އޭދަފުށި މާބޮޑަށް ވެސް ތަފާތު، ނައިފަރު ކޮޅަށް ފަސް ލަނޑު ޖަހައި ސެމީއަށް

ނައިފަރު 5-0 އިން ބަލިކޮށް އޭދަފުށި ނައިންޓީ ޕްލަސް ގޯލްޑް ކަޕްގެ ސެމީ ފައިނަލަށް ދަތުރުކޮށްފި އެވެ.

ކުއާޓާ ފައިނަލްގެ ފުރަތަމަ މެޗުގައި މިއަދު ހަވީރު އޭދަފުށިން ނުކުތީ މާޒިޔާ ސްޕޯޓްސް އަށް ކުޅެމުން އަންނަ ގައުމީ ޓީމުގެ އަލީ ފާސިރު (ސެންޓޭ) އާއި ހަމްޒާ މުހައްމަދު (ހަމްޕު) އަދި ހައިޝަން ހަސަން (ބިޑި) ސްކޮޑުގައި ހިމަނައިގެންނެވެ.

ސެންޓޭ އާއި ބިޑި ފުރަތަމަ 11 ގައި ސްޓާޓް ކުރި އިރު، ހަމްޕު ކުޅެން އެރީ އޭދަފުށީން ހަތަރު ގޯލު ޖެހި ފަހުންނެވެ.

އޭދަފުށިން މޮޅަށް ކުޅުނު މި މެޗުގައި ފުރަތަމަ ހާފުގައި ވަނީ ގާތްގާތުގައި ގޯލު ޖަހައި ތިން ގޯލުގެ ލީޑެއް ހޯދައިފަ އެވެ. އެގޮތުން ފުރަތަމަ ގޯލަކީ ހަތަރުވަނަ މިނިޓުގައި ނައިފަރު ކުޅުންތެރިއަކު އަތުން ބައިކޮޅަށް ވަން ގޯލެކެވެ. މެޗުގެ މޮޅު ކުޅުންތެރިއަކަށް ހޮވުނު އަހުމަދު އައިހަމް (އައިހު) ނަގައިދިން ހިލޭޖެހުމުން ފޮނުވާލި ބޯޅަ ގޯލަށް ވަނީ ނައިފަރުގެ އިބްރާހިމް ވިޝާމް ފައިގައި ޖެހިފަ އެވެ.

މެޗުގެ 15 ވަނަ މިނިޓުގައި ކީޕަރު ކައިރިން ވެސް ނައްޓާލާފައި މި ގޯލު ޖަހައިދިނީ ސެންޓޭ އެވެ. އޭގެ ހަތް މިނިޓު ފަހުން އޭރިއާ ބޭރުން ފޮނުވާލި ހަމަލާއަކުން ތިންވަނަ ލަނޑު ޖަހައިދިނީ އައިހު އެވެ.

ދެވަނަ ހާފުގައި، މެޗުގެ 66 ވަނަ މިނިޓުގައި އޭދަފުށީގެ ހަތަރުވަނަ ގޯލު ޖަހައިދިނީ މުހައްމަދު ފާސިރު (ފާއްޓޭ) އެވެ. މިއީ ކްލަބް އޭވައިއެލް އަށް 2009 ވަނަ އަހަރު އެކުގައި އެއްވަނަ ޑިވިޝަން ކުޅުމަށް ފަހު، ސެންޓޭ އާއި ފާއްޓޭ ގަލޮޅު ދަނޑުގައި އެއް ޓީމަކަށް ކުޅެ އެއް މެޗެއްގައި ގޯލު ޖެހި ފުރަތަމަ ފަހަރެވެ.

އޭދަފުށީގެ ފަހު ލަނޑު 70 ވަނަ މިނިޓުގައި އައިހު ނަގައިދިން ހުރަހަކުން ޖަހައިދިނީ ސައްޓު އެވެ. މިއީ އޭދަފުށީ ޓީމުން މުބާރާތުގައި މުހިއްމު ގޯލުތަކެއް ޖަހައިދިން އެހީތެރިވި ސައްޓު މި މުބާރާތުގައި ޖެހި ފުރަތަމަ ގޯލެވެ.