ގޯލްޑް ކަޕުގެ އިނާމު ފައިސާ: އޭދަފުއްޓަށް އެއް ލައްކަ، އައްޑުއަށް ބައި ލައްކަ

ގޯލްޑް ކަޕުގެ އިނާމު ފައިސާގެ ގޮތުގައި ޗެމްޕިއަން އޭދަފުއްޓަށް 100،000ރ. އަދި ރަނަރަފް އައްޑޫ ސިޓީ އަށް 50،000ރ. ދިނުމަށް މުބާރާތް އިންތިޒާމުކުރި ނައިންޓީ ޕްލަސްއިން ނިންމައިފި އެވެ.

މުބާރާތުގެ އިނާމު ފައިސާގެ އަދަދެއް ކުރިން އިއުލާންކޮށްފައެއް ނުވެ އެވެ. އަދި މުބާރާތުގެ ނިންމުމުގެ ރަސްމިއްޔާތުގައި މެޑެއްޔާއި ތަށި ހަވާލުކުރިއިރު އިރު ރަމްޒީ ޗެކެއް ނުދެ އެވެ. އެހެންވެ ގިނަ ބަޔަކު ހީކުރީ އިނާމު ފައިސާއެއް ކަނޑައެޅިފައި ނުވާ ކަމަށެވެ.

އެކަމަކު ނައިންޓީ ޕްލަސްގެ މެނޭޖިން ޑިރެކްޓަރު އަދި ތަޖުރިބާކާރު ކޯޗު މުހައްމަދު ޝާޒްލީ (ޝާޒް) ބުނީ އިނާމު ފައިސާ ކަނޑައެޅިފައިވާ ކަމަށެވެ. އަދި އެ ފައިސާ ވަރަށް އަވަހަށް ހަވާލުކުރާނެ ކަމަށް ވެސް އޭނާ ބުންޏެވެ.

ގޯލްޑް ކަޕް ހާއްސަ ކުރީ ސިޓީތަކާއި ރަށްތަކަށެވެ. ނައިންޓީ ޕްލަސްއިން ފޯމެޓް އެކުލާވާލީ 24 ޓީމަށް އަމާޒުކޮށެވެ.މުބާރާތުގައި ބައިވެރިވާން ހުޅުވާލުމުން 22 ރަށަކުން ޝައުގުވެރިވި އެވެ. އެކަމަކު ސްކޮޑް ރަޖިސްޓަރީ ކުރުމަށް ދިން ފުރުސަތުގައި ފަސް ރަށަކަށް ސްކޮޑުން ހުށަހަޅާފައި ނުވެ އެވެ.

މި މުބާރާތް ވެގެންދިޔައީ ފަހަކަށް އައިސް ރާއްޖޭގައި ބޭއްވި އެންމެ ކާމިޔާބު ފުޓްބޯޅަ މުބާރާތަށެވެ. މެޗަށް އާއްމުންނާއި، މީޑިއާގެ ސަމާލުކަން ވަރަށް ބޮޑަށް ލިބުނެވެ. އަދި މެޗުތައް ބަލަން ވަރަށް ގިނަ ބަޔަކު ދަނޑަށް ވެސް ދިޔަ އެވެ.