އޭދަފުށީ ޓީމަށް އެ ރަށުން ރަތްދޫލައިގެ މަރުހަބާއެއް

ނައިންޓީ ޕްލަސް ގޯލްޑް ކަޕް ކާމިޔާބުކުރި ބ. އޭދަފުށި ފުޓްބޯޅަ ޓީމު އިއްޔެ ހަވީރު އެރަށަށް ދިއުމުން ހޫނު މަރުހަބާއެއް ކިޔައިފި އެވެ.

ރާއްޖޭގެ ހުރިހާ ރަށާއި، ސިޓީތަކަށް ހުޅުވާލައިގެން އަމިއްލަ ބަޔަކު ބޭއްވި މި މުބާރާތުގެ ފުރަތަމަ ތަށި ކާމިޔާބުކުރި އޭދަފުށީ ކުޅުންތެރިން ރަށް ދިޔަ ލޯންޗަށް ފަޅުތެރެއިން ކުރުފަލީގެ ހާއްސަ މަރުހަބާއެއް ކި އެވެ. ވަރަށް ބޮޑަށް ޒީނަތްތެރިކޮށްފައި އޮތް ރަށުގެ ބަނދަރުމަތިން ޓީމާ އިސްތިގުބާލުކުރެއްވީ ރަށު ކައުންސިލްގެ މެމްބަރުންނެވެ. އަދި ރަތްދޫލައިގެ މަތިން ކުޅުންތެރިން ދެން ގޮސް އެރީ ހާއްސަ އުޅަނދަކަށެވެ. އަދި އެ ސަރަހައްދަށް އެއްވެފައި ތިބި ރައްޔިތުންގެ ތަރުހީބާ އެކު ކުޅުންތެރިން އެ އުޅަނދުގައި ހާއްސަ ޕެރޭޑެއްގައި ދިޔައީ ސްޓޭޑިއަމަށެވެ.

އުފާފާޅުކުރުންތައް އޮތީ ވިޔަފާރިވެރިޔާ އަހުމަދު ނަޒީރު (ކްރައުން ނަޒީރު) ތަރައްގީކޮށްފައިވާ އެ ސްޓޭޑިއަމުގަ އެވެ. ހާހެއްހާ މީހުންނަށް ވަދެވޭ އެތަން އޭރު އޮތީ މީހުންނައިގެން ފުރިފަ އެވެ. މުހިފޫހިފިލުވުމުގެ ހަރަކާތްތަކާ އެކު ކުރިއަށް ގެންދިޔަ އެ އިވެންޓުގައި ވަނީ އޭދަފުށީ ޓީމަށް އަމިއްލަ ފަރާތްތަކުން ދިން ފައިސާގެ އިނާމު ވެސް ހަވާލުކޮށްފަ އެވެ. މީގެ އިތުރުން ބ. އަތޮޅު ކައުންސިލާއި، އޭދަފުށީ ކައުންސިލުން ވަނީ ފުޓްބޯޅަ ޓީމާއި، ކުޅުންތެރިންނާއި، ސަޕޯޓަރުންގެ މަސައްކަތް ބަލައިގަނެ ޝުކުރުއަދާކޮށްފަ އެވެ.

މި އިވެންޓުގައި ވަނީ އޭދަފުށިން ގޯލްޑް ކަޕުގައި ހޯދި ކާމިޔާބީގެ އިތުރުން ފުޓްސަލްގައި ހޯދި ކާމިޔާބީތައް ވެސް ފާހަގަކޮށްފަ އެވެ.

މި އަހަރު އޭދަފުށިން އެންމެ ފުރަތަމަ ކާމިޔާބުކުރީ މުޅި ރާއްޖެ އަށް ހުޅުވާލައިގެން ގޯލްޑަން ފުޓްސަލް އެސޯސިއޭޝަނުން ބޭއްވި ގޯލްޑަން ފުޓްސަލް ޗެލެންޖެވެ. ޗެމްޕިއަންކަން ހޯދީ ފައިނަލުގައި ލ. ގަން އަތުން 4-2 އިން މޮޅުވެގެންނެވެ. އެ ރަށުން މިއަހަރު ހޯދި ދެ ވަނަ ކާމިޔާބަކީ ބ. އަތޮޅަށް ހުޅުވާލި ބޭއްވި ބެޓާ އިން ބާ ފުޓްސަލް މުބާރާތެވެ. އޭދަފުށީގައި ކުޅުނު މުބާރާތުގެ ފައިނަލް އެ ޓީމުން ކާމިޔާބުކުރީ ބ. ކިހާދޫ 6-0 އިން ބަލިކޮށްގެންނެވެ.

މާލޭގައި އޮތް ގޯލްޑް ކަޕް އޭދަފުށިން ކާމިޔާބުކުރީ އައްޑޫ ސިޓީ އަތުން 2-0 އިން މޮޅުވެގެންނެވެ. ގަލޮޅު ދަނޑުގައި ކުޅުނު އެ މެޗު ބަލަން ގިނަ އަދަދެއްގެ ބަޔަކު ވަނެވެ. އެއީ ފަހަކަށް އައިސް ރާއްޖޭގައި ބޭއްވި އެންމެ ފޯރިގަދަ ފުޓްބޯޅަ މުބާރާތެވެ.

ގައުމީ ފައިނަލަށް ދަތުރުކުރި މާލޭން ބޭރު ފުރަތަމަ ޓީމުގެ ޝަރަފް މީގެ ކުރިން ހޯދާފައިވާ އޭފަފުށިން ވަނީ ރާއްޖޭގެ އެއް ވަނަ ޑިވިޝަނުގައި 1986-1992 އަށް ވާދަކޮށްފަ އެވެ. އަދި އެ ރަށުން ވަނީ ގައުމީ ޓީމަށް ގިނަ ކުޅުންތެރިންތަކެއް ނެރެދީފަ އެވެ. ރާއްޖޭގެ މިހާރުގެ އެންމެ ވަރުގަދަ ޓީމު ކަމަށްވާ މާޒިޔާގައި ވެސް އޭދަފުށީގެ ކުޅުންތެރިން މުހިއްމު ދައުރެއް އަދާކުރެ އެވެ.