އާ އަހަރު ފެށުން: ކުލަގަދަ ހަރަކާތްތަކެއް ހުޅުމާލޭގައި

އާ އަހަރު ފެށުން ފާހަގަކުރުމަށް ފުޑް ފެސްޓިވަލަކާ އެކު، ހުޅުމާލޭގައި މިރޭ ހާއްސަ ހަރަކާތްތަކެއް އޮންނާނެ ކަމަށް އެމްއެމްޕީއާރުސީން ބުނެފި އެވެ.

މޯލްޑިވްސް ކަލްޗާ އެންޑް ފުޑް ފެސްޓިވަލްގެ ނަމުގައި މިރެ އާއި މާދަމާ ހަވީރާއި މާދަމާ ރޭ ސެންޓްރަލް ޕާކްގައި އެ ހަރަކާތް ބާއްވާއިރު، އާ އަހަރު ފެށުން ފާހަގަކުރުމަށް ހާއްސަ ޑްރޯން ޝޯއަކާއި ހަވާ އެރުވުން މިރޭ އޮންނާނެ ކަމަށް އެމްއެމްޕީއާރުސީން ބުންޏެވެ.

ފުޑް ފެސްޓިވަލް ފަށާނީ މިރޭ އަށެއް ޖަހާއިރު އެވެ. އެއާ އެކު، ރާއްޖެ އަށް ޓޫރިސްޓަކު ކުރާ ދަތުރު ޑްރޯން ޝޯއެއްގެ އައިޓަމަކުން ގެނެސްދޭން އެމްއެމްޕީއާރުސީން ވަނީ ނިންމައިފަ އެވެ. ފުޑް ފެސްޓިވަލްގައި މިރޭ ދެން އޮންނާނީ ބޮޑުބެރުގެ އައިޓަމްތަކާއި ދަފި ނެގުން ފަދަ ރާއްޖޭގެ ސަގާފީ ހަރަކާތްތައް ދައްކާލުމެވެ. އާ އަހަރަށް މަރުހަބާ ކިޔުމަށްޓަކައި ހަވާ އެރުވުން އޮންނާނީ މިރޭ 12 ޖަހާއިރު އެވެ.

ފުޑް ފެސްޓިވަލް އޮންނާނީ މިރޭގެ އިތުރުން މާދަމާގެ ހަވީރު 4 އިން ރޭގަނޑު 10 އަށެވެ. އާއިލާތަކަށް ހާއްސަ ކޮށްގެން ފެސްޓިވަލް ކުރިއަށް ގެންދާއިރު، ކާބޯތަކެއްޗާއި ސަގާފީ ސްޓޯލްތައް ހުންނާނެ އެވެ. އަދި ފުލުހުންނާއި ފަޔާ ޓްރަކްގެ ހުށަހެޅުމަކާއި ކްލައިމްބިން ވޯލް އާއި ބައުންސް ހައުސް އަދި ޓްރާންސްފޯމާސް ޑިސްޕްލޭއެއް ވެސް ހުންނާނެ ކަމަށް އެމްއެމްޕއާރުސީން ބުންޏެވެ.

"މީގެ އިތުރުން ބޮޑުބެރު ހުށަހެޅުންތަކާއި ފޯރިގަދަ ރޮބޯމޭން ޝޯކޭސް އެއް ވެސް ކުރިއަށް ދާނެ އެވެ،" އެމްއެމްޕީއާރުސީގެ ބަޔާނުގައި ވެ އެވެ.

އެމްއެމްޕީއާރުސީގެ ސީއީއޯ އަދި އެމްޑީ އިބްރާހިމް ޝިއުރީ ވިދާޅުވީ އެ ފެސްޓިވަލަކީ ޓޫރިސްޓުންނާއި އާއްމުންނަށް ތަފާތު ތަޖުރިބާތަކެއް ހޯދައިދިނުމުގެ ގޮތުން އެ ކޯޕަރޭޝަނުން ރާވާ ހަރަކާތެއް ކަމަށެވެ.

"މި ހަރަކާތުގައި މި އަހަރު ރާއްޖޭގެ ކާމިޔާބީތައް ފާހަގަކުރުމާއި ރާއްޖޭގެ ތަފާތު ސަގާފީ ތަރިކަ ޕްރޮމޯޓް ކުރާނެ. މިއީ ދިވެހިންނާއި ފަތުރުވެރިންނަށް އާ ތަޖުރިބާއެއް ހޯދައިދިނުމަށް ކުރިއަށް ގެންދާ މުހިންމު ހަރަކާތެއް. މިކަމުގައި ބައިވެރިވުމަށް އަޅުގަނޑުމެން އެންމެންނަށް ދައުވަތު އަރުވަން،" އޭނާ ވިދާޅުވި އެވެ.

ފުޑް ފެސްޓިވަލާއި އާ އަހަރު ފެށުމާ ގުޅުން ހުރި އެހެނިހެން ހަރަކާތްތައް ބާއްވަނީ ޓޫރިޒަމް މިނިސްޓްރީ އާއި އެޗްޑީސީ އާއި މައި ހުޅުމާލެ އާއި ބީސީސީ އާއި މާލެ ސިޓީ ކައުންސިލާއި ވެމްކޯ އާއި ސިފައިންނާއި ފުލުހުންނާއި ޕީއެސްއެމާއި އެމްއޭސީއެލާއި ދިރާގާއި އުރީދު އާއި މަންޓާ އެއާ އާއި މޯލްޑިވިއަން އެއާލައިނާއި އޭސް ޓްރެވެލްސް އަދި ގަލްފް އެއާއާ ގުޅިގެން ކަމަށް އެމްއެމްޕީއާރުސީން ބުންޏެވެ.