިއިރަށް ބަދަލުކުރުން.

- ރަނގަޅު މިސްކިތެއް އިމާރާތްކުރުން.

"މިއީ ފުއްދަން ވީ ވައުދުތަކެއް، ސަރުކާރުން އިސްކަންދޭނީ ވައުދު ފުއްދަން. މިއީ ވައުދު ފުއްދުމުގެ ބަޖެޓެއް،" ރައީސް ވިދާޅުވި އެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ފެށި ކަންކަން ނުހުއްޓުނަސް ކުރިއަށް ދަނީ މަޑު ދުވެއްޔެއްގައި ކަމަށް ރައީސް ވިދާޅުވި އެވެ. ގޮންޖެހުންތަކާއެކު ވެސް ގައުމު ދަރަނިވެރިވިޔަ ނުދީ، ދަރަނިތައް ދައްކަމުން އަންނަ ކަމަށް ރައީސް ވިދާޅުވި އެވެ.

އޭގެ ތެރެއިން، މިދިޔަ ހަފުތާގައި ލޯނުތަކަށް 500 މިލިއަނަށް ވުރެ ގިނަ ރުފިޔާ ދައްކާފައިވާ ކަމަށް އެ މަނިކުފާނު ވިދާޅުވި އެވެ. އާރުޑީސީ އަދި ފެނަކަ ފަދަ ކުންފުނިތަކުން، ރަށްރަށުގެ ކުދި ކުންފުނިތަކާ ހަވާލުކޮށްގެން ރަށްރަށުގައި ކޮށްފައި ހުރި މަސައްކަތްތަކަށް ވެސް ފައިސާ ނުދީ އޮތުމުން މި މަހާއި އަންނަ މަހުގެ ތެރޭގައި އެ ފައިސާ ދައްކާ ނިންމާނެ ކަން އެ މަނިކުފާނު ފާހަގަކުރެއްވި އެވެ.