ފުޓްބޯޅައިގައި އޭދަފުށި: ނުފޫޒުގަދަ ނަމެއް، މުއްސަނދި ތާރީހެއް

އޭދަފުއްޓޭ ބުނެފި ނަމަ ވަރަށް ގިނަ ބައެއްގެ ހިތަށް ވަންނާނީ ފުޓްބޯޅަ އެވެ. ސަބަބެއް ނެތިއެއް ނޫނެވެ. އެއީ ގައުމީ ފުޓްބޯޅަ މުބާރާތުގެ ފައިނަލުން ޖާގަ ހޯދި އަތޮޅުތެރޭގެ ފުރަތަމަ ރަށެވެ. އެއީ ފުރަތަމަ ޑިވިޝަނުގައި ހަތް އަހަރު ވާދަކޮށް ރާއްޖޭގެ ބޮޑެތި ޓީމުތައް ސިއްސުވާލި ނަތީޖާތައް ނެރުނު ރަށް ވެސް މެ އެވެ. އަދި ގައުމީ ޓީމަށް އެންމެ ގިނަ ކުޅުންތެރިން ނެރެދޭ އެއް ރަށުގެ ޝަރަފް ވެސް އޮތީ އެ ރަށުގެ އަތުގަ އެވެ.

ރާއްޖޭގެ ފުރަތަމަ ޖުމްހޫރީ ވެރިކަމުގައި 1950 ވަނަ އަހަރު އެކުލަވާލި ގައުމީ ތަރައްގީގެ މަޝްރޫއުގެ ދަށުން ކޮންމެ ރަށެއްގައި ބޯޅަ ކުޅޭނެ ބިމެއް ހަމަޖެއްސި ހިސާބުން ފެށިގެން އޭދަފުށީގައި އައީ ފުޓްބޯޅަ ކުޅެމުންނެވެ. ނަތީޖާއަކަށްވީ، ހަމަ އެ އަހަރު އިފްތިތާހުކުރި ގައުމީ ފުޓްބޯޅަ މުބާރާތުގައި މާލޭން ބޭރުން ވާދަކުރި ފުރަތަމަ މަދު ރަށްތަކުގެ ތެރޭގައި އޭދަފުށި ހިމެނުމެވެ. އެ ޝަރަފް އެންމެ ފުރަތަމަ ހޯދީ 1956 ވަނަ އަހަރު ފާދިއްޕޮޅުގެ ނަމުގައި ބައިވެރިވި ޅ. ހިންނަވަރު ޓީމުންނެވެ. އޭގެ ފަހުން ސީދާ ހިންނަވަރުގެ ނަމުގައި އެ ރަށު ޓީމަކާއި، ތި. ވިލުފުއްޓާއި، ޅ. ނައިފަރު، އަދި ދ. ކުޑަހުވަދޫން ވެސް އެ މުބާރާތުގައި ވާދަކުރި އެވެ.

ގައުމީ މުބާރާތުގައި އޭދަފުށިން އެންމެ ފުރަތަމަ ބައިވެރިވީ 1966 ވަނަ އަހަރެވެ. ބަހިއްޔާ ސައާދާ މުސްކުޅި ދަރިވަރުންގެ ޖަމިއްޔާ (ބ.ސ.މ.ދ ޖަމިއްޔާ) ގެ ނަމުގައި ވާދަކޮށް އެ ފަހަރު އޭދަފުށީ ކެޓީ މިއުޒިކީ ގުލްޝަނުގެ ރާނީބައި (ރާނީ ކްލަބް) އަތުން 5-1 އިން ބަލިވެގެންނެވެ. އޭދަފުށިން ޖެހިގެން އައި އަހަރު ނުކުތީ އާ އަޒުމަކާ އެކު އެވެ. އެގޮތުން ރާނީ ކްލަބް 1-0 އިން ބަލިކޮށް އެ ޓީމު އަތުން ބަދަލު ހިފައި ފައިނަލަށް ދިޔަ އެވެ. ގައުމީ ފައިނަލުން ޖާގަ ހޯދި އަތޮޅުތެރޭގެ ފުރަތަމަ ޓީމުގެ ޝަރަފް އޭދަފުށްޓަށް ލިބުނީ އެ އަހަރެވެ. އެކަމަކު ފައިނަލުގައި އޭރު މާލޭގެ ގަދަބާރު އެމް އޯކިޑް ކްލަބް އަތުން 7-0 އިން ބަލިވީ އެވެ.

އޭގެ ފަހުން ބ.ސ.މ.ދ ޖަމިއްޔާ އިން އައީ ގަވާއިދުން ގައުމީ މުބާރާތުގައި ވާދަކުރަމުންނެވެ. އެކަމަކު ދުރާލާ ތައްޔާރުވެ، ބޭރު ކުޅުންތެރިންނާއި، ކޯޗުން ހޯދައިގެން ވަރުގަދަ ޓީމެއްގެ ގޮތުގައި ފުރަތަމަ ޑިވިޝަނުގައި ވާދަކުރުމުގެ ވިސްނުން ގެންގުޅެން ފެށީ 1980ގެ އަހަރުތަކުގެ ކުރީކޮޅު އެ ރަށު ޒުވާނުންގެ ޖަމިއްޔާ އިންނެވެ. އެކަމަށްޓަކައި ގައުމީ މުބާރާތުގެ ދެ ވަނަ ޑިވިޝަނުގައި ވާދަކޮށް 1984 ވަނަ އަހަރު ފައިނަލަށް ވެސް ދިޔަ އެވެ. އެކަމަކު ރޭވަންސްގެ ދެ ނަމްބަރު ޓީމު އަތުން ބަލިވެ ފުރުސަތު ގެއްލުނީ އެވެ. އެ ޓީމުގެ އުއްމީދު ހާސިލްވީ 1985 ވަނަ އަހަރުގެ ދެ ވަނަ ޑިވިޝަނުގެ ފައިނަލުގައި، ހާމިދު އަބްދުލްޣަފޫރުގެ ކެޕްޓަންކަމުގެ ދަށުން ކުޅުނު ވެލެންސިއާގެ ބީ ޓީމު ކަމަށްވާ ޔުވެންޓަސް އަތުން 1-0 އިން މޮޅުވެގެންނެވެ.

އެ އަހަރުގެ ފުރަތަމަ ޑިވިޝަނުގެ ގައުމީ މުބާރާތުގެ ފައިނަލް މެޗު ޝަރަފްވެރިކޮށްދެއްވުމަށް ފަހު ރައީސް މައުމޫން އަބްދުލްގައްޔޫމް ދެއްކެވި ވާހަކަފުޅުގައި ވެސް ވަނީ އޭދަފުށީގެ އެ ކާމިޔާބީ ފާހަގަކުރައްވައި އެކަމަށް މަރުހަބާ ވިދާޅުވެފަ އެވެ.

"ހާއްސަ ގޮތެއްގައި، ރާއްޖެތެރޭގެ ކްލަބެއް މިފަދަ ފަހުރުވެރި މަގާމެއް ހޯދިކަން އެއީ އަޅުގަނޑުހިތުން އަޅުގަނޑުމެން އެންމެންވެސް ވަރަށް ބޮޑަށް އުފާކުރަންޖެހޭނެ ކަމެއް،" ވިކްޓްރީން ރައީސުލްޖުމްހޫރިއްޔާގެ ވާދައިގެ ތަށި މިލްކުކުރި އެ މެޗަށް ފަހު ރައީސް މައުމޫން ވިދާޅުވި އެވެ.

އޭދަފުށީ ޒުވާނުންގެ ޖަމިއްޔާ އިން 1986 ވަނަ އަހަރު އަލަށް ފުރަތަމަ ޑިވިޝަނުގައި ވާދަކުރިއިރު މާލޭގެ ކްލަބްތަކުން މަދުމަދުން ބޭރު ކުޅުންތެރިން ވަނީ ގެންނަން ފަށައިފަ އެވެ. އޭގެ ތެރޭގައި މުޅިން ވެސް ހިމެނެނީ އަވަށްޓެރި ސްރީ ލަންކާގެ ތަރިންނެވެ. އޭދަފުށިން ވެސް މާލޭ ޓީމުތަކަށް ދޫނުދީ ލަންކާގެ ތަރިން ގެންނަން ފެށި އެވެ. އޭގެ ތެރޭގައި މަޝްހޫރު ފޯވާޑް މުހައްމަދު އަމާނުﷲ އާއި، ޖަގަތު ރޯހަން، އާއި އާނަންދު ކުމާރު، އަދި ޕްރިޔަނާތު ޕެރޭރާ ހިމެނެ އެވެ.

ބިދޭސީ ކުޅުންތެރިންގެ އިތުރުން އޭދަފުށީ ޓީމުގައި އެ ރަށުން ބޭރު ކުޅުންތެރިން ވެސް ހިމެނުނެވެ. އޭގެ ތެރޭގައި، ފަހުން ރައްޔިތުންގެ މަޖިލީހުގެ ދިއްދޫ ދާއިރާގެ މެމްބަރުކަން ކުރެއްވި، އޭރުގެ ގޯލްކީޕަރު އަހުމަދު ސަމީރު ފާހަގަކުރެވެ އެވެ. އޭދަފުށީ ޓީމުގައި ހިމެނުނު އެ ރަށު ކުޅުންތެރިންގެ ތެރެއިން ޑިފެންޑަރު އަބްދުލްވާހިދު ހުސެއިނަކީ، އޭދަފުށީގެ ތާރީހު ބަދަލުކޮށްލި ކުޅުންތެރިއެކެވެ. ސްރީ ލަންކާގައި 1991 ވަނަ އަހަރު ބޭއްވި ސާފް ގޭމްސްގައި ވާދަކުރި ގައުމީ ޓީމުން ޖާގަ ހޯދައި އޭނާ ވެގެންދިޔައީ އޭދަފުށީ ކުޅުންތެރިންގެ ތެރެއިން ގައުމީ ޖާޒީ ލުމުގެ ޝަރަފް ހޯދި ފުރަތަމަ ކުޅުންތެރިޔާ އަށެވެ. އަދި އޭނާ ވެގެންދިޔައީ އަތޮޅުތެރޭގެ ރަށެއްގެ ޓީމަކަށް ކުޅެމުން ގައުމީ ޓީމުން ޖާގަ ހޯދި ފުރަތަމަ ކުޅުންތެރިޔާ އަށެވެ.

ގައުމީ ޓީމަށް ކުޅުމަކީ ވާހިދުގެ ހުވަފެނަކަށްވީ ނަމަވެސް، ރަށެއްގެ ޓީމަކަށް ކުޅެމުން ގައުމީ ޓީމުން ޖާގަ ހޯދުމަކީ އޭރު އޭނާ ދުށް ގޮތުގައި ވުމަށް ވުރެ ނުވުން ގާތް ކަމެކެވެ. ގައުމީ ޓީމުގެ އެސިސްޓަންޓް ކޯޗު އަދި އޭރު ވިކްޓްރީގެ ހެޑް ކޯޗު އަބްދުލްޖަލީލު (އަބުޖީ)، އޭނާ ގާތު މި ފަހަރު ގައުމީ ޓީމުގެ ބެކް ބަލަހައްޓަން ޖެހޭނީ ވާހިދު ކަމަށް ބުނި ނަމަވެސް، އެއީ ލިބިދާނެ ފުރުސަތެއް ކަމަށް ގަބޫލެއް ނުކުރެވެ އެވެ.

އެހެން ހުއްޓާ، ގައުމީ ކޯޗު ހަންގޭރީގެ މިކޮލަސް ޓެމިސްވާރީ އިއުލާންކުރި ސްކޮޑުގައި ވާހިދު ހިމެނި، އަދި އިންޑިއާގައި އޮތް ޓްރެއިނިން ކޭމްޕުގައި ދެއްކި މޮޅު ކުޅުމާ އެކު ފުރަތަމަ އެގާރައިން ވެސް ޖާގަ އެއް ކަށަވަރުކުރި އެވެ. ދޮންބިލެތް އަހުމަދު ހަލީމާއި، އަހުމަދު ކަލީމާއި، މޫސާ މަނިކު (ކުޑަމޫސަ)، އަދި އިސްމާއީލް އާސިފް (ކުޑަހީނާ) ހިމެނުނު އެ ޓީމުން، ސްރީ ލަންކާގައި އޮތް އެ މުބާރާތުގެ ފައިނަލަށް ގޮސް، ރާއްޖެ އަށް ފުޓްބޯޅައިން ފުރަތަމަ ފަހަރަށް ރިހި މެޑެއްޔެއް ހޯދިއިރު ވާހިދު ވަނީ ރާއްޖޭގެ ޑިފެންސް ލައިން ބެލެހެއްޓުމުގައި މޮޅު ކުޅުމެއް ދައްކައިފަ އެވެ.

އެ މުބާރާތަށް ފަހު ވާހިދު އެނބުރި އައުމުން އޭދަފުށީ ރައްޔިތުން އެކަން ވަރަށް ބޮޑަށް ފާހަގަކުރި އެވެ. އިނގިރޭސި ރާނީ އެލިޒަބަތުގެ ޝަރަފުގައި 1972 ގައި އިނގިރޭސި މަނަވަރު ޓީމާ ދެކޮޅަށް ކުޅެން މުޅި ރާއްޖޭން ނެގި ޓީމުގައި އޭދަފުށީ އަލީ ވަހީދު ހިމެނުނު ނަމަވެސް، ވާހިދު ވެގެންދިޔައީ ރަސްމީކޮށް ގައުމީ ޓީމެއް އެކުލަވާލެވި އެ ޓީމުގައި ހިމެނުނު އޭދަފުށީގެ ފުރަތަމަ ކުޅުންތެރިޔާ އަށެވެ.

"ރަށުގެ ރައްޔިތުންނަށް ލިބުނު ވަރަށް ބޮޑު އުފަލެއް އެއީ. ރަށަށް އައުމުން ވަރަށް ހޫނު މަރުހަބާއެއްކީ،" ވާހިދު ބުންޏެވެ.

ޖެހިގެން އައި 1992 ވަނަ އަހަރަކީ، މުސާރަ ދީގެން ޕްރޮފެޝަނަލް އުސޫލުން ކުޅުންތެރިން ލައްވައި ކުޅުވަން ވެލެންސިއާ އިން ފަށައި ދިވެހި ފުޓްބޯޅަ އަށް އިންގިލާބެއް ގެނައި އަހަރެކެވެ. ހައިރާންވެދާނެ އެވެ. އެކަމަކު ވެލެންސިއާ އިން މުސާރަ ދީގެން ރާއްޖޭގެ މަޝްހޫރު ވަރަށް ގިނަ ކުޅުންތެރިން ގެންގޮސް ބިނާކުރި ވަރުގަދަ ޓީމަށް އެ ސީޒަނުގައި އެންމެ ބޮޑު ޗެލެންޖެއް ދިން އެއް ޓީމަކީ ވެސް އޭދަފުށްޓެވެ. އެ އަހަރުގެ ގައުމީ މުބާރާތުގައި އޭދަފުށިން ވެލެންސިއާއާ 1-1 އިން އެއްވަރުކުރުން އޭރުގެ ނޫސްތަކުން ސިފަކުރީ "މޮޅު ކުޅުންތެރިންތަކެއް ގަނެގެން ވެލެންސިއާ އިން ކުރިމަތިލީ ފުރަތަމަ ފުޓްބޯޅަ މޫސުމުގައި އެ ޓީމަށް ލިބުނު ބޮޑު ސިހުމެއް" ގެ ގޮތުގަ އެވެ.

ޖެހިގެން އައި މެޗުގައި، އޭޝިއަން ކްލަބް ޗެމްޕިއަންޝިޕުގައި ޕާކިސްތާނުގެ ވޮހައިބް އަތުން 6-1 އިން ބަލިވެ ވެލެންސިއާ އިން އެ ޓީމުގެ ޖަރުމަން ކޯޗު ޕީޓާ އޮބަމެއާ ވަކިކުރި އެވެ. ބޮޑު އަގުގައި ވެލެންސިއާ އިން ގެނައި އެ ކޯޗު ވަކިކުރި ސަބަބުތަކުގެ ތެރޭގައި އޭދަފުށި އަތުން މޮޅުނުވެވުން ވެސް ހިމެނެ އެވެ.

ރަނގަޅު ނަތީޖާތަކެއް ނެރުނު ނަމަވެސް އެ އަހަރަކީ އޭދަފުށީ އެންމެ ބަދު ނަސީބު އަހަރު ވެސް މެ އެވެ. މުބާރާތުގެ ގަދަ ހަތަރަކުން ޖާގަ ނުލިބި، ފަސް ވަނަ އަށް ދިއުމުން އެ ޓީމަށް ޖެހުނީ ރެލިގޭޝަން ޕްލޭއޮފުގައި، ދެ ވަނަ ޑިވިޝަނުގެ ރަނަރަޕް ކ. ހުރާ، ޖަމިއްޔަތުލް ހުއްރިއްޔާ ކުޅޭށެވެ. ފަހުން ދިވެހި ފުޓްބޯޅައިގެ ގަދަބާރަކަށްވި އަދި، އަބްދުﷲ އިބްރާހީމް (އަބުޅޯ) އާއި އަލީ ޝިހާމާއި، އަތީފް އަހުމަދު ފަދަ ޒުވާން ތަރިން ހިމެނުނު، ހުއްރިއްޔާ އަކީ އޭރު އޭދަފުށްޓާ ބަލާއިރު އާދައިގެ ޓީމެކެވެ. ގިނަ ބަޔަކު ހީކޮށްގެން ވެސް ތިބީ، ނިއު ރޭޑިއަންޓް ފިޔަވައި ފުރަތަމަ ޑިވިޝަނުގެ ހުރިހާ ޓީމެއް ބަލިކޮށްފައިވާ އޭދަފުށިން ހުއްރިއްޔާގެ މައްޗަށް ފަސޭހަކަމާ އެކު ކާމިޔާބު ހޯދައި ފުރަތަމަ ޑިވިޝަނުގެ ޖާގަ ދިފާއުކުރާނެ ކަމަށެވެ.

އެކަމަކު އެ ދުވަހު ހުއްރިއްޔާގެ ޒުވާން، ހަލުވި ކުޅުންތެރިން ފުރަތަމަ ކަށިގަނޑާ އެކު ދައްކަން ފެށި ކުޅުމާ އެކު އޭދަފުށްޓަށް ލިބުނީ ޝޮކެކެވެ. މެދުތެރެއިން ކެޕްޓަން އަބްދުލްމަޖީދު ހަސަން އަށް ވެސް އެދެވޭ ކުޅުމެއް ނުދެއްކުނެވެ. ގޯލާ ރައްޓެހި އަމާނުﷲ އަށް ވެސް ލިބުނު ފުރުސަތުތަކުގެ ބޭނުން ނުކުރެވުނެވެ. ނަތީޖާއަކަށްވީ ހުއްރިއްޔާ އަށް އިތުރު ހިތްވަރެއް ލިބި، ދެ ވަނަ ހާފުގައި އަބުޅޯ ބޮލުން ވައްދާލި ގޯލުން ލީޑު ނަގައި 1-0 އިން މެޗު ކާމިޔާބުކުރުމެވެ. އެއާ އެކު، އޭދަފުށި ހަތް އަހަރަށް ފަހު ދެ ވަނަ ޑިވިޝަނަށް ރެލިގޭޓްވީ އެވެ.

ހުއްރިއްޔާ ފުރަތަމަ ޑިވިޝަނަށް އެރުމަކީ އުފަލަކަށްވިޔަސް އޭދަފުށީގެ ވެއްޓުންވީ ފުޓްބޯޅަ ސަޕޯޓަރުންނަށް ލިބުނު މާޔޫސްކަމެކެވެ. އޭދަފުށްޓަކީ ރަށެއްގައި ރަޖިސްޓްރީކޮށްފައިވާ ޓީމަކަށް ވުމުން އާއްމު އުސޫލުން ދެ ވަނަ ޑިވިޝަނުގައި ކުޅެވޭނީ އޭރު އޮންނަ ރާއްޖޭގެތެރޭގެ ޒޯން މުބާރާތް ކުޅުމަށް ފަހު އެވެ. އެކަމަކު އޭދަފުށިން ކޮށްފައިވާ މަސައްކަތް ބަލައިގަނެ ސްޕޯޓްސް މިނިސްޓަރު އުމަރު ޒާހިރު ވަނީ ޒޯން ނުކުޅެ ދެ ވަނަ ޑިވިޝަނުގައި ކުޅެން އޭދަފުށްޓަށް ފުރުސަތު ދެއްވައިފަ އެވެ.

"އޭދަފުށި ރާއްޖެތެރޭގައި ރަޖިސްޓްރީ އޮތްކަމުގައި ވިޔަސް އެ މީހުން ހަތް އަހަރަށް ވުރެ ގިނަ ދުވަސް ވެއްޖެ ފުރަތަމަ ޑިވިޝަނުގައި ކުޅޭތާ. ގަދަ ޓީމުތަކާ ކުޅެ ވެސް ވެސް އެ މީހުން ބައެއް ފަހަރު ސިއްސުވާލާ ބައެއް ޓީމު ބަލިކުރޭ. ކޯޗުންނާއި ކުޅުންތެރިން ބޭރުން ގެނެސް އެ މީހުން ހަރަދުކުރޭ،" އުމަރު ޒާހިރު ވިދާޅުވި އެވެ.

އެ ފަހި ފުރުސަތާ އެކު އޭދަފުށްޓަށް ދެމި އޮވެވޭ ގޮތެއް ނުވި އެވެ. އެންމެ ބޮޑު ސަބަބަކަށްވީ ޓީމަށް ހަރަދުކުރަމުން އައި މީހުން، ލިބުނު މާޔޫސްކަމުގައި ޓީމާ ކުޑަކޮށް ދުރަށް ޖެހިލުމެވެ. ދެ ވަނަ ޑިވިޝަނުގައި ވާދަކުރަން ބިދޭސީ ކުޅުންތެރިންގެ އެހީ ބޭނުންނުވާނެ ކަމަށް ބަލައި، ޓީމުގެ ބަޖެޓް ވެސް ކުޑަކޮށްލީ އެވެ. އަނެއްކޮޅުން ވާހިދު ހިމެނޭހެން ވަރަށް ގިނަ ކުޅުންތެރިން ފޫހިވެ ސީރިއަސް ފުޓްބޯޅައާ ދުރުވީ އެވެ.

"އެއްގޮތަށް ވެސް ފެންވަރު ނެތިގެނެއް ނޫން އޭދަފުށި ރެލިގޭޓްވީ. ބަލިނުވާން ޖެހޭ މެޗެއް އެއީ. އެހެންވެ ވަރަށް ބޮޑު ޝޮކެއް ލިބުނީ އެ މެޗުން މޮޅުނުވުމުން. އެ ހިސާބުން ފުޓްބޯޅަ މަތިން ވެސް ފޫހިވާގޮތްވީ،" އޭރުގެ ކުޅުންތެރިޔަކު ބުންޏެވެ.

އޭގެ ފަހުން، އޭދަފުށި ރާއްޖޭގެ ފުޓްބޯޅައިގެ މައި ސިސްޓަމުގައި ހިމެނޭ މުބާރާތަކުން ނުފެނި އަހަރުތަކަށް ދިޔަ އެވެ. މީގެ ހައެއް އަހަރު ކުރިން، އެފްއޭއެމުން ޒޯން މުބާރާތް މިނިވަން ޗެމްޕިއަންޝިޕުގެ ނަމުގައި އަލުން ފެށުމުން އޭދަފުށި ވާދަކޮށް ރަނގަޅު ނަތީޖާތަކެއް ވެސް ނެރުނެވެ. އެގޮތުން 2016 ގައި ތ. ތިމަރަފުށި ބަލިކޮށް އެ ތަށި ވެސް ހޯދި އެވެ. އެކަމަކު އޭދަފުށީގެ ޖާދޫ މިހާރު ބޮޑަށް ފެންނަނީ ވަކިވަކި ކުޅުންތެރިންގެ ފަރާތުންނެވެ. ގައުމީ ޓީމާއި، ފުރަތަމަ ޑިވިޝަނުގެ ކްލަބްތަކުން ހޯދާ ކޮންމެ ކާމިޔާބެއްގައި އޭދަފުށީގެ ކުޅުންތެރިންގެ ހިއްސާ އޮވެ އެވެ. ގައުމީ ޓީމުން 2008 އާއި 2018 ގައި ސާފް ޗެމްޕިއަންޝިޕް ކާމިޔާބުކުރިއިރު ޓީމުގައި އެންމެ މުހިއްމު ދައުރެއް އަދާކުރި ކުޅުންތެރިންގެ ތެރޭގައި އޭދަފުށީ ކުޅުންތެރިން ހިމެނެ އެވެ. މުހައްމަދު ޖަމީލާއި، މުހައްމަދު ސިފާން (ކުޑައްޓޭ) އާއި، އަހުމަދު ޝާފިއު އާއި، އަލީ ފާސިރު (ސެންޓޭ) އާއި، އިޝާން އިބްރާހީމް (ސައްޓު)، އަދި ހަމްޒާ މުހައްމަދު (ހަމްޕު) ފަދަ އެތައް ތަރިންނެވެ.

އެކަމަކު މިރެއަކީ، އަނެއްކާ ވެސް އަހަރުތަކަށް ފަހު ޓީމެއްގެ ގޮތުގައި އޭދަފުށީގެ ނަން ދިވެހި ފުޓްބޯޅައިގެ ކުރިބޯށްޓަށް އަރުވަން ލިބިފައިވާ ފުރުސަތެކެވެ. ނައިންޓީ ޕްލަސް ގޯލްޑް ކަޕުގެ ފައިނަލުގައި އައްޑޫ ސިޓީއާ ދެކޮޅަށް މިރޭ އޭދަފުށިން ނުކުންނަނީ މާޒީގައި އެ ރަށް ހޯދާފައިވާ ކާމިޔާބީން ހިތްވަރު ލިބި، އެއީ އަދިވެސް ދިވެހި ފުޓްބޯޅައިގެ ވަރުގަދަ ބާރެއްކަން ސާބިތުކޮށްދިނުމުގެ އަޒުމުގަ އެވެ.