ރަށު ލޯބީގައި ކުޅޭއިރު އަންނަނީ އާދަޔާހިލާފު ޖޯޝެއް: ސައްޓު

ރަށުވަންތަ ލޯބީގައި ކުޅޭއިރު އެ އަންނަ ޖޯޝާއި ރޫހު ސިފަކޮށް ނުދެވޭނެކަމަށް ގޯލްޑް ކަޕް ބ. އޭދަފުއްޓަށް ކާމިޔާބުކޮށް ދިނުމުގައި މޮޅު ކުޅުމެއް ދެއްކި އެ ޓީމުގެ ކެޕްޓަން އިޝާން އިބްރާހިމް (ސައްޓު) ބުނެފި އެވެ.

ގައުމީ ފުޓްބޯޅަ ދަނޑުގައި ރޭ ކުޅުނު ފައިނަލު މެޗު އައްޑޫ ބަލިކޮށް އޭދަފުށިން ކާމިޔާބު ކުރީ 2-0 އިންނެނެވެ. މުބާރާތުގައި އެންމެ ގިނަ އެސިސްޓް ކުރި ކުޅުންތެރިންގެ ލިސްޓްގައި އޮތް ސައްޓު ބުނީ ރަށު ޓީމަށް ކުޅޭއިރު އަންނަ ރޫހު ކްލަބަކަށް ކުޅުމާ އަޅާ ނުކިޔޭނެ ކަމަށެވެ.

"ކްލަބަށް ކިތަންމެ ވަރަކަށް ކުޅުނަސް މި ރޫހެއް ނާންނާނެ. ރަށު ޓީމަށް ކުޅޭއިރު އެ އަންނަ ކިކު ބުނެދޭކަށް ވެސް ނޭނގޭ،" ދިވެހި ލީގުގައި ކުރިން ޓީސީ އަށް ވެސް ކުޅުނު އިޝާން ބުންޏެވެ.

އޭނާ ބުނީ މުބާރާތުގެ ދެ ވަނަ ބުރާ ހަމައިން ޓީމާ ގުޅުނު ކުޅުންތެރިން ވެސް ތިބީ ރަށު ޓީމަށް ކުޅެން ވަރަށް ބޮޑު ޖޯޝެއްގައި ކަމަށެވެ.

އޭދަފުށިން މުބާރާތަށް ނުކުތީ ސްކޮޑްގައި އެ ރަށަށް ނިސްބަތްވާ ތިން ކުޅުންތެރިން ކަމަށްވާ ހަމްޒާ މުހައްމަދު (ހަމްޕު) އާއި ނިޝާމް މުހައްމަދު (ޕޮގް) އާއި ހައިޝަމް ހަސަން (ބިޑި) ގެ ނަން ވެސް ޖަހައިގެންނެވެ.

އެކަމަކު މުބާރާތުގެ ފުރަތަމަ ބުރުގައި އެ ކުޅުންތެރިންނަށް ނުކުޅެވުނީ ކުޅެމުންދާ ކްލަބްތަކުން ރިލީޒް ނުކުރުމުންނެވެ. ދެ ވަނަ ބުރު ފެށުމުގެ ކުރިން ސްކޮޑްގައި ކުޅުންތެރިން ޖަހަން ޓީމުތަކަށް ދިން ފުރުސަތުގައި އަލީ ފާސިރު (ސެންޓޭ) ގެ ނަން ވެސް އޭދަފުށިން ސްކޮޑުގައި ޖެހި އެވެ. އަދި އަނެއް ތިން ކުޅުންތެރިންނަށް ވެސް އެ ކުޅުންތެރިން ނިސްބަތްވާ ކްލަބްތަކުން ރިލީޒް ވެސް ދިނެވެ.

އިޝާން ބުނީ އެ ކުޅުންތެރިން ވެސް ތިބީ ރަށު ޓީމަށް ކުޅެން އަމިއްލަ އަށް އެދިއެދި ކަމަށެވެ.

"ރަށަށް މިކަން ކޮށްދޭ ހިތުން އެ މީހުން ވެސް ތިބި ވަރަށް ފޯރީގައި،" މި އަހަރުގެ ގޯލްޑަން ފުޓްސަލް މުބާރާތް ވެސް އޭދަފުއްޓަށް ކާމިޔާބުކޮށް ދިނުމުގައި ހިއްސާވި އިޝާން ބުންޏެވެ.

މިނިވަން ޗެމްޕިއަންޝިޕްގެ 2016 ގެ ތަށި އޭދަފުއްޓަށް ކާމިޔާބުކޮށް ދިނުމުގައި ވެސް މުހިންމު ދައުރެއް އަދާކުރި އިޝާން ބުނީ ރާއްޖޭގެ ލީގުގައި ވެސް ކޮންމެ ވެސް ދުވަހަކުން ހޯމް އެންޑް އަވޭ އުސޫލުން ލީގު ކުޅެވޭނެ ދުވަހެއް އަންނަން ޖެހޭ ކަމަށެވެ.

"ލީގު އެހެން ބޭއްވޭނީ ޓީމުތައް ބިޒްނަސް މޮޑެލް އަކަށް ސަސްޓެއިން ކޮށްގެން. ފަހަރެއްގައި އެކަމަށް ވަގުތު ނަގާފާނެ. އެކަމަކު އެބަޖެހޭ ކޮންމެވެސް އެހެން ކުދިކުދި މުބާރާތްތަކެއް ބާއްވައިގެން ވެސް ރަށްރަށަށް ވާދަކުރެވޭނެ މުބާރާތްތަކެއް މެދުނުކެނޑި ބާއްވަން،" އޭނާ ބުންޏެވެ.

އިޝާން ބުނީ އޭދަފުށީގައި ޖޫނިއާ ލެވަލްގައި ވެސް ވަރަށް ރަނގަޅު ކުޅުންތެރިންތަކެއް މިހާރު ވެސް އެބަތިބި ކަމަށެވެ.

އެ ކުޅުންތެރިންނަށް ވެސް ރަށް ތަމްސީލު ކުރެވޭ ޖޫނިއާ ކެޓަގަރީގެ މުބާރާތްތަކެއް ވެސް ބޭއްވިދާނެ ކަމަށް އޭނާ ބުންޏެވެ.

"ބޭނުންވަނީ މެދު ނުކެނޑި މި ފުރުސަތުތައް އޮތުން،" އިޝާން ބުންޏެވެ.