އައްޑު އަށް މަދުން ޓިކެޓް ވިއްކި މައްސަލަ ހޫނުވެއްޖެ

ގޯލްޑް ކަޕުގެ ފައިނަލުގައި މިރޭ އައްޑޫ ސިޓީ އާއި ބ. އޭދަފުށި ކުޅޭ މެޗަށް ޓިކެޓް ވިއްކިއިރު އައްޑު އަށް ވުރެ ގިނައިން އޭދަފުށްޓަށް ޓިކެޓް ވިއްކި މައްސަލަ ހޫނުވެއްޖެ އެވެ.

މުބާރާތް އިންތިޒާމުކުރާ ނައިންޓީ ޕްލަސް އިން އައްޑޫ އަށް ވިއްކީ 700 ޓިކެޓެވެ. އޭދަފުށްޓަށް ވިއްކާފައިވަނީ 1800 ޓިކެޓެވެ.

ނައިންޓީ ޕްލަސް އިން ބުނީ އައްޑު އަށް ޓިކެޓް މަދުވީ، އަވޭ ޓީމުގެ ހައިސިއްޔަތުން އެ ޓީމުގެ ސަޕޯޓަރުން ތިބެން ހަމަޖެއްސި ސަހަރާވީ ފަޅީގައި ޖާގަ މަދުވުމުން ކަމަށެވެ. ހޯމް ޓީމުގެ ގޮތުގައި އޭދަފުށްޓަށް ހަމަޖައްސާފައިވަނީ މަޖީދީމަގާވީ ކޮޅެވެ. އެތަނުގެ ޖާގަ ބޮޑެވެ.

ސަހަރާވީ ފަޅީގެ ޖާގަ މަދުވަނީ އެ ދިމާލުން މަތީ ސިޑިބަރީ ހަލާކުވެފައި ހުރުމުން ސަޕޯޓަރުން އެރުވުން ރައްކާތެރިނުވާތީވެ އެވެ.

އެކަމަކު އައްޑޫ ސަޕޯޓަރުންގެ ގްރޫޕުން ބުނީ ސަހަރާވީ ފަޅީގެ ޖާގަ މަދުވާ ހާލަތުގައި، އަނެއް ފަޅިން ވެސް ހަމަ އެ އަދަދަށް ޓިކެޓްވިއްކެން އޮތީސް ކަމަށެވެ.

"މައްސަލަ އެއް ނެތް، ސެކިއުރިޓީ ކޮމްޕްރޮމައިޒް ކުރެވެން ނެތީ. އެހެން ވިއްޔާ ކީއްވެތޯ ދެ ޓީމަށް ވެސް ހަމަ އަދަދަކުން ޓިކެޓް ކަނޑަނާޅަންވޯ؟ އަހަރެމެންނަށް ކަނޑައެޅީ 700 ކަމަށް ވަންޏާ އެ ޓީމަށް ވެސް 700 ކަނޑައެޅިނަމަ މި މައްސަލަ ދިމާނުވީސް،" އެ ގްރޫޕުން ވާހަކަދެއްކި އޮފިޝަލަކު ބުންޏެވެ.

އައްޑޫ ސަޕޯޓަރުންނަށް މަދުން ޓިކެޓް ވިއްކި މައްސަލައިގައި އައްޑޫގެ މޭޔަރު އަލީ ނިޒާރު ވެސް ވަނީ ކަންބޮޑުވުން ފާޅުކުރައްވައިފަ އެވެ.

"އައްޑޫ ސިޓީގެ އާބާދީ ބޮޑުވެފައި، ސަޕޯޓަރުންގެ އަދަދު އިތުރުވާނެކަން އެގިތިބެ، އަދި ޓިކެޓްވިކި ލިބޭނެ ފައިސާވެސް ގިނަވާނެކަން އެގިތިބެ، ދަނޑުގެ ކުޑަފަޅި އައްޑޫ ސަޕޯޓަރުންނަށް ދިނުމަކީ ބޭއިންސާފެއް. (މިއީ) ބަލައި ނުގަނެވޭނެ ތަފާތުކުރުމެއް،" ސޯޝަލް މީޑިއާގައި ނިޒާރު ވިދާޅުވި އެވެ.

ފައިނަލް ކުޅޭ މާލެ އަކީ އައްޑޫ އާއި އޭދަފުށްޓަށް ވެސް ނިއުޓްރަލް ވެނޫއަކަށްވީ ނަމަވެސް، ހޯމް އެންޑް އަވޭ ޓީމު ކަނޑައެޅީ އިދާރީ ސަބަބުތަކަށްޓަކަ އެވެ. އެކަމަކު އައްޑޫ ސަޕޯޓަރުން ބުނީ، އަމުދުން ދަނޑުގެ އެއް ފަޅީގައި ޖާގަ މަދުން އޮތްއިރު ހޯމް އެންޑް އަވޭ ޓީމު ކަނޑައެޅުމަކީ ގޯހުން ކުރި ކަމެއް ކަމަށެވެ. "އައްޑޫ ސިޓީގެ އާބާދީ ބޮޑުވެފަ، ސަޕޯޓަރުންގެ އަދަދު އިތުރުވާނެކަން އެގިތިބެ، އަދި ޓިކެޓްވިކި ލިބޭނެ ފައިސާވެސް ގިނަވާނެކަން އެގިތިބެ، ދަނޑުގެ ކުޑަފަޅި އައްޑޫ ސަޕޯޓަރުންނަށް ދިނުމަކީ ބޭއިންސާފެއް. ބަލައި ނުގަނެވޭނެ ތަފާތުކުރުމެއް،" ސޯޝަލް މީޑިއާގައި ނިޒާރު ވިދާޅުވި އެވެ. "މިއީ ވަކި ޓީމެއްގެ ހޯމް މެޗެއް ނޫން،"

މެޗު ބަލަން އަންނަން ބޭނުންވާ އައްޑޫ ބައެއް މީހުންނަށް މޯލްޑިވިއަންގެ ހާއްސަ ޗާޓަރު ފްލައިޓެއް މިއަދު ބާއްވާ ގޮތަށް އޮޓީ ހަމަޖައްސައިފަ އެވެ. އަދި ކައިރި ރިޒޯޓްތަކުގައި މަސައްކަތްކުރާ އައްޑޫ މީހުން ވެސް ތިބީ އަންނަ ގޮތަށެވެ.

އެ ހުރިހާ ސަބަބުތަކާ އެކު ނައިންޓީ ޕްލަސް އިން ވަނީ ދަނޑުގެ ބޮޑުގޭޓް ފަޅިން ޖާގައެއް ހެދޭތޯ ބަލައިފަ އެވެ. އެކަމަކު އެމްއެންޑީއެފްގެ ޓީމަކުން އިންސްޕެކްޓްކުރުމަށް ފަހު ނިންމީ އެތަން ރައްކާތެރި ނޫން ކަމަށެވެ.

ނައިންޓީ ޕްލަސް އިން މިހާރު ނިންމާފައި އޮތީ ނިރޮޅުމަގާ ދިމާލުން އިތުރު ޖާގަތަކެއް ހަދައި، 300 އެއްހާ ޖާގަ އައްޑޫ ސަޕޯޓަރުންނަށް ދޭ ގޮތަށެވެ.