ރާއްޖޭގައި ވޭޕް މަނާކުރާ ބިލް ރައީސް ތަސްދީގު ކުރައްވައިފި

މާދަމާ އިން ފެށިގެން ރާއްޖެ އަށް ވޭޕް އެތެރެކުރުން މަނާކޮށް، އަންނަ ޑިސެމްބަރު 15 ވަނަ ދުވަހުން ފެށިގެން ރާއްޖޭގައި ވޭޕް ވިއްކުމާއި ބޭނުންކުރުން މަނާކުރަން ރައްޔިތުންގެ މަޖިލީހުން ފާސްކުރި ބިލް ރައީސް ޑރ. މުހައްމަދު މުއިއްޒު ރޭގައި ތަސްދީގު ކުރައްވައިފި އެވެ.

މިދިޔަ އަންގާރަ ދުވަހު ރައްޔިތުންގެ މަޖިލިހުން ފާސްކުރި އެ އިސްލާހުގައިވާ ގޮތުން، އިލެކްޓްރޯނިކް ސިނގިރޭޓާއި ވޭޕް ކުރުމަށް ބޭނުންކުރާ އާލާތްތައް ވިއްކުމާއި ހިލޭ ބެހުމާއި ބޭނުންކުރުން މަނާވާނީ ޑިސެމްބަރު 15 ވަނަ ދުވަހުން ފެށިގެންނެވެ. އެކަމަކު، ބިލް ތަސްދީގު ކުރެއްވުމާ އެކު، ރާއްޖެ އަށް ވޭޕް އެތެރެކުރުން މާދަމާ އިން ފެށިގެން މަނާވާނެ އެވެ.

ދުންފަތް ކޮންޓްރޯލުކުރުމާބެހޭ ގާނޫނަށް 1 ވަނަ އިސްލާހު ގެނައުމަށް ރައްޔިތުންގެ މަޖިލިހަށް ހުށަހެޅުއްވީ ހެންވޭރު އުތުރު ދާއިރާގެ ޕީއެންސީގެ މެންބަރު އަހުމަދު އައިފާން އެވެ.

އެ ގާނޫނުގައިވާ ގޮތުން ވޭޕް ކުރަން ބޭނުންކުރާ އާލާތްތަކާއި އެކަމަށް ތައްޔާރު ކޮށްފައިވާ އުފެއްދުންތައް ރާއްޖެ އެތެރެކޮށްފި ނަމަ 50،000ރ. އަދި އެތެރެކުރާ ކޮންމެ އިލެކްޓްރޯނިކް ސިނގިރޭޓް ނުވަތަ ވޭޕް އާލާތަކަށް 10،000ރ.ގެ މަގުން ޖޫރިމަނާ ކުރާނެ އެވެ.

ދުންފަތް ބޭނުންކުރަން އެފަދަ އާލާތެއް ނުވަތަ އުފެއްދުމެއް ވިއްކައިފި ނަމަ ޖޫރިމަނާ ކުރާނީ 20،000ރ. އިންނެވެ. ވިއްކި ކޮންމެ އެއްޗަކަށް 10،000ރ. ގެ ޖޫރިމަނާއެއްގެ އިތުރުން ހިލޭ ބަހައިފި ނަމަ 10،000ރ. ގެ ޖޫރިމަނާ ކުރާނެ ކަމަށް ގާނޫނުގައި ބަޔާންކޮށްފައި ވެ އެވެ. އެފަދަ އެއްޗެއް ވިއްކީ ކުޑަކުއްޖަކަށް ނަމަ އެ މީހެއްގެ ޖޫރިމަނާ 50،000ރ. އަށް ބޮޑުވާނެ އެވެ.

ދުންފަތް ކޮންޓްރޯލުކުރުމާބެހޭ ގާނޫނަށް 1 ވަނަ އިސްލާހު ތަސްދީގު ކުރެއްވުމުން، މާދަމާ އިން ފެށިގެން ދުންފަތް ގަނެ ވިއްކޭނެ އެންމެ ދަށް އުމުރަކީ 21 އަހަރެވެ.

އަމިއްލަ މީސްމީހުންގެ ގޭގައި ހިންގާ ސަރުކާރުގެ އޮފީސް އިމާރާތްތަކުގައިި ވެސް ދުންފަތުގެ އިސްތިއުމާލްކުރުން އެ އިސްލާހާ އެކު މަނާވާނެ އެވެ.

ބިލް ހުށަހެޅިއިރު ދުންފަތުން ދުރުވުމަށް ސެޒޭޝަން ފަރުވާގެ ތެރެއިން ދެވޭ ބާވަތްތަކަކީ ދުންފަތުގެ ގޮތުގައި ހިމަނާފައި އޮތް ނަމަވެސް ކޮމިޓީން ވަނީ އެ ބައި އުނިކޮށްފަ އެވެ.