އޭދަފުށީގެ ތަފާތަކީ ރަށުގެ ފުޓްބޯޅައަށް ކުރި ވަރުގަދަ އިންވެސްޓް: އާފީ

އޭދަފުށީގެ ފުޓްބޯޅައިގެ ކާމިޔާބުގެ ސިއްރަކީ ރަށުގެ ފުޓްބޯޅައަށް އަމިއްލަ ފަރާތްތަކުން ކުރި އިންވެސްޓްމެންޓް ކަމަށް ނިމިގެން ދިޔަ ގޯލްޑް ކަޕް އެ ރަށު ޓީމަށް ކާމިޔާބުކޮށް ދިން ކޯޗު އާފިއު މުހައްމަދު ހަމީދު (އާފީ) ބުނެފި އެވެ.

މި އަހަރަކީ އޭދަފުށީގެ ފުޓްބޯޅައިގައި ހާއްސަ އަހަރެކެވެ. ގޯލްޑް ކަޕްގެ އިތުރުން އަހަރު ކުރީކޮޅު އެ ރަށުން ވަނީ ގޯލްޑަން ފުޓްސަލް ޗެލްންޖުގެ ތަށި ވެސް ކާމިޔާބުކޮށްފަ އެވެ.

ކުރިން ވިކްޓަރީ އާއި ނިއު ރޭޑިއަންޓަށް ވެސް ކުޅުނު އާފީ ބުނި ގޮތުގައި އޭދަފުށިން ފުޓްބޯޅައިގައި ދަމަހައްޓަމުންދާ ނުފޫޒަކީ އެ ރަށުގެ ވިޔަފާރިވެރިންނާއި ވަކިވަކި ފަރުދުން ކުރި މަސައްކަތެވެ.

"ރަށުގައި އެ އޮތީ ރާއްޖޭގެ އެންމެ ފެންވަރު ރަނގަޅު ސްޓޭޑިއަމް ހަދާފައި. އަމިއްލަ ވިޔަފާރިވެރިޔެއްގެ ބޮޑު ކޮންޓްރަބިއުޝަނެއް އެއީ،" އާފީ ބުންޏެވެ.

އޭނާ ބުނީ އެހެން ބައެއް ރަށްރަށުން މަޑުކޮށްގެން ތިބޭނީ ސަރުކާރުން އައިސް ދަނޑުތައް ހަދައި ދޭނެ އިރަކަށް ކަމަށެވެ.

"އޭދަފުށިން ބޭނުންވީ ފުޓްބޯޅައިގައި ދަމަހައްޓާ އެ ނުފޫޒު ދަމަހައްޓަން. އެކަން ދެމެހެއްޓޭނީ ރަނގަޅު ދަނޑެއް ލިބިގެން. ރަށުގެ ޒުވާނުންގެ އެ އުއްމީދު ރަށުގެ ވިޔަފާރިވެރިޔަކު ހަގީގަތަކަށް ހަދައި ދިނީ،" އާފީ ބުންޏެވެ.

އޭނާ ބުނީ އޭދަފުށީގައި އޮތީ ރާއްޖޭގެ އެހެން ރަށަކާ އަޅާ ނުކިޔޭނެ ވަރުގެ އިންވެސްޓްމެންޓް ކަމަށެވެ.

"ދަނޑެއް އަޅާފަ ދޫކޮށްލީކީ ނޫން. އޭގެ ބޭނުން ވެސް ހިފީ ރަނގަޅަށް. އެކަޑަމީ ހަދައި (ޖޫނިއާ ކުޅުންތެރިންގެ) ޑިވެލޮޕްމެންޓްގެ މަސައްކަތް ވެސް ފެށީ،" އޭދަފުށީގައި ކުރިން ޓީޗަރެއްގެ ގޮތުގައި ވެސް ވަޒީފާ އަދާކުރި އާފީ ބުންޏެވެ.

އަންގާރަ ދުވަހުގެ ރޭގެ މެޗު އޭދަފުށިން ކާމިޔާބު ކުރީ 2-0 އިންނެވެ. ފުރަތަމަ ހާފުގައި ގިނަ ހަމަލާތަކެއް އުފެއްދި ނަމަވެސް ދެ ވަނަ ހާފުގައި އޭދަފުށީ ޓީމުގެ ހަމާލާތައް މަދުވި އެވެ.

އާފީ ބުނީ ދެ ވަނަ ހާފުގައި އައްޑޫން އިތުރަށް ހިތްވަރުކުރާނެކަން އެނގޭތީ އެ ހާފުގައި އޭނާގެ ޓީމުން ބޮޑަށް އިސްކަން ދިނީ ޑިފެންސްކޮށް ކައުންޓާގައި ހަމަލާ އުފެއްދުމަށް ކަމަށެވެ.

"އެއް ލަނޑުގެ ލީޑެއްގައި އަހަރެމެން އޮއްވައި ދެ ވަނަ ހާފަށް ނުކުންނަ އިރު އިދިކޮޅު ޓީމުން ކުރިއަށް ޖެހި ހަމަލާތައް ވަރުގަދަ ކުރާނެކަން އެނގޭ. އެހެންވެ އެ ހާފުގައި އަހަރެމެން ވިސްނީ ލީޑް އަތުގައި ބޭއްވޭނެ ގޮތަކަށް. އެހެންވެ ޑިފެންސްކޮށްފަ ދެން ލިބޭ ބޯޅަތަކުގަ ހަމަލާ އުފައްދަން (ދެ ވަނަ ހާފުގައި) އިސްކަން ދިނީ. އެ ޓެކްޓިކަލް ގޭމް ވޯކްކޮށްފި،" އާފީ ބުންޏެވެ.

އަންނަ މަހު ފަށާ ގޯލްޑް ފުޓްސަލް ޗެލެންޖް މުބާރާތަށް ތައްޔާރުވުމުގެ މަސައްކަތް ވެސް އޭދަފުށިން މިހާރު ވަނީ ފަށައިފަ އެވެ.