ވޭޕް މަނާކުރުމުގެ ހެޔޮ ނަތީޖާ ފެންނަން ފަށައިފި: ރައީސް

ރާއްޖޭގައި ވޭޕް މަނާކުރުމުގައި ހެޔޮ ނަތީޖާތައް ފެންނަން ފަށާފައިވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ދުންފަތާ ދެކޮޅަށް ޖެނެރޭޝަން ބޭން ގެނައުމުގެ ގާނޫނުގެ އިސްލާހު ތަސްދީގު ކުރެއްވުމަށްފަހު، ނޫސްވެރިއެއްގެ ސުވާލަކާ ގުޅިގެން ރައީސް ވިދާޅުވީ މިދިޔަ ޑިސެމްބަރު މަހުގެ 15 ވަނަ ދުވަހުން ފެށިގެން ރާއްޖެއަށް ވޭޕް އެތެރެ ކުރުމާއި ގެންގުޅުން މަނާކުރުމުގެ ނަތީޖާ ވަރަށް ރަނގަޅު ކަމަށެވެ.

ވޭޕް ބޭނުން ކުރުމާ ދުރަށް ދާ މީހުން ވަރަށް ބޮޑަށް އިތުރުވެފައިވާކަން އެމަނިކުފާނު ފާހަގަ ކުރެއްވި އެވެ.

"ގައިމުވެސް ހޮސްޕިޓަލުތަކުގައި ރެސްޕިރޭޓަރީ ޑިޒީޒްތައް، މިކަމާ ގުޅިގެން އަންނަވަރު ހަމަ ޔަގީނުން ވެސް އިފެކްޓު ކުރަމުންދޭ، ޕޮޒިޓިވް އިފެކްޓް،" އެމަނިކުފާނު ވިދާޅުވި އެވެ.

ދުންފަތް ކޮންޓްރޯލް ކުރުމާ ބެހޭ ގާނޫނަށް ގެނައި ދެވަނަ އިސްލާހުގައިވާ ގޮތުން 2007 ވަނަ އަހަރުން ފެށިގެން އުފަންވެފައިވާ މީހުންނަށް ދުންފަތުގެ ބާވަތްތައް ވިއްކުމާއި ބޭނުންކުރުން މުޅި އުމުރަށް މަނާވާނެ އެވެ. އަދި ހަ މަސް ދުވަހުގެ މުއްދަތެއް ދިނުމަށްފަހު އެ ބަދަލުތަކަށް އަމަލުކުރަން ފަށާނީ އަންނަ ނޮވެމްބަރު 1 އިން ފެށިގެންނެވެ. އަދި އެ ގާނޫނަށް މިދިޔަ އަހަރު ގެނައި އިސްލާހުގެ ދަށުން ދުންފަތުގެ ބާވަތްތައް ގަނެވޭ އުމުރު ވެސް ވަނީ 18 އަހަރުން 21 އަހަރަށް މަތިކޮށްފަ އެވެ.

ރައީސް ވިދާޅުވީ އެފަދަ ފިޔަވަޅުތައް އެޅުމުގެ ބޭނުމަކީ ވަކި ބަޔަކު ކުށްވެރިކުރުން ނޫން ކަމަށެވެ. އަދި ހޭލުންތެރި ކުރުވައިގެން މީހުން އަމިއްލައަށް ދުންފަތުން ސަލާމަތްވުމަކީ ޖެނެރޭޝަން ބޭން އަދި ވޭޕް މަނާކުރުމުގެ އެންމެ މުހިއްމު އެއް މަގުސަދު ކަމަށް އެމަނިކުފާނު ވިދާޅުވި އެވެ.

ދުންފަތުން ސަލާމަތްވުމަށް ބޭނުންވާ ސިޒޭޝަން ކްލިނިކްގެ ހިދުމަތް ވެސް މުޅި ރާއްޖެއަށް ފުޅާކުރަން ސަރުކާރުން ވަނީ ނިންމައިފަ އެވެ. ރައީސް ވިދާޅުވީ އެ ތަންތަން ގާއިމްކުރަން ހެލްތު މިނިސްޓްރީއަށް ހާއްސަ ބަޖެޓެއް ވެސް ކަނޑައަޅާފައިވާ ކަމަށެވެ.